រដ្ឋាភិបាលបានចាត់ទុកវិធានការរបស់សហភាពអឺរ៉ុប (EU) យកពន្ធអង្ករនាំចូលពីកម្ពុជា ថាជាអាវុធសម្លាប់ប្រជាកសិករដែលបច្ចុប្បន្នកំពុងមានជីវភាពក្រីក្រ និងមានជាប់បំណុលនៅធនាគារ។
សហភាពអឺរ៉ុបបានសម្រេចយកពន្ធគយលើអង្ករនាំចូលពីប្រទេសកម្ពុជា និងប្រទេសភូមា នៅរយៈពេល៣ឆ្នាំជាប់គ្នា ទៅតាមសំណើបណ្ដាសមាជិកដែលជាប្រទេសផលិតអង្ករនៅក្នុងសហគមន៍មួយនេះ ដោយចាប់ផ្ដើមអនុវត្តចាប់ពីថ្ងៃនេះតទៅ។
ក្នុងសេចក្ដីថ្លែងការណ៍ចុះថ្ងៃទី១៧ ខែមករា ឆ្លើយតបទៅនឹងវិធានការនេះ ក្រសួងពាណិជ្ជកម្មបានចាត់ទុកវិធានការនេះ វានឹងធ្វើឲ្យប៉ះពាល់ដល់ចំណូលរបស់ប្រជាកសិករកម្ពុជា និងជាអាវុធសម្រាប់ធ្វើឃាតពួកគាត់ ។
សេចក្តីថ្លែងការណ៍៖ «ការសម្រេចដាក់វិធានការការពារទីផ្សារដោយសហភាពអឺរ៉ុបមកលើអង្ករ (Indica rice) ដែលមានប្រភពដើមពីកម្ពុជាមានឥទ្ធិពលគ្រប់គ្រាន់ សម្រាប់ដកហូតចំណូលរបស់ប្រជាកសិករក្រីក្រកម្ពុជា និងជាអាវុធសម្រាប់ធ្វើឃាតពួកគាត់និងក្រុមគ្រួសារ ដែលកំពុងជាប់បំណុលជាមួយស្ថាប័នឥណទាន ដែលបានផ្តល់ប្រាក់កម្ចីដល់ពួកគាត់។»
ក្រសួងពាណិជ្ជកម្មក៏បានអំពាវនាវឲ្យសហភាពអឺរ៉ុបពិចារណាឡើងវិញលើការសម្រេចនេះ ហើយថា ក្រសួងក៏កំពុងតែពិនិត្យលើច្បាប់ និងវិធានពាណិជ្ជកម្មអន្តរជាតិពាក់ព័ន្ធដើម្បីតវ៉ា។
អគ្គនាយកក្រុមហ៊ុននាំចេញអង្ករ Amru Rice លោក សុង សារ៉ន បានលើកឡើងលើហ្វេសប៊ុករបស់លោក ដោយអំពាវនាវឲ្យប្រជាកសិករ និងរោងម៉ាស៊ីនស្រូវបន្តធ្វើការតាមធម្មតា ដោយថាភាគីឯកជន និងរដ្ឋាភិបាលកំពុងពិភាក្សាគ្នាដើម្បីដោះស្រាយបញ្ហាដែលកើតមាននេះហើយ។
លោកសរសេរថា៖ « កម្ពុជាអាចបាត់បង់ទីផ្សារអង្ករខ្លះនៅ EU។ យើងនឹងអាចរកមធ្យោបាយចូលទីផ្សារ EU ឡើងវិញ និងសិក្សាពីផលប៉ះពាល់ទីផ្សារនេះបាននៅខែកុម្ភៈ » ។
អ្នកវិភាគសេដ្ឋកិច្ច លោក យ៉ង់ ប៉ាក់ បង្ហាញការសោកស្ដាយចំពោះការសម្រេចចិត្តរបស់អឺរ៉ុបនេះ ខណៈលោកថា វាអាចនឹងធ្វើឲ្យប៉ះពាល់ដល់ប្រជាកសិករខ្មែរពី៣០ ដល់៤០ភាគរយផងដែរ។ លោកជំរុញឲ្យកម្ពុជាបញ្ចុះតម្លៃអគ្គិសនីដល់រោងម៉ាស៊ីនស្រូវបន្ថែមទៀត សម្លឹងរកទីផ្សារថ្មីបន្ថែម និងធ្វើយ៉ាងណាកាត់បន្ថយថ្លៃចំណាយនៃការនាំចេញឲ្យបានច្រើនបន្ថែមទៀត។
លោកថា៖ « ប្រសិនអឺរ៉ុបគេយកពន្ធទៅលើស្រូវស ប្រហែលជា៣០ភាគរយទៅ៤០ភាគរយទេ ដែលប៉ះពាល់ដល់កសិករ។ អញ្ចឹងកសិករយើងអាចបង្វែរមកដាំស្រូវប្រណិត និងស្រូវក្រអូបវិញ អញ្ចឹងកសិករយើងនឹងអាចដោះស្រាយបញ្ហាបានហើយ តែឥឡូវអឺរ៉ុបវ៉ៃរាបយកទាំងអស់»។
សហព័ន្ធស្រូវអង្ករកម្ពុជាបានលើកឡើងកាលពីចុងខែវិច្ឆិកាកន្លងទៅថា ការសម្រេចយកពន្ធនាំ ចូលអង្ករពីកម្ពុជានេះ វានឹងធ្វើឲ្យប៉ះពាល់ដល់ជីវភាពរបស់កសិករកម្ពុជាប្រមាណ៣លាននាក់ និងធ្វើឲ្យប៉ះពាល់ដល់វិស័យឧស្សាហកម្មមួយចំនួនទៀតផងដែរ។
ក្នុងរបាយការណ៍នាំចេញអង្ករទៅលក់នៅទីផ្សារអន្តរជាតិឆ្នាំ២០១៨ អង្ករកម្ពុជាជិត ២៧ម៉ឺនតោន ត្រូវបាននាំចូលទៅកាន់ទីផ្សារសហគមន៍អឺរ៉ុប។ ក្នុងចំណោមអង្ករនាំចេញរបស់កម្ពុជា៤៣ភាគរយ យកទៅលក់នៅអឺរ៉ុបដោយមិនជាប់ពន្ធ។