កីឡាករប្រដាល់ដ៏ល្បីមួយរូបបានសម្រេចចិត្តបោះបង់ការប្រកួតលើសង្វៀនជាងបីឆ្នាំ ដោយសារតម្លៃខ្លួនក្នុងការប្រកួតមិនអាចទ្រទ្រងជីវភាពរស់នៅប្រចាំថ្ងៃ ហើយបានប្រកបរបរជាព្រូរថយន្តតាក់ស៊ីវិញ។
កីឡាករវ័យក្មេង កៀន ធារ៉ា បានធ្វើឲ្យអ្នកស្នេហាកីឡាប្រដាល់ផ្ដោតការចាប់អារម្មណ៍គួរឲ្យកត់សម្គាល់ កាលពី៣ឆ្នាំមុន ដោយសារតែគេទើបតែហ្វឹកហាត់ ប៉ុន្តែមានសមត្ថភាពប្រកួតបានល្អ ដោយធ្លាប់មានប្រវត្តិវាយឲ្យកីឡាករចាស់វស្សាមួយចំនួនបាក់មុខលើរេញនោះផង។ ក្រោយមក កីឡាកររូបនេះបានបាត់មុខមួយរយៈ ដែលធ្វើឲ្យអ្នកគាំទ្រមានការងើយឆ្ងល់។
កីឡាករ កៀន ធារ៉ា បានបង្ហាញមុខជាថ្មីក្នុងការប្រកួតមិត្តភាព កាលពីថ្ងៃទី២ ខែកុម្ភៈ ក្នុងព្រឹត្តិការណ៍ TV5 Knock Out Series By K-Cement នៅលើសង្វៀនទូរទស្សន៍ប៉ុស្តិ៍លេខ៥ ព្រមជាមួយនឹងការសារភាពពីការបាត់មុខលើសង្វៀនមួយរយៈ។ លោកអះអាងថា ប្រដាល់កន្លងមកមិនអាចឲ្យលោកចិញ្ចឹមខ្លួនបាន ទើបរត់ទៅធ្វើជាព្រូឡានអស់៣ឆ្នាំ។
កីឡាករ កៀន ធារ៉ា បានមានប្រសាសន៍ថា ការប្រកួតរបស់លោកកាលពី៣ឆ្នាំមុន បើទោះជាមានទីផ្សារឡើងរេញគួរសម ប៉ុន្តែ តម្លៃខ្លួនដែលលោកទទួលបានក្រោយការទូទាត់ឲ្យអ្នកផ្គូរផ្គង ជូនគ្រូបង្វឹក និងអ្នកឲ្យទឹករួចរាល់គឺសល់មិនច្រើនទេ។ ស្របគ្នាដែលលោកមិនមានការងារខាងក្រៅការប្រដាល់ផង ទើបសម្រេចចិត្តបន្ថែមអាជីពជាអ្នករកម៉ូយដាក់រថយន្តតាក់ស៊ី និងជាព្រូតាក់ស៊ី។ មុខរបរនៅក្នុងពេលនោះ លោកថា មិនមែនចង់ធ្វើដើម្បីបញ្ចប់អាជីពការប្រដាល់នោះទេ ប៉ុន្តែដោយសារតែការធ្វើជាព្រូរថយន្តអត់មានម៉ោងកំណត់ ហើយត្រូវចុះឡើងតាមខេត្តរហូតមិនអាចឲ្យលោកហ្វឹកហាត់បង្កើនសមត្ថភាពបាន ទើបលោកសម្រេចចិត្តឈប់ទទួលឡើងរេញតែម្ដង។
កីឡាករ កៀ ធារ៉ា បានបន្តថា លោកទើបតែសម្រេចចិត្តត្រលប់មកកាន់ការប្រកួតជាថ្មីដោយសារតែលោកទើបតែរកការងារបានធ្វើជាអ្នកលើកដាក់ឥវ៉ាន់ និងយាមឃ្លាំងមួយនៅម្ដុំបឹងទំពុនដែលអាចឲ្យលោកមានពេលហ្វឹកហាត់ខុសពីពេលធ្វើព្រូឡានមុននេះប៉ុណ្ណោះ។
លោកបានមានប្រសាសន៍ថា៖ «បាត់មុខ៣ឆ្នាំហ្នឹង ខ្ញុំទៅធ្វើព្រូឡាន តែឡូវខ្ញុំបានការងារធ្វើនៅក្នុងឃ្លាំងមួយហើយ ទើបខ្ញុំត្រលប់មកវិញ ព្រោះរំពឹងថា ធ្វើការនៅនោះគ្រាន់ៗទប់ទៅ ដល់ពេលប្រដាល់ គឺយើងបានសល់លុយ!»។
បើទោះជាការបង្ហាញខ្លួនជាថ្មីនៅ បានធ្វើអោយលោកបរាជ័យក្នុងទឹកទី២ ក្រោមដៃកីឡាករបង្គោលខៀវ ឆោម ប៊ុនឡុង តែលោកប្រកាសថា មិនមែនជារឿងត្រូវបាក់ទឹកចិត្តនោះទេ។ លោកថា ឆោម ប៊ុនឡុង មិនត្រឹមតែជាកីឡាករដែលមានសន្ទុះនាពេលបច្ចុប្បន្នប៉ុណ្ណោះទេ ប៉ុន្តែក៏ជាគ្រូបង្វឹកមួយរូបប្រចាំក្លិបមួយនៅខេត្តសៀមរាប ដែលជាក្លិបគេជ្រកកោននោះផង។
កីឡាករ កៀ ធារ៉ា បានលើកឡើងថា ការប្រកួតកាលពីថ្ងៃទី២ ខែកុម្ភៈ នៅប៉ុស្ដិ៍លេខ៥ លោកកាន់តែរុល កីឡាករជាគូប្រកួតកាន់តែវាយសម្រុក អញ្ចឹងហើយ ទើបលោកត្រូវសន្លប់ក្នុងពេលប្រថុយវាយខ្លាំង ដោយត្រូវគូប្រកួតវាយចំគោលដៅបណ្ដាលឲ្យចុកឆ្អល់ក្រោកលែងរួច។ លោកនៅតែប្រកាសថា មិនបាក់ទឹកចិត្តនឹងលទ្ធផលដែលបានស្ដែងឡើងក្នុងពេលសម្រេចចិត្តវិលជាន់សង្វៀននេះទេ ដោយលោកបានចាត់ទុកថានឹងផ្ដើមពីសូន្យឡើងវិញ ហើយរំពឹងថា ការប្រកួតលើកក្រោយៗនឹងធ្វើឲ្យលោកទទួលបានលទ្ធផលល្អ។
លោក សេង កដិកា បានទទួលស្គាល់ថា ៣ឆ្នាំមុនកីឡាករ កៀន ធារ៉ា គឺជាកីឡាករល្អម្នាក់នៅលើសង្វៀន តែដោយសារតែគេមិនបានប្រកួត និងមិនបានហ្វឹកហាត់ច្រើនឆ្នាំ ទើបធ្វើឲ្យដៃជើងស្ទក់ៗ ហើយបើនិយាយពីសាច់ដុំវិញ គឺអាចមិនទាន់ឲ្យវាយរស់រវើកបាន។ លោកថា លទ្ធផលសន្លប់ក្នុងទឹកទី២ ក្រោមដៃគូប្រកួតមិនមែនជារឿងភ្ញាក់ផ្អើលទេ ជាពិសេសសម្រាប់កីឡាករដែលមិនបានឡើងសង្វៀនយូរ ហើយមកត្រូវប្រកួតជាមួយកីឡាករឡើងស្ទុះដែលល្អម្នាក់ដូចជាកីឡាករ ឆោម ប៊ុនឡុង។
លោក សេង កដិកា បានបន្ថែមថា កីឡាករ កៀន ធារ៉ា ត្រូវការការប្រកួតមិនលើសពី៥ទៅដប់ប្រកួតទៀតទេ នឹងរស់រវើកសាច់ដុំឡើងវិញ ហើយស្រួលមិនស្រួលអាចនឹងល្អជាងមុនផង បើគេពិតជាមានការតាំងចិត្តខ្ពស់ក្នុងការហ្វឹកហាត់៕
