លោកនាយករដ្ឋមន្ត្រី ហ៊ុន សែន បានជំទាស់ទៅនឹងគម្រោងបង្កើតទូរទស្សន៍ថ្មីរបស់ក្រសួងព័ត៌មានដោយថាចំណាយលុយច្រើន ហើយទូរទស្សន៍ជាតិសព្វថ្ងៃប្រើមិនទាន់អស់សមត្ថភាពរបស់ខ្លួន។
លោក ហ៊ុន សែន បានលើកឡើងបែបនេះក្នុងជំនួបប្រចាំឆ្នាំជាមួយអ្នកសារព័ត៌មាននាល្ងាចថ្ងៃទី១១ មករា ឆ្នាំ២០១៨។ លោក ហ៊ុន សែន ក៏បានថ្លែងផងដែរថាការបង្កើតស្ថានីយទូរទស្សន៍ថ្មីគឺត្រូវការលុយច្រើនដើម្បីបង្កើត។
លោកថា៖ « ជាងនេះទៅទៀតសម័យនេះជាសម័យដែលOnline គេមានហើយ! មិនមិនចាំម៉ោងផ្សាយរបស់ទួរទស្សន៍លោកឯងទេ! »
កាលពីដើមខែមករានេះ ក្រសួងព័ត៌មានបានលើកឡើងពី គម្រោងបង្កើតទូរទស្សន៍យ៉ាងតិច ៣ប៉ុស្តិ៍បន្ថែមទៀត ឲ្យទីភ្នាក់ងារសារព័ត៌មានកម្ពុជា (AKP) និងវិទ្យុជាតិកម្ពុជា ដោយថា ស្ថាប័នទាំងពីរនេះ បច្ចុប្បន្ននេះ មានតែការផ្សព្វផ្សាយតាមគេហទំព័រ និងរលកធាតុអាកាសជាសំឡេងតែប៉ុណ្ណោះ៕