ប្រជាកសិករនៅតាមបណ្តាខេត្តមួយចំនួនបានលើកឡើងថា តម្លៃស្រូវចាប់ផ្ដើមចុះថ្លៃជាបន្តបន្ទាប់ចាប់តាំងពីសប្ដាហ៍មុនមក ជាហេតុធ្វើឲ្យពួកគេជួបការលំបាកក្នុងការប្រកបរបរលើវិស័យនេះជាខ្លាំង។
កសិករ និងជួញដូរស្រូវលើកឡើងថា តម្លៃស្រូវចាប់ផ្ដើមចុះថ្លៃជាបន្តបន្ទាប់ក្នុងរដូវច្រូតកាត់លើកនេះ ដែលធ្វើឲ្យពួកគាត់ខ្លះមិនហ៊ានច្រូតកាត់ដោយសារខ្លាចគ្មានអ្នកទិញ ខណៈឈ្មួញកណ្ដាលក៏មិនសូវហ៊ានទិញមកទុកដូចឆ្នាំមុននោះទេ។
កសិករនៅក្នុងស្រុកបន្ទាយមាស ខេត្តកំពត អ្នកស្រី ប៉ែន ចន្ថូ មានប្រសាសន៍ថា តម្លៃស្រូវនៅពេលនេះបើធៀបនឹងសប្ដាហ៍មុនគឺបានចុះថ្លៃបន្ថែមទៀត ដែលធ្វើឲ្យពលរដ្ឋមួយចំនួនអស់ទឹកចិត្តក្នុងការធ្វើស្រែចម្ការ និងងាយទៅរករបរផ្សេង ឬធ្វើចំណាកស្រុកវិញ។ អ្នកស្រីបន្ថែមថា តម្លៃនាសប្ដាហ៍នេះ វៀតណាមឲ្យតម្លៃតែ៧០០រៀលប៉ុណ្ណោះក្នុងមួយគីឡូ ខណៈសប្ដាហ៍មុនអ្នកស្រីលក់បាន៨០០រៀល។
អ្នកស្រីថា៖ « ស្រូវថោកមាំណាស់! អ្នកធ្វើស្រែចង់រត់ចោលស្រុកអស់ហើយ។ ចុះស្រូវគេមួយគីឡូប្រាំមួយរយជាង ហើយជីគេម៉ាបាវជាង១០ម៉ឺនគិតមើល។ […] អ្នកនៅស្រុកនេះចង់រត់ចោលស្រុកអស់ហើយ ទៅធ្វើខ្ញុំគេ ទៅធ្វើសំណង់អីវិនទៅ » ។
ឈ្មួញទិញស្រូវនៅក្នុងស្រុកកោះធំ ខេត្តកណ្ដាល អ្នកស្រី សែម ភា បានប្រាប់ VOD ថា ស្រូវចុះមកនៅក្នុងតម្លៃនេះហើយ ក៏ឈ្មួញមិនងាយមកទិញទៀតដែលធ្វើឲ្យអ្នកស្រីពិបាករកស៊ីផងដែរ។
អ្នកស្រីសែម ភា៖ « ពួកយើងតែងទិញគឺយកទៅក្រោមហើយ(វៀតណាម) ហើយដល់ពេលយួនអត់មកទិញអញ្ចឹង យើងមានទៅទិញអី។ ឧទាហរណ៍ថា កសិករហៅមើលប្រាំ-ប្រាំមួយហត្ថ(ស្រូវ) គេចង់លក់អញ្ចឹងណា យើងត្រូវហៅម៉ូយយួនមកមើលចុះកុងត្រាជាមួយគ្នា បើអត់ចុះទេច្រូតហើយមិនស្រួលខាតរាប់លាន » ។
ពលរដ្ឋរស់នៅស្រុកមង្គលបុរី ខេត្តបន្ទាយមានជ័យ អ្នកស្រី តឿង ប៊ុននឿង មានប្រសាសន៍ថា អ្នកស្រីបានប្រមូលផលស្រូវនឹងច្រូតលក់ទៅឲ្យឈ្មួញរួចរាល់ហើយ តែក្នុងតម្លៃមួយត្រឹមតែរួចខ្លួនប៉ុណ្ណោះ។
អ្នកស្រីតឿង ប៊ុននឿង៖ « ក្នុង១តោន៧៥០០បាត(ប្រមាណ៩សែនរៀល) ប្រសិនជាស្អាតយើងបានដល់៨ពាន់បាត(ជាង១លានរៀល) ដល់អត់ស្អាតវាបាន៧៥០០ ឬ៧ពាន់គត់ វាបីតម្លៃ។ […] មិនសល់ទេបានត្រឹមតែម៉ារួចខ្លួនឲ្យចំណេញ អត់បានទេ! ព្រោះយើងបានតែមួយហិកតា២តោន យើងបានតែម៉ារួចខ្លួនទេ ព្រោះជីប្រេងអីវាមិនចុះឯណា វាមានតែឡើង » ។
VOD មិនអាចទាក់ទងអ្នកនាំពាក្យក្រសួងពាណិជ្ជកម្ម លោក ស៊ាង ថៃ ឆ្លើយតបករណីនេះបាននៅឡើយទេ។
អ្នកនាំពាក្យក្រសួងកសិកម្ម លោក ស្រី វុឌ្ឍី មានប្រសាសន៍ប្រាប់ VOD កាលពីសប្ដាហ៍មុនថា ដោយបានបន្ទោសលើបញ្ហាទីផ្សារអន្តរជាតិបានចុះថ្លៃ ហើយប្រទេសឥណ្ឌាបានបញ្ចេញអង្ករច្រើនទៅលក់ ខណៈប្រទេសថៃ និងវៀតណាម ក៏ដល់រដូវប្រមូលផលផងដែរ។ លោកបន្ថែមថា នៅពេលនេះក្រសួងក៏កំពុងសិក្សា និងអាចមានវិធានការណ៍នាពេលខាងមុខផងដែរ។
លោកថា៖ « កន្លងមក វៀតណាមច្បាស់ជាមួយកិច្ចសន្យាហ្នឹង ដល់រដូវគេសម្រុកមកទិញតែម្ដង អញ្ចឹងយើងនេះវាធូរ អញ្ចឹងយើងនេះគ្រាន់បើបន្តិចទៅ! តែពេលនេះក្នុងខែនេះហាក់បីដូចជានៅទ្រឹង។ តែខ្ញុំគិតថា នៅពេលខាងមុខបន្តិចទៀតវៀតណាម ឬមួយក៏ខាងថៃចាប់ផ្ដើមទិញដោយសារតម្លៃនៅលើទីផ្សារអន្តរជាតិឡើងថ្លៃវិញ។ អញ្ចឹងគេទ្រឹងបន្តិចសិន ហើយនៅពេលទីផ្សារគេហក់ឡើងវិញបន្តិចប្រហែលជាមកទៀតហើយ » ។
អគ្គលេខាធិការសម្ព័ន្ធសហគមន៍កសិករកម្ពុជា លោក ថេង សាវឿន មានប្រសាសន៍ថា បញ្ហានេះអាចមកពីការសម្រេចចិត្តរបស់សហភាពអឺរ៉ុប ដែលយកពន្ធអង្ករពីកម្ពុជាដែលធ្វើឲ្យប៉ះពាល់ដល់ទំនុកចិត្តអ្នកវិនិយោគដែលទិញអង្ករពីកម្ពុជា ខណៈលោកបារម្ភថា វានឹងអាចធ្វើឲ្យកសិករជាប់បំណុលធនាគារ ឬមីក្រូហិរញ្ញវត្ថុកាន់តែលំបាកខ្លាំង។
លោកថា៖ « សម្រាប់ចំពោះមុខបន្ទាន់រដ្ឋត្រូវមានចំណាត់ការភ្លាមៗ អាចថា បញ្ចេញថវិកាជាតិដើម្បីទិញស្រូវពីពលរដ្ឋស្តុកទុក ក្នុងតម្លៃដែលសមរម្យដែលពលរដ្ឋអាចទទួលយកបាន។ បើមិនអញ្ចឹងទេ កសិករគឺកាន់តែប៉ះពាល់ធ្ងន់ធ្ងរទៅៗ ទៅលើផលលំបាកដែលគាត់កំពុងជួបប្រទះនេះ » ។
កាលពីថ្ងៃទី១៦ ខែមករា សហភាពអឺរ៉ុបបានសម្រេចយកពន្ធនាំចូលអង្ករពីកម្ពុជា។ ទាំង រដ្ឋាភិបាលកម្ពុជា និង អ្នកស្រាវជ្រាវចាត់ទុកដាក់សម្រេចនេះធ្វើឲ្យប៉ះពាល់តម្លៃស្រូវ និងជីវភាពកសិករ។
ឆ្នាំ២០១៨កន្លងទៅ កម្ពុជានាំចេញអង្ករបានជាង៦២ម៉ឺនតោន ថយចុះ ១,៥ភាគរយ បើធៀបទៅនឹងការនាំចេញក្នុងឆ្នាំ២០១៧ ជាង៦៣ម៉ឺនតោន ខណៈរដ្ឋាភិបាលបានបន្ទោសបញ្ហានេះទៅលើការប្រកួតប្រជែងនៅលើទីផ្សារអន្តរជាតិ៕
