អាជ្ញាធរខេត្តមណ្ឌលគិរី អះអាងថា កំពុងធ្វើការស្រាវជ្រាវករណីខ្មាន់កាំភ្លើងបាញ់កម្លាំងសមត្ថកិច្ចចម្រុះពេលចុះបំពេញការងារនៅតំបន់ដែនជម្រកសត្វព្រៃស្រែពក ដែលបណ្តាលឲ្យមន្ត្រីឧទ្យានុរក្សម្នាក់រងរបួសធ្ងន់។
ស្នងការនគរបាលខេត្តមណ្ឌលគិរី លោក ឡោ សុខា បានប្រាប់ VOD នៅព្រឹកនេះថា លោកកំពុងដឹកនាំការស៊ើបអង្កេតរឿងនេះ។
លោក ឡោ សុខា មានប្រសាសន៍ថា៖ «ខ្ញុំកំពុងធ្វើ! ឈានដល់កម្រិតណាអាហ្នឹងខ្ញុំមិនអាចជម្រាបជូនបានទេ ព្រោះខ្ញុំត្រូវកំណត់មុខសញ្ញាអីមួយ ខ្ញុំមិនអាចធ្វើឲ្យបែកខ្ចរខ្ចាយបានទេ។ កំពុងដុតដៃដុតជើងស្រាវជ្រាវ! ខ្ញុំដឹកនាំផ្ទាល់ធ្វើតើរឿងហ្នឹង!»។
តាមការចុះផ្សាយលើគេហទំព័រនរគបាលជាតិ ក្រុមមន្ត្រីឧទ្យានុរក្ស កាលពីព្រឹកម្សិលមិញ បានសហការជាមួយកម្លាំងនគរបាល យោធា និងមន្ត្រីការពារសត្វព្រៃ សរុបមានគ្នាមានគ្នា៦នាក់ ចេញល្បាតនៅត្រង់ចំណុចអូររ៉ូវេ ក្នុងតំបន់ត្រពាំងកកោះ ឃុំស្រែហ៊ុយ ស្រុកកោះញែក។ ប្រភពពដដែលឲ្យដឹងថា ពេលនោះក្រុមសមត្ថកិច្ចបានឃាត់ខ្លួនបុរសម្នាក់សង្ស័យដឹកសត្វព្រៃខុសច្បាប់ ស្រាប់តែមានការបាញ់ស្រោចមកលើពួកគេតែម្ដង។ ការបាញ់ប្រហារនេះ បានបណ្ដាលឲ្យមន្ត្រីឧទ្យានុរក្សម្នាក់រងរបួសធ្ងន់។ ជនរងគ្រោះពេលនេះ កំពុងសម្រាកព្យាបាលនៅមន្ទីរពេទ្យកាលម៉ែត្ររាជធានីភ្នំពេញ។
