ប្រទេសកម្ពុជាបានបញ្ជាក់ចំពោះប្រទេសចិនថា ខ្លួនទទួលស្គាល់តែរដ្ឋាភិបាលរបស់លោក ស៊ី ជិនពីន តែមួយប៉ុណ្ណោះដែលជារដ្ឋស្របច្បាប់ ខណៈប្រកាសប្រឆាំងដាច់ខាតទៅនឹងឯករាជ្យរបស់កោះតៃវ៉ាន់។
ក្នុងសេចក្ដីប្រកាសរួមគ្នារវាងកម្ពុជា-ចិន ចុះថ្ងៃទី២៣ មករានេះ កម្ពុជាបានបញ្ជាក់ជាថ្មីជាមួយចិនថា ខ្លួនទទួលស្គាល់រដ្ឋាភិបាលសាធារណរដ្ឋប្រជាមានិតចិនជារដ្ឋាភិបាលស្របច្បាប់តែមួយគត់ តំណាងឲ្យប្រទេសចិនទាំងមូល ហើយតៃវ៉ាន់ជាផ្នែកសំខាន់មួយនៃបូរណភាពរបស់ចិនប៉ុណ្ណោះ។
លោកថា៖ « ភាគីកម្ពុជាសូមប្រឆាំងចំពោះការប្រកាសឯករាជ្យរបស់តៃវ៉ាន់គ្រប់ទម្រង់ ព្រមទាំងបន្តគាំទ្រការអភិវឌ្ឍន៍ដោយសន្តិភាពនូវទំនាក់ទំនងចិន និងតៃវ៉ាន់គ្រប់ទម្រង់ ព្រមទាំងបន្តគាំទ្រការអភិវឌ្ឍន៍ដោយសន្ថិភាពនូវទំនាក់ទំនង ចិន និងតៃវ៉ាន់ និងបុព្វហេតុក្នុងការបង្រួបបង្រួមចិន។ ភាគីចិនបានវាយតម្លៃយ៉ាងខ្ពស់ចំពោះការគាំទ្រខាងលើនេះ » ។
ប្រធានាធិបតីចិនលោក ស៊ី ជិនពីង កាលពីថ្ងៃទី២ ខែមករា ឆ្នាំ២០១៩ បានថ្លែងក្នុងខួបលើកទី៤០ នៃការបញ្ចប់ការប្រឈមមុខដាក់គ្នាដោយយោធានៅច្រកសមុទ្រតៃវ៉ាន់ រវាងរដ្ឋាភិបាលក្រុងប៉េកាំង និងក្រុងតៃប៉ិ ថា តៃវ៉ាន់ ត្រូវតែបង្រួបបង្រួមឡើងវិញដោយសន្តិភាពជាមួយចិនដោយប្រើគោលនយោបាយ «ប្រទេសមួយ ប្រព័ន្ធពីរ» ដើម្បីជាប្រយោជន៍ដល់ប្រជាជនចិនទាំងអស់។ ទោះជាយ៉ាងប្រជាជនចិននៅលើកោះតៃវ៉ាន់ជាង៨០ភាគរយបានបដិសេធទៅនឹងការលើកឡើងនេះ៕
