លោកនាយករដ្ឋមន្ត្រី ហ៊ុន សែន បានលើកឡើងថា យុទ្ធនាការថ្មីរបស់រដ្ឋាភិបាលក្នុងការជំរុញពាណិជ្ជកម្មនឹងធ្វើឲ្យអ្នកវិនិយោគកាន់តែមានទំនុកចិត្តលើរដ្ឋាភិបាលលោក បើទោះបីជាគ្មាន ឬមានប្រព័ន្ធអនុគ្រោះពន្ធក៏ដោយ។
ថ្លែងក្នុងពិធីជួបជាមួយកម្មករជាង១ម៉ឺននាក់នាព្រឹកនេះ លោកនាយករដ្ឋមន្ត្រី ហ៊ុន សែន បានលើកឡើងថា ក្នុងអាណត្តិនេះ រដ្ឋាភិបាលលោកនឹងលុបចោលអង្គភាពរដ្ឋណាដែលមិនចាំបាច់ចេញពីរចនាសម្ព័ន្ធគ្រប់គ្រង ដើម្បីសម្រួលដល់វិស័យពាណិជ្ជកម្ម និងអ្នករកស៊ីនៅកម្ពុជា។ លោកបន្ថែមថា តាមរយៈវិធានការថ្មីនេះនឹងធ្វើឲ្យធុរជនកាន់តែមានទំនុកចិត្តក្នុងការធ្វើពាណិជ្ជកម្មនៅកម្ពុជាបន្ថែមទៀត។
លោកថា៖ « ធ្វើឲ្យគេចង់មកវិនិយោគ ហើយអ្នកនៅស្រុកខ្មែរគឺគេនឹងនឹងនរចិត្ត គេដឹងថា បើសិនជាមានបញ្ហាស្អីកើតឡើង គឺគេនៅតែមានលទ្ធភាពមានប្រាក់ចំណេញ ហើយបើគ្មានអីកើតឡើងទេគេកាន់តែមានប្រាក់ចំណេញ។ ហើយប្រាក់ចំណេញនេះមួយផ្នែកនឹងត្រូវបានក្លាយជាប្រាក់រង្វាន់ឬក៏ដំឡើងបៀវត្សឲ្យកម្មកររបស់យើង ទាំងអស់នេះសុទ្ធតែជារបៀបវារៈដែលត្រូវធ្វើនៅក្នុងអាណត្តិនេះ » ។
យុទ្ធនាការថ្មីនេះលោក ហ៊ុន សែន បានលើកឡើងថា ស្ថាប័ននាំផ្លូវនាវាចរនៅកម្ពុជាកាំសាប គឺត្រូវលុបចេញនៅក្នុងអាណត្តិនេះ ចំណែកកាំកុងត្រូលនឹងត្រូវដកចេញពីព្រំដែន លើសពីនេះការិយាល័យរដ្ឋបាលនៅតាមស្រុកមួយចំនួនក៏ត្រូវលុបចេញផងដែរ។
លោកថា៖ « នៅពេលខាងមុខនឹងលុបចោលការិយាល័យក្រសួងមួយចំនួននៅថ្នាក់ស្រុកតែម្ដង លុបចោលហ្មង របស់ដែលត្រូវទុក តំបន់ត្រូវប្រតិបត្តិការគឺផ្នែកកងទ័ពត្រូវទុក នគរបាលត្រូវទុក ខាងសុខាភិបាលត្រូវទុក អប់រំត្រូវទុក រៀបចំដែនដីត្រូវទុក ព្រោះអាហ្នឹងវាសំខាន់! គ្រប់គ្រងដីធ្លី ព្រោះមានជម្លោះច្រើនណាស់ដែលក្រៅពីនោះរៀបចំជាកញ្ចប់របស់វា » ។
អ្នកវិភាគសេដ្ឋកិច្ច លោក ង៉ែត ជូ យល់ស្របទៅនឹងគំនិតផ្ដួចផ្ដើមនេះ តែលោកថា វិធានការនាពេលនេះហាក់ដូចជាភ្លាមៗពេកដែលត្រូវការពេលដើម្បីឲ្យមានប្រសិទ្ធភាព។
លោកថា៖ « វិធានការនេះរាងដូចជាបន្ទាន់ពេក អញ្ចឹងទំនុកចិត្ត វាអាស្រ័យលើវិធានការជាក់ស្តែងក្នុងការចាត់ឲ្យមានប្រសិទ្ធភាព អញ្ចឹងចាំមើលទៅមុនទៀត ប្រសិនជាកើតដូចជាអ្វីដែលថ្នាក់ដឹកនាំមានប្រសាសន៍មែនរឿងហ្នឹង វាបង្ហាញពីសញ្ញាវិជ្ជមាន ហើយធម្មតាការកសាងទំនុកចិត្តវាមិនអាចកសាងបានក្នុងរយៈពេលខ្លីទេវាត្រូវការរយៈពេលច្រើន » ។
កាលពីដើមសប្ដាហ៍នេះ សភាពាណិជ្ជកម្មកម្ពុជា និងមេដឹកនាំសភាពពាណិជ្ជកម្មអឺរ៉ុបប្រចាំកម្ពុជា បានដាក់លិខិតមួយច្បាប់ផ្ញើទៅកាន់ស្នងការពាណិជ្ជកម្មអឺរ៉ុបដោយ សម្ដែងការព្រួយបារម្ភពីឥទ្ធិពលនៃការដកប្រព័ន្ធអនុគ្រោះពន្ធ EBA ទៅលើ វិស័យពាណិជ្ជកម្ម និងពលរដ្ឋកម្ពុជា៕