អតីតទីប្រឹក្សាជាន់ខ្ពស់គណបក្សសង្គ្រោះជាតិប្រាប់តុលាការថា លោកមិនបានដឹងច្បាស់ពីទំនាក់ទំនងរវាងលោក កឹម សុខា ដែលកំពុងជាប់ឃុំក្នុងផ្ទះជាមួយបរទេសចង់ផ្តួលរំលំរដ្ឋាភិបាលកម្ពុជាទេ។
ថ្លែងប្រាប់ក្រុមអ្នកសារព័ត៌មានបន្ទាប់ពីបញ្ចប់ការបំភ្លឺនៅសាលាដំបូងនៅព្រឹកនេះ អតីតឧត្តមទីប្រឹក្សាគណបក្សសង្គ្រោះជាតិ ហើយនឹងធ្វើជាទីប្រឹក្សាឲ្យគណបក្សឆន្ទៈខ្មែរ លោក គង់ គាំ ឲ្យដឹងថា លោកភ្ញាក់ផ្អើលចំពោះប្រសាសន៍របស់ លោក កឹម សុខា ដែលថ្លែងក្នុង វីដេអូ នៅប្រទេសអូស្ត្រាលីកាលពីឆ្នាំ២០១៣។ ការអត្ថាធិប្បាយនេះហើយដែលធ្វើឲ្យលោករងការចោទប្រកាន់និងចាប់ឃុំខ្លួនរហូតដល់បច្ចុប្បន្ន។
លោក គង់ គាំ បញ្ជាក់ទៀតថា លោកមិនបានដឹងអ្វីពីការទំនាក់ទំនងរវាងលោក កឹម សុខា ជាមួយបរទេសនោះទេ។
លោក គង់ គាំ មានប្រសាសន៍ថា៖ «ខ្ញុំមិនយល់អស់ពីអ្វីដែល លោក កឹម សុខា គាត់បានបញ្ជាក់នៅក្នុងវីដេអូហ្នឹង ថាគាត់មានទំនាក់ទំនងជាមួយសាស្ត្រាចារ្យបរទេសណាហើយផែនការយ៉ាងម៉េច ខ្ញុំអត់បានដឹងទាំងអស់។ ខ្ញុំគ្រាន់ថាជាអាថ៌កំបាំងរវាង លោក កឹម សុខា និងបរទេសដែលយើងមិនអាចដឹងបាន»។
អតីតទីប្រឹក្សាជាន់ខ្ពស់គណបក្សសង្គ្រោះជាតិរូបនេះនៅបានបញ្ជាក់ទៀតថា លោកគ្រាន់តែមកបំភ្លឺនិងផ្តល់ព័ត៌មានដើម្បីឲ្យតុលាការរកយុត្តិធម៌ជូនជនត្រូវចោទតែប៉ុណ្ណោះ។
ទោះជាយ៉ាងណា លោក គង់ គាំ នៅបានឆ្លៀតបញ្ជាក់ជាចុងក្រោយថា មានតែលោក សម រង្ស៊ី ទេ ដែលដឹងរឿងនេះច្រើនជាងលោក។
លោក កឹម សុខា ត្រូវបានសមត្ថកិច្ចចាប់ខ្លួន និងបញ្ជូនទៅដាក់ឃុំខ្លួននៅពន្ធនាគារត្រពាំងផ្លុង ក្នុងខេត្តត្បូងឃ្មុំ ជាប់ព្រំដែនកម្ពុជា-វៀតណាម កាលពីដើមខែកញ្ញា ឆ្នាំ២០១៧ ក្រោមការចោទប្រកាន់ពីរដ្ឋាភិបាលថា «ក្បត់ជាតិ»។ ជាង១ឆ្នាំក្រោយមកទើបតុលាការសម្រេចឃុំខ្លួនលោកកឹម សុខាក្នុងផ្ទះវិញ។