អ្នកនាំពាក្យគណបក្សប្រជាជនកម្ពុជា លោក សុខ ឥសាន ថ្លែងថា មិនមានច្បាប់ណាហាមឃាត់កងទ័ពមិនឲ្យធ្វើនយោបាយទេ ដោយថាកងទ័ពក៏ជាពលរដ្ឋដែរ។
ការលើកឡើងរបស់លោក សុខ ឥសាន បែបនេះ ធ្វើឡើងក្រោយពេលក្រុមយោធាប្រកាសគាំទ្ររដ្ឋាភិបាលដែលដឹកនាំដោយលោកនាយករដ្ឋមន្រ្តី ហ៊ុន សែន និងត្រៀមខ្លួនចាត់វិធានការចំពោះលោក សម រង្ស៊ី តាមអំណាចសាលដីការរបស់តុលាការ។
អ្នកនាំពាក្យគណបក្សកាន់អំណាចរូបនេះ បានសរសេរតាមបណ្តាញទំនាក់ទំនងសង្គមកាលពីម្សិលមិញយ៉ាងដូច្នេះថា៖ «គ្មានច្បាប់ណាហាមឃាត់មិនឲ្យកងទ័ពមានសិទ្ធិខាងនយោបាយទេ ពីព្រោះកងទ័ពក៏ជាពលរដ្ឋដែរ។ ច្បាប់បោះឆ្នោតអនុញ្ញាតឲ្យកងកម្លាំងប្រដាប់អាវុធធ្វើនយោបាយបានតែក្នុងសកម្មភាពនយោបាយ មិនត្រូវប្រដាប់អាវុធពាក់ឯកសណ្ឋាននិងប្រើប្រាស់សម្ភាររដ្ឋតែប៉ុណ្ណោះ»។
អតីតតំណាងរាស្ត្រគណបក្សសង្គ្រោះជាតិ លោក គីមសួរ ភិរិទ្ធ មានប្រសាសន៍ថា មិនថាតែកងទ័ពទេ ទោះជាព្រះសង្ឃក៏មានសិទ្ធិធ្វើនយោបានដែរ ព្រោះជាប្រជាពលរដ្ឋ ប៉ុន្តែកុំយកតួនាទីទៅប្រើប្រាស់។
លោក គីមសួរ ភិរិទ្ធ ឲ្យដឹងថាថា៖ «មានអីពិបាកទេអូន មើលតែច្បាប់ស្តីពីកងទ័ពទៅ ហើយនិងរដ្ឋធម្មនុញ្ញចែងទៅដឹងហើយថា កងទ័ពគឺជាក្រុមប្រដាប់អាវុធអព្យាក្រឹត មិនប្រកាន់បក្សនយោបាយណាទេ! ប៉ុន្តែបើកងទ័ពចង់ធ្វើនយោបាយទាល់តែយើងដោះសំលៀកបំពាក់ចេញទៅ កាលណាតែយើងនិយាយថាកងទ័ពជារបស់គណបក្សហើយ ចប់ហើយ! ប្រទេសហ្នឹងគឺប្រទេសផ្តាច់ការ ប្រទេសយោធានិយមហើយ!»។
អ្នកជំនាញច្បាប់ លោក មេធាវី សុក សំអឿន មានប្រសាសន៍ថា នេះជាការលើកឡើងត្រឹមត្រូវ ព្រោះនៅប្រទេសកម្ពុជាមិនមានច្បាប់ហាមពិតមែន។ ប៉ុន្តែ លោកថា បើតាមគោលការណ៍ប្រជាធិបតេយ្យគឺចង់ឲ្យកងទ័ពឯករាជ្យ។
លោក សុក សំអឿន មានប្រសាសន៍ថា៖ «បើសិនជាមានការតែងតាំងតាមខ្សែបក្ស ហ្នឹងទី១! អូខេ? ទី២ បើសិនជាចូលរួមឃោសនានយោបាយបក្ស ប្រសិនជាមានការបង់ថវិកាដើម្បីជួយបក្សឬក៏ជួយការឃោសនាបក្ស អាហ្នឹងសួរថា តើឯករាជ្យឬអត់?»។
លោក សម រង្ស៊ី កាលពីថ្ងៃទី២៥ ខែមករា ឆ្នាំ២០១៩ បានប្រកាសតាមរយៈបណ្ដាញសង្គមហ្វេសប៊ុករបស់ខ្លួន អំពីគម្រោងត្រលប់ចូលកម្ពុជាវិញនាពេលខាងមុខ ដោយថាអាចមានប្រជាពលរដ្ឋនិងអ្នកគាំទ្រជាច្រើននាក់ត្រៀមទៅទទួលរូបលោក។ លោក សម រង្ស៊ី ក៏បានអំពាវនាវទៅកងកម្លាំងប្រដាប់អាវុធ កុំឲ្យស្ដាប់តាមបញ្ជាលោក ហ៊ុន សែន និងកុំបាញ់ប្រជាពលរដ្ឋស្លូតត្រង់ ហើយជំរុញពួកគេឲ្យឈរខាងប្រជាពលរដ្ឋ ដើម្បីទាមទារសេរីភាព និងយុត្តិធម៌៕