អតីតចៅសង្កាត់រងសង្កាត់១មកពីអតីតបក្សសង្រ្គោះជាតិ និងមន្ត្រីសហភាពការងារកម្ពុជា ត្រូវបានតុលាការបានសម្រេចបញ្ជូនទៅឃុំខ្លួននៅពន្ធនាគារខេត្តបណ្តោះអាសន្នកាលពីល្ងាចម្សិលមិញនេះ ក្រោមការចោទប្រកាន់ពីបទបទបោះបង្គោលព្រំដីនៅលើដីតំបន់ការពាររបស់រដ្ឋ និងរារាំងការអនុវត្តច្បាប់របស់សមត្ថកិច្ច។
ភរិយាអតីតចៅសង្កាត់រងលោក ឆាយ រដ្ឋ គឺអ្នកស្រី សំ សារ៉ាត់ ថ្លែងទាំងអួលដើមករថា តុលាការសម្រេចចោទប្រកាន់ និងឃុំខ្លួនប្តីរបស់អ្នកស្រី និង មន្ត្រីសហភាពការងារកម្ពុជាមួយរូបទៀត នៅពន្ធនាគារខេត្តជាបណ្តោះអាសន្ន។
អ្នកយល់យល់ថា ករណីប្តីអ្នកស្រីជាការគុំគួនផ្នែកនយោបាយ ដោយថា ប្តីគាត់មានអតីតភាពជាមន្ត្រីជាប់ឆ្នោតបក្សប្រឆាំងនៅតំបន់នោះ ហើយថា ករណីនេះជារឿងអយុត្តិធម៌។
អ្នកស្រី សំ សារ៉ាត់ បន្តថា៖ «ប្តីបងអត់មានខុសសោះ ហើយមកចោទប្រកាន់។ វាមានយុត្តិធម៌នៅកន្លែងណា ប្រទេសហ្នឹង? វាអយុត្តិធម៌ពេក ព្រោះ អត់មានធ្វើអី អត់បានប្រើអំពើហិង្សា អត់បានទៅញុះញង់ អត់បានទៅប្រព្រឹត្តអីសោះ គ្រាន់តែឃើញហើយទៅជម្រាបសួរគេ លើកដៃជម្រាបសួរគេ បែរជាគេចាប់»។
អតីតចៅសង្កាត់រងសង្កាត់១ លោក ឆាយ រដ្ឋ និងមន្ត្រីសហភាពការងារកម្ពុជា លោក ទេព សុផា ត្រូវបានសមត្ថកិច្ចចាប់ខ្លួនកាលពីថ្ងៃទី ២១ មករា នៅលើទីតាំងមានជម្លោះដីធ្លីស្ថិតនៅតំបន់ក្បាលឆាយ។
ក្រោយការសាកសួរពីសំណាក់សមត្ថកិច្ច និងមន្ត្រីតុលាការរយៈពេល ៣ថ្ងៃរួចមក កាលពីល្ងាចម្សិលមិញ ព្រះរាជអាជ្ញាធររង លោក ហួត វិចិត្រ សម្រេចចោទប្រកាន់អ្នកទាំងពីរពីបទបោះបង្គោលព្រំដីនៅតំបន់ដីអនុក្រឹត្យរបស់រដ្ឋ និងរារាំងការអនុវត្តច្បាប់របស់សមត្ថកិច្ច ហើយចៅក្រមស៊ើបសួរ លោក គួន ចន្ថា សម្រេចឃុំខ្លួនអ្នកទាំងពីរជាបណ្តោះអាសន្ន។
អភិបាលខេត្តព្រះសីហនុ លោក យន្ត មីន មានប្រសាសន៍ថា ការចាប់ខ្លួនពលរដ្ឋពីរនាក់នោះ គឺជាការអនុវត្តច្បាប់ ដោយមិនជាប់ពាក់ព័ន្ធរឿងគណបក្សនយោបាយនោះទេ។
លោកមានប្រសាសន៍ថា៖ «គ្រាន់តែសំខាន់អញ្ចេះ ពួកខ្ញុំខិតខំអនុវត្តនូវការការពារតំបន់ក្បាលឆាយ ហើយគាត់ៗពាក់ព័ន្ធរឿងហ្នឹង។ អញ្ចឹងក៏គេឃាត់ខ្លួនគាត់ទៅ មិនពាក់ព័ន្ធរឿងគុំគួនអីទេ ដូចគាត់ថា ទេ»។
បន្ថែមពីនេះ រដ្ឋបាលខេត្តព្រះសីហនុនៅថ្ងៃនេះ ក៏បានចេញសេចក្តីប្រកាសព័ត៌មានមួយ ដោយអះអាងថា លោក ឆាយ រដ្ឋ និង លោក ទេព សុផា គឺមេក្លោងដែលបានដើរបំផុសបំផុល និងញុះញង់ ឱ្យពលរដ្ឋប្រមាណជិត ១០០នាក់ធ្វើសកម្មភាពពុះកញ្ជ្រោលប្រឆាំងការចុះអនុវត្តច្បាប់របស់អាជ្ញាធរកាលពីថ្ងៃទី២១ មករា។
មន្រ្តីសម្របសម្រួលសហភាពការងារកម្ពុជាប្រចាំខេត្តព្រះសីហនុ លោក អាន រ៉ាម៉ា មើលឃើញថា ការចាប់ខ្លួនមន្ត្រីរបស់លោក និងអតីតមន្ត្រីបក្សប្រឆាំង ជាការគំរាមកំហែងដល់ពលរដ្ឋដទៃ និងអយុតិ្តធម៌។ លោកថា ខាងសហជីពបានត្រៀមមេធាវីសម្រាប់តតាំងតាមផ្លូវច្បាប់ ដោយថា ដើម្បីស្នើសុំឱ្យតុលាការទម្លាក់ចោលការចោទប្រកាន់នេះ និងដោះលែងអ្នកទាំងពីរឱ្យបាននៅក្រៅឃុំផងដែរ។
លោកបន្ថែមថា៖ «សម្រាប់ខ្ញុំ យល់ឃើញថា ការបញ្ចប់ការសាកសួរ ហើយយកទៅឃុំខ្លួននេះ ហាក់បីដូចជាអយុត្តិធម៌ ពីព្រោះអីយើងមើលលើអង្គហេតុ និងសកម្មភាពជាក់ស្តែង គឺពួកគាត់អត់បានប្រព្រឹត្តបទល្មើសដូចការចោទនោះទេ។ តាមធម្មតា ដីនេះ ប្រជាពលរដ្ឋ រួមទាំងពួកគាត់ គឺបានទិញតពីអាជ្ញាធរមូលដ្ឋាន ដែលយើងមានឯកសារមានអី។ អញ្ចឹង ពួកគាត់ក៏ជាជនរងគ្រោះដែរ»។
ដោយឡែកមន្ត្រីសម្របសម្រួលសមាគមការពារសិទ្ធិអាដហុកនៅខេត្តព្រះសីហនុ អ្នកស្រី ជៀប សុធារី យល់ថា តុលាការគប្បីដោះលែងពួកគេឱ្យនៅក្រៅឃុំ ដោយថា តុលាការ និងអាជ្ញាធរត្រូវស៊ើបអង្កេតករណីនេះឱ្យបានច្បាស់ជាមុន ព្រមទាំងដោះស្រាយជម្លោះដីធ្លីតំបន់នោះឱ្យបានចប់។
អ្នកស្រីបន្ថែមថា៖ «ទាក់ទងនឹងការរារាំងអី ចង់ឱ្យមានការស៊ើបអង្កេត ប្រមូលព័ត៌មានឱ្យបានច្រើនជាងហ្នឹង ដោយសារតែពួកគាត់មានសាក្សីមានអី ហើយមិនត្រឹមតែមានសាក្សីទេ មានទាំងឃ្លីបវីដេអូទៀតណោះ។ ចង់ថា ឃ្លីបវីដេអូហ្នឹងមានអ្នកណាខ្លះ។ អត់មានឃើញវត្តមានអ្នកពីរនាក់ហ្នឹងនៅកន្លែងគេកាយហ្នឹងទេ។ ចង់និយាយអញ្ចឹង»។
អ្នកភូមិអះអាងថា ដីជាង ៩ហិកតា ត្រូវរដ្ឋាភិបាលសម្រេចកាត់ឆ្វៀលចេញពីតំបន់ការពារជូនពលរដ្ឋជាង ៣០០គ្រួសារ ប៉ុន្តែ ពលរដ្ឋថា អាជ្ញាធរវាស់ចែកឲ្យតែជាង ១០០គ្រួសារ ហើយនៅសល់ប្រមាណ ៥ហិកតា ដែលមានពលរដ្ឋ ២០០គ្រួសារទៀត អាជ្ញាធរមិនព្រមផ្តល់ជូនពួកគាត់ឡើយ៕
