រដ្ឋមន្ត្រីក្រសួងមហាផ្ទៃ បានឱ្យដឹងថាការ រៀបចំឡើងវិញនូវរចនាសម្ព័ន្ធ និងប្រព័ន្ធគ្រប់គ្រងនៅថ្នាក់ក្រុង-ស្រុក ដើម្បីធានាការលើកកម្ពស់ប្រសិទ្ធភាពការងារ និងកាត់បន្ថយបន្ទុកចំណាយ។
ក្នុងលិខិតរដ្ឋមន្ត្រីក្រសួងមហាផ្ទៃ ផ្ញើរជូនលោកនាយករដ្ឋមន្ត្រី លោក ហ៊ុន សែន កាលពីថ្ងៃទី១៥ ខែមករា ឱ្យដឹងថា ក្រសួងសម្រេចលុបចោលការិយាល័យជំនាញរបស់ក្រសួង ស្ថាប័ននៅថ្នាក់ស្រុក-ក្រុង ដោយធ្វើសមាហរណកម្មការិយាល័យជំនាញទៅក្នុងរចនាសម្ព័ន្ធគ្រប់គ្រងរបស់រដ្ឋបាលក្រុងស្រុក ដោយថាបង្កើតជាអង្គភាព ឬ ការិយាល័យចង្កោមវិស័យជំនួសវិញ។
ចង្កោមវិស័យទាំងនោះ ដូចជាវិស័យសេដ្ឋកិច្ច និងវិស័យសង្គមកិច្ច ដោយថា ដើម្បីធានាការកាត់បន្ថយបន្ទុកចំណាយនិងពង្រឹងរចនាសម្ព័ន្ធស្ថាប័ន ដោយលើកលែងតែវិស័យអាទិភាពមួយចំនួន ដូចជាវិស័យអប់រំ សុខាភិបាល និងនគរោបនីយកម្ម ដែលចាំបាច់ត្រូវបង្កើតជាអង្គភាពដាច់ដោយឡែកៗពីគ្នា។
ក្នុងពិធីជួបសំណះសំណាលជាមួយកម្មករ នៅខេត្តកំពតកាលពីថ្ងៃទី ២៥ ខែមករា លោក ហ៊ុន សែន ថ្លែងថា នៅពេលខាងមុខការិយាល័យរបស់ក្រសួងមួយចំនួននៅតាមស្រុកនឹងត្រូវលុបចោល ហើយរៀបចំជាកញ្ចប់វិញ ដោយទុកតែការិយាល័យអាទិភាពប៉ុណ្ណោះ។
លោក ហ៊ុន សែន បន្តថា ៖ « នៅពេលខាងមុខនឹងលុបចោលការិយាល័យនៃអង្គភាពនៅក្រសួងមួយចំនួន នៅថ្នាក់ស្រុកតែម្ដង។ របស់ដែលត្រូវទុកតំបន់ប្រតិបត្តិការ គឺផ្នែកកងទ័ព ទុក នគរបាលត្រូវទុក ខាងសុខាភិបាលត្រូវទុក អប់រំត្រូវទុក រៀបចំដែនដីត្រូវទុក ព្រោះអាហ្នឹង វាសំខាន់គ្រប់គ្រង់ដីធ្លី កើតទំនាស់ច្រើនណាស់ ក្រៅពីនោះយកមករៀបចំ ជាកញ្ចប់របស់វា»។
នាយកប្រតិបត្តិសម្ព័ន្ធគណនេយ្យសង្គមកម្ពុជា លោក សន ជ័យ មើលឃើញថា វាមិនមែនជាការលុបចោលការិយាល័យទេ តែជាការបង្រួមនិងកាត់បន្ថយការចំណាយបានតិចតួចប៉ុណ្ណោះ។ លោកគាំទ្រវិធានការនេះ ដោយថា ដល់ពេលដែលត្រូវប្រមូលមន្ត្រីជំនាញមកធ្វើការរួមគ្នានៅកម្រិតស្រុក ត្បិតការិយាល័យខ្លះគ្មានការងារធ្វើ និងគ្មានសកម្មភាពនោះទេ ។
លោកថា វិធានការនេះនឹងអាចមានប្រសិទ្ធភាព ប្រសិនបើមានការពង្រឹងសមត្ថភាពការងារថ្មីដល់មន្ត្រីជំនាញទាំងនោះ និងផ្តល់ថវិកាដល់ថ្នាក់ស្រុកបន្ថែមទៀត។
លោកបន្តថា៖ «សំខាន់គឺត្រូវផ្អែកលើមូលដ្ឋានពីរ។ ទី ១ ការពង្រឹងសមត្ថភាពជាមួយនឹងការងារថ្មីរបស់មន្ត្រីនៅកម្រិតស្រុក ដែលយើងចង់ឃើញពួកគេមានសមត្ថភាពពេញលេញ។ ទីពីរ គឺរឿងធនធានតែម្តង ការផ្ទេរមុខងារ ទៅថ្នាក់ស្រុក និងការច្របាច់បញ្ចូលគ្នា នូវមន្ត្រីចម្រុះនេះ ថាតើ ពួកគេមានជំនាញហើយ ពួកគេមានធនធានគ្រប់គ្រាន់សម្រាប់បំពេញការងារដែរឬទេ»។
នៅដើមឆ្នាំ២០១៩នេះ រដ្ឋាភិបាលបានសម្រេចលុបចេញស្ថាប័នមួយចំនួន ដូចជាកាំកុងត្រូលត្រូវដកចេញពីព្រំដែន ដកចេញស្ថាប័ននាំផ្លូវនាវាចរនៅកម្ពុជាហៅកាំសាប និង ប្រកាសលុបការិយាល័យរដ្ឋបាលនៅតាមស្រុកមួយចំនួនផងដែរ។
លោក ហ៊ុន សែន ធ្លាប់អះអាងថា យុទ្ធនាការថ្មីទាំងនេះ ដើម្បីបង្កើនសេដ្ឋកិច្ចជាតិ នឹងធ្វើឲ្យអ្នកវិនិយោគកាន់តែមានទំនុកចិត្តលើរដ្ឋាភិបាល បើទោះបីជាគ្មាន ឬមានប្រព័ន្ធអនុគ្រោះពន្ធក៏ដោយ៕
