ប្រជាកសិករនៅតាមបណ្តាខេត្តមួយចំនួន បានត្អូញត្អែរថា ផលស្រូវរបស់ពួកគាត់ដែលប្រមូលបាននៅដើមឆ្នាំ២០១៩នេះ លក់បានតម្លៃថោក ធ្វើឲ្យខាតបង់មិនមានប្រាក់គ្រប់គ្រាន់សម្រាប់សងលើការចំណាយថ្លៃដើមពេលដាំដុះ។
កសិករដែលផ្តល់បទសម្ភាសន៍ឲ្យវីអូឌីឲ្យដឹងថា ផលស្រូវរបស់ពួកគាត់លក់បានចម្លោះពី៨០០រៀល ទៅ១០០០រៀលក្នុង១គីឡូក្រាម។ ពួកគាត់ថា តម្លៃនេះមិនគ្រប់គ្រាន់សម្រាប់ថ្លៃដើមដាំដុះទេ។
កសិករនៅឃុំសឿង ស្រុកមង្គលបុរី ខេត្តបន្ទាយមានជ័យ អ្នកស្រី តឿង ប៊ុននឿង មានប្រសាសន៍ថា តម្លៃស្រូវដែលអ្នកស្រីប្រមូលបាននាដើមឆ្នាំ២០១៩នេះ ត្រូវបានឈ្មួញឲ្យតម្លៃត្រឹមតែជាង១ពាន់រៀលប៉ុណ្ណោះក្នុងមួយគីឡូចំពោះស្រូវក្រអូបដែលមានគុណភាពល្អ តែសម្រាប់ស្រូវក្រអូបដែរតែគុណភាពមិនល្អឈ្មួញឲ្យតែ៨រយរៀលតែប៉ុណ្ណោះ។
អ្នកស្រីថា៖ « ព្រោះបើយើងគិតទៅតម្លៃម៉ាស៊ូតតម្លៃជីតម្លៃថ្នាំបាញ់អី វាតម្លៃថេរវាអត់ចុះតាមស្រូវឯណា ដល់អញ្ចឹងប្រជាពលរដ្ឋជួបផលវិបាកហើយ! បើសំណូមពរពួកខ្ញុំសុំឲ្យតែតម្លៃថេរតែគីឡូ៩បាត(ប្រមាណ១២០០រៀល) ត្រឹមតម្លៃប៉ុណ្ណេះពួកខ្ញុំសប្បាយចិត្តនឹងទទួលយកហើយ » ។
មិនខុសពីអ្នកស្រី ប៊ុននឿង ប៉ុន្មាន កសិករនៅឃុំសំរោង ស្រុកព្រៃឈរ ខេត្តកំពង់ចាម លោក ភិន សុផល មានប្រសាសន៍ថា តម្លៃស្រូវធម្មតាអ៊ីអ៊ែ នៅឆ្នាំនេះ លោកលក់បានតែ៨០០រៀលប៉ុណ្ណោះក្នុងមួយគីឡូ ខណៈកាលពីឆ្នាំមុនលោកអាចលក់បានដល់ទៅ៩រយរៀល។ លោកបន្ថែមថា ដោយសារតែពិបាករកប្រាក់ចំណេញពីការធ្វើស្រែនេះ ពលរដ្ឋក្នុងភូមិឃុំលោកត្រូវដាំដុះបន្លែផ្លែឈើ និងធ្វើចម្ការបន្ថែមដើម្បីរកប្រាក់ផ្គត់ផ្គង់ជីវភាព។
លោកថា៖ « ឈ្មួញក្នុងស្រុកឲ្យតម្លៃតាមមាត់ មិនមែនយើងមានទីផ្សារហើយអត់មានឈ្មួញចូលមកទិញទេណា! ហើយគេទិញយកទៅលក់ហ្នឹងមិនដឹងជាចំណេញប៉ុន្មានអីប៉ុន្មានទេស្រេចតែគេឲ្យថ្លៃ។ […] យើងធ្វើស្រូវយើងចំណាយលើជី ចំណាយលើថ្នាំសម្លាប់សត្វល្អិត ចំណាយសងធនាគារ ភ្លើងអីហ្នឹង » ។
ឈ្មួញកណ្ដាលទិញស្រូវពីកសិករម្នាក់នៅស្រុកកោះធំ ខេត្តកណ្ដាល អ្នកស្រី សែម ភា មានប្រសាសន៍ថា បញ្ហាបច្ចុប្បន្ននេះ ក៏ធ្វើឲ្យប៉ះពាល់ដល់ក្រុមអ្នកទិញដែរ ដោយសារតែត្រូវយកលុយទៅបង្វិលថ្លៃដើម ហើយនៅពេលដែលស្រូវចុះថោកដូចនេះ គឺលក់មិនចំណេញនោះទេ។ អ្នកស្រីបន្ថែមថា មូលហេតុដែលតម្លៃស្រូវចុះមកនៅត្រឹមតែ៨០០រៀលនេះដោយសារ តែស្រូវមានច្រើន ហើយឈ្មួញវៀតណាមបន្ទាបតម្លៃស្រូវខ្មែរ។
អ្នកស្រីថា៖ « ពីឆ្នាំទៅបានថ្លៃគ្រាន់បើ បាន១១៨០០រៀល ១២០០០រៀលអី(ក្នុង១តៅ១២គីឡូ) យើងបានថ្លៃគ្រាន់បើ ដល់ឆ្នាំនេះធ្លាក់ហៅអត់ឮហ្មង ឆ្នាំមុនខែនេះស្រូវដើមដៃអញ្ចឹងយើងលក់បានថ្លៃ ហើយឆ្នាំនេះធ្លាក់តាំងពីឥឡូវហើយ ទម្រាំដល់ចុងដៃខែបីខែបួនដែលប្រមូលផលច្រើនមែនទែន ចាំមើលរឹតតែគរច្រើនទៀត។ ខែនេះដំបូងដើមទី ហើយចាំមើលដល់ខែ៣ខែ៤ដឹងតែគេលែងទិញហ្មង » ។
អ្នកស្រីសំណូមពរដល់រដ្ឋាភិបាលគួរគិតគូរពីបញ្ហានេះ ដោយគួរតែផ្សព្វផ្សាយព័ត៌មានឲ្យច្រើនពីទីផ្សារកសិកម្ម និងជំរុញដល់ក្រុមហ៊ុននាំចេញអង្ករឲ្យប្រមូលទិញអង្ករពីពលរដ្ឋឲ្យបានច្រើន។
អ្នកនាំពាក្យក្រសួងពាណិជ្ជកម្ម លោក ស៊ាង ថៃ ទទួលស្គាល់ថា អង្ករកម្ពុជាពិតជាធ្លាក់ថ្លៃពិតមែន។ លោកថា ក្រសួងនឹងរៀបចំជាមួយភាគីពាក់ព័ន្ធដើម្បីដោះស្រាយ។
អ្នកនាំពាក្យក្រសួងកសិកម្ម លោក ស្រី វុឌ្ឍី មានប្រសាសន៍ថា បញ្ហាគាំងទីផ្សារនេះ គឺបណ្ដាលមកពីប្រទេសដែលជាអ្នកទិញច្រើនពីកម្ពុជាមានថៃ និងវៀតណាម ក៏ដល់រដូវប្រមូលផលផងដែរ ខណៈទីផ្សារអន្តរជាតិបានចុះថ្លៃ ហើយប្រទេសឥណ្ឌាបានបញ្ចេញអង្ករច្រើនទៅលក់។ លោកបន្ថែមថា នៅពេលនេះក្រសួងក៏កំពុងសិក្សា និងមានវិធានការណ៍នាពេលខាងមុខ។
លោកថា៖ « កន្លងមក វៀតណាមច្បាស់ជាមួយកិច្ចសន្យាហ្នឹង ដល់រដូវគេសម្រុកមកទិញតែម្ដង អញ្ចឹងយើងនេះវាធូរ អញ្ចឹងយើងនេះគ្រាន់បើបន្តិចទៅ! តែពេលនេះក្នុងខែនេះហាក់បីដូចជានៅទ្រឹង។ តែខ្ញុំគិតថា នៅពេលខាងមុខបន្តិចទៀតវៀតណាម ឬមួយក៏ខាងថៃចាប់ផ្ដើមទិញដោយសារតម្លៃនៅលើទីផ្សារអន្តរជាតិឡើងថ្លៃវិញ។ អញ្ចឹងគេទ្រឹងបន្តិចសិន ហើយនៅពេលទីផ្សារគេហក់ឡើងវិញបន្តិចប្រហែលជាមកទៀតហើយ » ។
សម្រាប់ប្រធានសម្ព័ន្ធសហគមន៍កសិករកម្ពុជា លោក ថេង សាវឿន មានប្រសាសន៍ថា បញ្ហាតម្លៃស្រូវថយចុះនេះអាចបណ្ដាលមកពីការសម្រេចរបស់សហភាពអឺរ៉ុបចំពោះការយកពន្ធអង្កររបស់កម្ពុជា ដែលធ្វើឲ្យក្រុមហ៊ុនក្នុងស្រុកមិនទាន់ហ៊ានសម្រេចចិត្តបោះទុនទិញ។ លោកជំរុញដល់រដ្ឋាភិបាលគួរតែមានវិធានការរក្សាទីផ្សារអឺរ៉ុប និងទីផ្សារថ្មីៗមិនគួរចាំបាច់តែទីផ្សារថៃ និងវៀតណាមនោះទេ។
លោកថា៖ « ហើយបើទោះបីកម្ពុជាយើងមានទីផ្សារទៅកាន់ប្រទេសវៀតណាម និងថៃ ក៏ប្រទេសទាំងពីរហ្នឹងនាំអង្ករទៅលក់នៅអឺរ៉ុបដែរ បើទោះបីផលិតផលខ្មែរតែបានពាក់ផ្លាកប្រទេសថៃឬវៀតណាម » ។
ទោះជាយ៉ាងណា អគ្គនាយកនៃក្រុមហ៊ុនបៃតងនាំចេញអង្ករ លោក ភូ ពុយ មានប្រសាសន៍ថា ទីផ្សារកម្ពុជាអាចនឹងសម្រុកទៅកាន់ប្រទេសនៅអាស៊ីឲ្យខ្លាំងដែលមានដូចជាចិន ម៉ាឡេស៊ី និងប៊្រុយណេ ដើម្បីតៀមទៅនឹងការយកពន្ធរបស់អឺរ៉ុបនេះ ខណៈជំរុញឲ្យពលរដ្ឋងាកមកដាំអង្ករក្រអូបឲ្យបានច្រើនព្រោះអង្ករប្រភេទនេះមានតម្លៃថ្លៃ និងមានទីផ្សារច្រើន។
លោកថា៖ « តាមការពិតទៅយើងធ្វើយូរដែរហើយ ដើម្បីត្រៀមទប់នឹងការយកពន្ធរបស់អឺរ៉ុបហ្នឹង។ យូរឬឆាប់គង់តែបិទដដែលហ្នឹង ទោះបីបិទក៏យើងនៅតែធ្វើ បើមិនបិទក៏យើងត្រូវតែធ្វើដែរ » ។
ឆ្នាំ២០១៨នេះ កម្ពុជានាំចេញអង្ករបានជាង៦២ម៉ឺនតោន ថយចុះ ១,៥ភាគរយ បើធៀបទៅនឹងការនាំចេញក្នុងឆ្នាំ២០១៧ ជាង៦៣ម៉ឺនតោន ខណៈរដ្ឋាភិបាលបានបន្ទោសបញ្ហានេះទៅលើការប្រកួតប្រជែងនៅលើទីផ្សារអន្តរជាតិ៕