មេធាវីការពារក្តីឲ្យលោក គង់ ម៉ាស់ សកម្មជនអតីតគណបក្សប្រឆាំងប្រចាំខេត្តស្វាយរៀង បានឱ្យដឹងថា លោកនឹងស្នើទៅតុលការនៅសប្ដាហ៍នេះ ឲ្យទម្លាក់ចោលបទចោទប្រកាន់លើកូនក្ដីរបស់លោក។
មេធាវីការពារក្តីឱ្យលោក គង់ ម៉ាស់ គឺលោក សំ សុគង់ បានចាត់ទុកថា ការចោទប្រកាន់ប្រឆាំងនឹងកូនក្ដីរបស់លោកថា ជាករណីជារឿងនយោបាយ ហើយលោកនឹងការដាក់លិខិតស្នើឱ្យតុលាការទម្លាក់ចោលការចោទប្រកាន់មកលើកូនក្តីរបស់ខ្លួន។
លោក សំ សុគង់ មានប្រសាសន៍ថា៖ «គឺសកម្មភាពលោក គង់ ម៉ាស់ ហ្នឹង ជាការប្រើប្រាស់នូវសិទ្ធិចូលរួមក្នុងជីវភាពនយោបាយ ហើយចំណុចដែលសំខាន់មួយទៀត លោក គង់ ម៉ាស់ ជាពលរដ្ឋម្ចាស់ឆ្នោតក្នុងប្រទេសប្រជាធិបតេយ្យ ហើយលោក គង់ ម៉ាស់ គាត់អាចប្រើប្រាស់សិទ្ធិរិះគន់ទៅលើរដ្ឋាភិបាលចំពោះចំណុចមួយចំនួន ដែលសិទ្ធិនេះធានាក្នុងរដ្ឋធម្មនុញ្ញ ក៏ដូចជាច្បាប់អន្តរជាតិផងដែរ»។
លោក គង់ ម៉ាស់ ជាអតីតសមាជិកក្រុមការងាររបស់គណបក្សសង្គ្រោះជាតិប្រចាំនៅខេត្តស្វាយរៀង និងជាអនុប្រធាននាយកដ្ឋានកិច្ចការបោះឆ្នោត និងនីតិកម្ម។ លោកត្រូវបានសមត្ថកិច្ចក្រសួងមហាផ្ទៃចាប់ឃាត់ខ្លួនកាលពីព្រឹកថ្ងៃទី១៦ ខែមករា នៅក្នុងហាងកាហ្វេមួយកន្លែងនៅរាជធានីភ្នំពេញ។
លោក គង់ ម៉ាស់ ត្រូវបានសមត្ថកិច្ចចាប់ខ្លួនតែ ២ថ្ងៃប៉ុណ្ណោះក្រោយពីលោក ហ៊ុន សែន ថ្លែងព្រមានកម្ចេចក្រុមបក្សប្រឆាំងចោលនិងមិនអត់ឱនឱ្យក្រុមនេះជាដាច់ខាត ប្រសិនបើសហគមន៍អឺរ៉ុប និងអាមេរិក ដកហូតប្រព័ន្ធអនុគ្រោះពន្ធពីកម្ពុជា។
អ្នកនាំពាក្យសាលាដំបូងរាជធានីភ្នំពេញ លោក លី សុផាណា ឱ្យដឹងតាមប្រព័ន្ទតេឡេក្រាមនៅថ្ងៃនេះថា លោក គង់ ម៉ាស់ ត្រូវបានតុលាការចោទពីបទញុះញុងឲ្យប្រព្រឹត្តបទឧក្រិដ្ឋ និងបទប្រមាថ តាមមាត្រា ៤៩៥ និង មាត្រា ៥០២ នៃក្រមព្រហ្មទណ្ឌ ហើយត្រូវបានចៅក្រមស៊ើបសួរសម្រេចដាក់ឲ្យឃុំខ្លួននៅពន្ធនាគារព្រៃសជាបណ្តោះអាសន្ន។
ប្រសិនបើរកឃើញថាមានកំហុស សកម្មជនអតីតបក្សប្រឆាំងរូបនេះ អាចប្រឈមមុខនឹងការជាប់ទោសនៅក្នុងពន្ធនាគារចន្លោះពី ៦ខែ ទៅ ២ឆ្នាំ។
អ្នកគ្រប់គ្រងបច្ចេកទេសស៊ើបអង្កេតនៅអង្គការលីកាដូ លោក អំ សំអាត បានចាត់ទុកការចាប់ខ្លួនសកម្មជនអតីតបក្សប្រឆាំងរូបនេះថា ជាការគំរាមកំហែង និងរឹតត្បិតសិទ្ធិសេរីបញ្ចេញមតិរបស់ពលរដ្ឋ ដែលរដ្ឋធម្មនុញ្ញបានធានា។
លើសពីនេះ លោកថា វាផ្ទុយគ្នាទៅនឹងសេចក្តីណែនាំ ឬឆន្ទៈរបស់រដ្ឋាភិបាល ដែលចង់បើកចំហសេរីភាពបញ្ចេញមតិ និងលើកកម្ពស់ការគោរពសិទ្ធិមនុស្សឡើងវិញ និងធ្វើឱ្យប៉ះពាល់ដល់មុខមាត់កម្ពុជានៅលើឆាកអន្តរជាតិផងដែរ។
លោកបន្តថា៖ «ផលប៉ះពាល់ផងដែរ ក្នុងការបាត់ ឬអវត្តមានក្នុងការចូលរួមបញ្ចេញមតិដើម្បីស្ថាបនា ដើម្បីកែលម្អប្រទេសជាតិយើងហ្នឹង។ បញ្ហាទីពីរ នឹងមានការរិះគន់ជាបន្តទៀតដែរ ទាក់ទងការគោរពសិទ្ធិមនុស្សនៅក្នុងប្រទេសកម្ពុជា ដោយបច្ចុប្បន្ននេះ យើងកំពុងមានបញ្ហាចម្រូងចម្រាសស្រាប់ទៅហើយជាមួយសហគមន៍អឺរ៉ុប ជាមួយសហគមន៍អន្តរជាតិ»។
លោក គង់ ម៉ាស់ ធ្លាប់បានរិះគន់បក្សកាន់អំណាច និងរដ្ឋាភិបាល អំពីភាពអសកម្មជាច្រើនពាក់ព័ន្ធបញ្ហាព្រំដែន បញ្ហាកសិផលគ្មានតម្លៃ ការរំលោភបំពានសិទ្ធិសេរីភាព បញ្ហាជនជាតិវៀតណាមអន្តោប្រវេសន៍ខុសច្បាប់ជាដើម។
ក្រោយគណបក្សសង្រ្គោះជាតិត្រូវបានតុលាការកំពូលរំលាយកាលពីឆ្នាំ២០១៧ លោកបានរត់ភៀសខ្លួនទៅប្រទេសថៃមួយរយៈពេល ដោយមានការធ្វើទុក្ខបុកម្នេញពីអាជ្ញាធរ និងបន្ទាប់ពីលោកបដិសេធចុះចូលជាមួយគណបក្សកាន់អំណាច៕