មន្ត្រីជាន់ខ្ពស់កងរាជអាវុធហត្ថ អះអាងថា មន្ត្រីកងរាជអាវុធហត្ថម្នាក់នៅខេត្តព្រះសីហនុ ត្រូវបានក្រុមស៊ើបអង្កេត សម្រេចដកបញ្ឈរជើង និងដាក់ឲ្យស្ថិតនៅក្រោមការស៊ើបអង្កេត ពាក់ព័ន្ធនឹងការបង្ក្រាបដ៏ហិង្សាទៅលើក្រុមពលរដ្ឋមានជម្លោះដីធ្លីនៅក្នុងខេត្តនេះកាលពីខែមុន។
អ្នកនាំពាក្យកងរាជអាវុធហត្ថលើផ្ទៃប្រទេស លោក អេង ហ៊ី បានប្រាប់វីអូឌីតាមទូរស័ព្ទនៅថ្ងៃនេះថា ក្រោយចុះស៊ើបអង្កេតករណីហិង្សានៅខេត្តព្រះសីហនុ គណៈកម្មការចំពោះកិច្ចរបស់កងរាជអាវុធហត្ថ បានរកឃើញមន្ត្រីកងរាជអាវុធហត្ថម្នាក់ ជាប់ពាក់ព័ន្ធការប្រើប្រាស់ហិង្សាលើពលរដ្ឋ។
អ្នកនាំពាក្យរូបនេះ បានឲ្យដឹងទៀតថា មន្ត្រីប៉េអឹមរូបនោះ ក៏ត្រូវបានបញ្ជាការកងរាជអាវុធហត្ថខេត្ត ដកបញ្ឈរជើង និងស្ថិតក្រោមការត្រួតពិនិត្យផងដែរ។
មន្ត្រីប៉េអឹមរូបនោះ លោក អេង ហ៊ី បានបញ្ជាក់បន្ថែមថា នឹងមានការស៊ើបអង្កេតដាច់ដោយឡែកមួយទៀត ទៅលើករណីបាញ់បោះដែលបង្កឱ្យមានពលរដ្ឋរបួសផងដែរ ដោយលោកថា ឱ្យតែមានការជាប់ពាក់ព័ន្ធ គឺត្រូវអនុវត្តតាមច្បាប់ទាំងអស់។
លោកបន្តថា៖ «អញ្ចឹង ជំហានដំបូង យើងព្យួរការងារគាត់ ហើយយកមកត្រួតពិនិត្យហ្នឹង។ អាហ្នឹង ជាវិន័យរបស់កងទ័ពហើយ ហើយបើសិនមានកំហុសលើសហ្នឹងទៀត អាហ្នឹងយើងអនុវត្តទៅតាមច្បាប់។ យើងកំពុងធ្វើកោសល្យវិច័យអាវុធដែលប្រើប្រាស់នៅពេលនោះ គឺ ៦ដើមហ្នឹង។ យើងប្រើប្រាស់ពាក់ព័ន្ធជាមួយហ្នឹងក្បាលគ្រាប់ តើគ្រាប់កាំភ្លើងដែលពួកគាត់ប្រើហ្នឹង មានបាញ់ចេញអត់ ហើយមួយទៀត ខាងចំពោះកិច្ចក៏បានទៅធ្វើលិខិតស្នើសុំទៅខាងមន្ទីរពេទ្យ ដើម្បីឱ្យក្បាលគ្រាប់ហ្នឹងមកដើម្បីយើងធ្វើកោសល្យវិច័យ»។
អ្នកជំនាញផ្នែកច្បាប់ លោក មេធាវី សុក សំអឿន មានប្រសាសន៍ថា ប្រសិនបើរកឃើញថា អំពើប្រព្រឹត្តរបស់មន្ត្រីកងរាជអាវុធហត្ថរូបនោះ ជាបទល្មើសព្រហ្មទណ្ឌ ដោយបង្កឱ្យមានពលរដ្ឋរបួសស្នាម ឬ ស្លាប់ ក្រៅពីពិន័យរដ្ឋបាល គឺត្រូវមានទោសទណ្ឌ ផ្នែករដ្ឋប្បវេណី និងជាប់ពន្ធនាគារទៀតផង។
លោកបន្តថា៖ «ពីព្រោះអាហ្នឹងយើងមើលទៀត ថាតើការប្រើកម្លាំងហ្នឹងវាសមស្របឬអត់? ប្រសិនបើវាមិនមែនជាការការពារខ្លួនទេ វាទៅជាការប្រើអំពើហិង្សាឬ អំពើហិង្សាទៅលើប្រជាជន ហ្នឹងវាត្រូវមានទោសប្រើអំពើហិង្សាហើយ។ ប្រសិនមានរបួសអាហ្នឹងវាមានទោសពីបទបង្ករបួសស្នាម ហើយបើសិនជារហូតដល់ស្លាប់ឬពិការ អាហ្នឹងវាមានស្ថានទម្ងន់ថែមទៀត »។
កាលពីថ្ងៃទី២៤ ខែមករា សមត្ថកិច្ចចម្រុះខេត្តព្រះសីហនុដឹកនាំដោយព្រះរាជអាជ្ញា ហួត វិចិត្រ និងអភិបាលរងខេត្ត លោក ផៃ ប៊ុនវណ្ណៈ បានចុះអនុវត្តសាលដីការបស់តុលាការកំពូល វាស់វែងដីឲ្យអ្នកស្រី ហុង សួន ដែលជាភរិយារបស់ឧកញ៉ា ស៊ីវ គង់ទ្រីវ ស្ថិតភូមិគគីរ ឃុំបិតត្រាំង ស្រុកព្រៃនប់ ប៉ុន្តែ ត្រូវបានអ្នកភូមិរាប់រយនាក់តវ៉ាប្រឆាំងនឹងការចុះអនុវត្តនោះ ដោយនាំគ្នាដុតកង់ឡានបិទផ្លូវរហូតផ្ទុះអំពើហិង្សា។
ក្នុងហេតុការណ៍ប៉ះទង្គិចគ្នានោះ គឺពលរដ្ឋម្នាក់ដែលជាកម្មករសំណង់ បានត្រូវគ្រាប់កាំភ្លើងពីក្រោយត្រង់ស្មាពីខាងឆ្វេងបៀមជាប់ឆ្អឹងខ្នង និងពលរដ្ឋ៦នាក់ផ្សេងទៀតត្រូវបានសមត្ថកិច្ចឃាត់ខ្លួនបណ្តោះអាសន្ន ហើយដោះលែងវិញនៅយប់ថ្ងៃដដែល។
ដោយឡែកវីដេអូ ដែលថតក្នុងហេតុការណ៍នោះដែរ បានបង្ហាញពីពលរដ្ឋម្នាក់ជាប់ខ្នោះដៃព័ទ្ធទៅក្រោយ ហើយត្រូវបានទាហានម្នាក់វាយនឹងកាំភ្លើងវែង ហើយពលរដ្ឋដដែលក៏ត្រូវបានមន្ត្រីកងរាជអាវុធហត្ថម្នាក់មកជាន់ពីលើ ខណៈលោកជាប់ខ្នោះដៃ ព័ទ្ធមកក្រោយ និងកំពុងដេកផ្អាប់មុខទៅលើដីហើយនោះ៕
