មេធាវីការពារក្តីឱ្យលោក រ៉ាត់ រត្នមុនី បានឲ្យដឹងថា លោកគ្រោងដាក់បណ្ដឹងសារទុក្ខទៅតុលាការកំពូលនៅថ្ងៃស្អែកនេះ ដើម្បីបន្តទាមទារឲ្យកូនក្ដីរបស់លោកបានស្ថិតនៅក្រៅឃុំ បន្ទាប់ពីតុលាការថ្នាក់ក្រោមបានបដិសេធ។
លោក សំ ទិត្យសីហា ដែលជាមេធាវីការពារក្តីឱ្យលោក រ៉ាត់ រត្នមុនី បានប្រាប់វីអូឌីនៅថ្ងៃនេះថា កូនក្ដីរបស់លោកបានសម្រេចឲ្យបន្តប្ដឹងទៅតុលាការកំពូល ដើម្បីជំទាស់នឹងសេចក្ដីសម្រេចរបស់សាលាឧទ្ធរណ៍ និងសាលាដំបូងរាជធានីភ្នំពេញ ដែលបានច្រានចោលសំណើសុំនៅក្រៅឃុំរបស់លោកជាបន្តបន្ទាប់។
មេធាវីរូបនេះ បានប្រាប់ថា សេចក្ដីសម្រេចរបស់តុលាការជាន់ទាបទាំងពីរថ្នាក់ បានធ្វើឲ្យប៉ះពាល់ធ្ងន់ធ្ងរដល់ជីវភាពគ្រួសារ សិទ្ធិសេរីភាព និងសុខភាពរបស់កូនក្ដីលោក។
លោក សំ ទិត្យសីហា មានប្រសាសន៍ថា៖ «គិតថា អ្វីដែលគាត់ធ្វើហ្នឹង គាត់មិនមានព្យុសនកម្ម ហើយគាត់មានសិទ្ធិងក្នុងការសុំនៅក្រៅឃុំ ដើម្បីឱ្យគាត់ជួបជុំក្រុមគ្រួសារ ឬក៏គាត់ធ្វើអ្វីមួយសម្រាប់ក្រុមគ្រួសារគាត់ហ្នឹង ហើយមួយទៀតដែរ ខ្ញុំគិតថា ទាក់ទងបញ្ហាបទល្មើសហ្នឹង វាគ្មានអ្វី គាត់ហ្នឹងវាគ្មានអំណាចអី ឬក៏គ្មានឥទ្ធិពលអីទៅរាំងស្ទះទៅដល់ដំណើរការនីតិវិធី»។
ប្រធានសហព័ន្ធសហជីពសំណង់កម្ពុជា លោក រ៉ាត់ រត្នមុនី បានស្នើសុំនៅក្រៅឃុំ ប៉ុន្តែ សំណើរបស់លោកត្រូវបានសាលាដំបូងរាជធានីភ្នំពេញ និងសាលាឧទ្ធរណ៍ បដិសេធជាបន្តបន្ទាប់។
មេដឹកនាំសហជីពរូបនេះ ត្រូវបានតុលាការចោទប្រកាន់ពីបទញុះញង់ធ្វើឲ្យមានការរើសអើង និងបញ្ជូនទៅដាក់ឃុំនៅពន្ធនាគារព្រៃស បន្ទាប់ពីត្រូវបានចាប់ខ្លួននៅឯប្រទេសថៃកាលពីខែធ្នូឆ្នាំមុន ពាក់ព័ន្ធនឹងការផលិតភាពយន្តឯកសារ «ម្ដាយខ្ញុំលក់ខ្ញុំ» របស់សារព័ត៌មានរុស្ស៊ី RT។
យោងតាមក្រមព្រហ្មទណ្ឌកម្ពុជា លោក រត្នមុនី អាចនឹងត្រូវជាប់ទោសក្នុងពន្ធនាគារពី ១ ទៅ ៣ឆ្នាំ ប្រសិនបើត្រូវបានរកឃើញថា មានកំហុសមែននោះ៕