សហភាពការងារកម្ពុជា ស្នើស្ថាប័នជាតិកំពូលៗ ជួយអន្តរាគមន៍រកយុត្តិធម៌ជូនពលរដ្ឋករណីដីធ្លីពីរនាក់ គឺមន្ត្រីសហភាពការងារកម្ពុជា លោក ទេព សុផា និងអតីតចៅសង្កាត់រងសង្កាត់១មកពីគណបក្សសង្រ្គោះជាតិលោក ឆាយ រដ្ឋ ដែលត្រូវបានតុលាការចោទប្រកាន់និងសម្រេចឃុំខ្លួន។
ក្នុងសេចក្តីថ្លែងការណ៍កាលពីល្ងាចថ្ងៃម្សិលមិញ សហភាពការងារកម្ពុជា សម្តែងការខកចិត្តជាខ្លាំងចំពោះចំណាត់ការរបស់អាជ្ញាធរ និងតុលាការខេត្តព្រះសីហនុ ដែលបានសម្រេចឃុំខ្លួនលោក ទេព សុផា និង លោក ឆាយ រដ្ឋ ដោយថាជារឿងអយុត្តិធម៌ ព្រោះពួកគេមិនបានប្រព្រឹត្តដូចការចោទប្រកាន់ទេ។
សហភាពការងារកម្ពុជា ស្នើឱ្យស្ថាប័នជាតិកំពូលៗ រួមមានស្ថាប័នរដ្ឋសភាជាតិ ស្ថាប័នឧត្តមក្រុមប្រឹក្សានៃអង្គចៅក្រម លោកនាយករដ្ឋមន្ត្រី ហ៊ុន សែន និងរដ្ឋមន្ត្រីក្រសួងមហាផ្ទៃ ដោយស្នើឱ្យស៊ើបអង្កេតសំណុំរឿងនេះឱ្យបានច្បាស់លាស់ និងរកយុត្តិធម៌ជូនជនរងគ្រោះ ដោយដោះលែងពួកគាត់ឱ្យមានសេរីភាពវិញ។ លើសពីនេះ ប្រភពដដែលស្នើឱ្យ ក្រសួងរៀបចំដែនដីនិង អាជ្ញាធរខេត្តដោះស្រាយ និងរកយុត្តិធម៌ជូនពលរដ្ឋរងគ្រោះដីធ្លីនៅតំបន់ក្បាលឆាយឱ្យបានឆាប់រហ័ស។
អ្នកសម្របសម្រួលសហភាពការងារកម្ពុជាប្រចាំខេត្តព្រះសីហនុ លោក អាន រ៉ាម៉ា មើលឃើញថា សមត្ថកិច្ច និងតុលាការហាក់មិនបានស៊ើបអងេ្កតករណីនេះឱ្យបានច្បាស់លាស់ទេ។ លោកថា ការចោទប្រកាន់នឹងឃុំខ្លួន មន្ត្រីរបស់លោក និងមន្ត្រីអតីតបក្សប្រឆាំង គឺធ្វើឱ្យប៉ះពាល់ដល់សេរីភាព និងជីវភាពរបស់ពួកគេ ។
លោក អាន រ៉ាម៉ា៖ «ហើយម្យ៉ាងវាប៉ះពាល់ដល់សិទ្ធិមនុស្ស ហើយនឹងការធ្វើខុសពីនីតិវិធី។ អីចឹងវាធ្វើជាគំរូមិនល្អ ក្នុងការអនុវត្តក្រោយៗទៀត ដែលអាចធ្វើឱ្យមានបញ្ហាប្រឈម រវាងពលរដ្ឋនឹងអាជ្ញាធរ»។
កាលពីថ្ងៃម្សិលមិញដែរ រដ្ឋបាលខេត្តព្រះសីហនុ បានចេញសេចក្តីប្រកាសព័ត៌មានមួយដោយអះអាងថា លោក ឆាយ រដ្ឋ និង លោក ទេព សុផា ជាមេក្លោងដើរបំផុសបំផុល និងញុះញង់ ឱ្យពលរដ្ឋប្រមាណជិត១០០នាក់ធ្វើសកម្មភាពពុះកញ្ជ្រោលប្រឆាំងការចុះអនុវត្តច្បាប់របស់ក្រុមការងារខេត្តកាលពីថ្ងៃទី២១ ខែមករា ទើបអាជ្ញាធរសម្រេចចាប់ខ្លួនពួកគេ ដើម្បីកសាងសំណុំរឿងបញ្ជូនទៅតុលាការតែម្តង។
អភិបាលខេត្តព្រះសីហនុ យន្ត មីន មានប្រសាសន៍ថា ការចាប់ខ្លួនអ្នកទាំងពីរ ដោយថា ពួកគេជាប់ពាក់ព័ន្ធការរំលោភដីធ្លីនៅតំបន់ក្បាលឆាយដែលអាជ្ញាធរកំពុងការពារ ហើយរឿងនេះលោកថាមិនមែនជារឿងនយោបាយទេ។
លោក យន្ត មីនបន្តថា៖ «បើសិនគាត់កុំពាក់ព័ន្ធរឿងហ្នឹង មាននរណាគេទៅធ្វើអីគាត់»។
មន្ត្រីផ្នែកអង្កេតជាន់ខ្ពស់ និងជាអ្នកនាំពាក្យសមាគមការពារសិទ្ធិមនុស្សអាដហុក លោក ស៊ឹង សែនករុណា មើលឃើញថា ករណីចាប់ខ្លួនអ្នកទាំងពីរ មានភាពមិនប្រក្រតី ហើយវិធានការនេះ ហាក់ឆ្ពោះទៅរកក្រុមបក្សប្រឆាំងទៀតផង។
លោកបន្ថែមថា៖ «រឿងទាំងអស់ ចង់ឱ្យមានការអនុវត្តច្បាប់មួយដ៏ត្រឹមត្រូវ ដើម្បីជាទំនុកចិត្ត ជាភាពកក់ក្តៅដល់ពលរដ្ឋទូទៅ ដោយកុំប្រកាន់នូវនិន្នាការនយោបាយ ឬក៏រើសអើងផ្នែកនយោបាយណាមួយឬទស្សនៈណាមួយឡើង។ យើងចង់ឱ្យមានការអនុវត្តច្បាប់មួយដ៏ត្រឹមត្រូវ កើតចេញពីការអនុវត្តច្បាប់ហ្នឹង កុំចំពោះទៅលើក្រុមណាមួយ»។
មន្ត្រីសហភាពការងារកម្ពុជា លោក ទេព សុផានិង អតីតចៅសង្កាត់រងសង្កាត់១ ក្រុងព្រះសីហនុមកពីគណបក្សសង្រ្គោះជាតិ លោក ឆាយ រដ្ឋ ត្រូវបានសមត្ថកិច្ចចាប់ខ្លួនកាលពីថ្ងៃទី ២១ ខែមករា នៅតំបន់ដីជម្លោះក្បាលឆាយ។
ពួកគេទាំងពីរនាក់ត្រូវបានតុលាការចោទប្រកាន់ពីបទ បោះបង្គោលព្រំដីបំណងកាន់កាប់ដីរបស់រដ្ឋជាកម្មសិទ្ធិ និងរារាំងការអនុវត្តច្បាប់របស់អាជ្ញាធរ ហើយចៅក្រមស៊ើបសួរសម្រេច ឃុំខ្លួនជាបណ្តោះអាសន្នកាលពីយប់ថ្ងៃទី ២៣ ខែមករា ៕