រដ្ឋាភិបាលកម្ពុជាប្រកាសបញ្ចុះថ្លៃពិនិត្យទូរកុងតឺន័រនាំចេញ និងនាំចូលផលិតផលកាត់ដេរសំលៀកបំពាក់ និងស្បែកជើង ដើម្បីពង្រឹងការប្រកួតប្រជែងរបស់កម្ពុជាឲ្យកាន់តែខ្លាំងក្លា។
ក្នុងសេចក្ដីប្រកាសព័ត៌មានចុះថ្ងៃទី៣០ ខែមករា ដែល VOD ទើបទទួលបាន រដ្ឋមន្ត្រីក្រសួងសេដ្ឋកិច្ច លោក អូន ព័ន្ធមុន្នីរ័ត្ន បានប្រកាសថា ចាប់ពីពេលនេះតទៅ រដ្ឋាភិបាលនឹងលុបចោលនូវការចេញវិញ្ញាបណ្ណបត្របញ្ជាក់ប្រភពដើម (CO) សម្រាប់ប្រទេសដែលមិនត្រូវការ ហើយដើម្បីកាត់បន្ថយថ្លៃនាំចេញនិងនាំចូលឲ្យដល់កម្រិតទាបបំផុតនោះ នាខែមេសាខាងមុខ ក្រសួងក៏នឹងបញ្ចុះថ្លៃពិនិត្យកុងតឺន័រឲ្យដូចទៅនឹងការនាំចេញអង្ករផងដែរ។
ក្នុងសេចក្ដីប្រកាសនោះសរសេរថា៖ « គឺ១០ដុល្លារសម្រាប់កុងតឺន័រ ២០ហ្វិត(៦ម៉ែត្រ) និង១៦ដុល្លារសម្រាប់កុងតឺន័រ ៤០ហ្វិត(១២ម៉ែត្រ) ដោយចាប់អនុវត្តពីថ្ងៃទី១ ខែមេសា ឆ្នាំ២០១៩ » ។
បើតាមសេចក្ដីប្រកាសនោះ ការលុបចោលនិងបញ្ចុះតម្លៃពិនិត្យកុងតឺន័រនេះនឹងធ្វើឲ្យវិស័យកាត់ដេរសំលៀកបំពាក់ និងស្បែកជើងចំណេញទឹកប្រាក់ជិត១០០លានដុល្លារអាមេរិកក្នុង១ឆ្នាំ។
អគ្គលេខាធិការនៃសមាគមរោងចក្រកាត់ដេរនៅកម្ពុជា លោក ខេន លូ គាំទ្រចំពោះការសម្រេចនេះជារឿងល្អមួយ ដើម្បីជំរុញដល់អ្នកនាំចេញនាំចូលផលិតផលសំលៀកបំពាក់។
លោកថា៖ « ខ្ញុំគិតថា ឥឡូវរដ្ឋាភិបាលបានព្យាយាមហើយ! តែយើងមិនអាចនិយាយបានថាមកពីអាហ្នឹងអាចនាំឲ្យការនាំចូលនាំចេញកើនឡើងទេ តែយ៉ាងហោចណាស់ក៏វាបានជួយកាត់បន្ថយចំណាយរបស់យើងដែរ មានន័យថាជួយដល់ក្រុមហ៊ុននាំចេញនាំចូលដែរ » ។
ចាប់ពីដើមឆ្នាំ២០១៩នេះ រដ្ឋាភិបាលបានប្រកាសពីយុទ្ធនាការពង្រឹងឯករាជ្យរបស់កម្ពុជាដែលមានជាបន្តបន្ទាប់ ដូចជា ការដកកាំកុងត្រូលចេញពីព្រំដែន និងតំបន់សេដ្ឋកិច្ច ការលុបចោលអង្គភាពនាវាចរកាំសាប បង្រួមការិយាល័យរដ្ឋបាលថ្នាក់ស្រុក និងឈប់យកពន្ធលើប្រាក់ចំណូលលើសហគ្រាសកសិកម្មចំនួន៥ឆ្នាំជាដើម។
លោកនាយករដ្ឋមន្ត្រី ហ៊ុន សែន កាលពីថ្ងៃទី២៥ ខែមករា បានលើកឡើងថា វិធានការថ្មីនេះនឹងធ្វើឲ្យធុរជនកាន់តែមានទំនុកចិត្តក្នុងការធ្វើពាណិជ្ជកម្មនៅកម្ពុជាបន្ថែមទៀត។
លោកថា៖ « គេនឹងនរចិត្ត គេដឹងថា បើសិនជាមានបញ្ហាស្អីកើតឡើង គឺគេនៅតែមានលទ្ធភាពមានប្រាក់ចំណេញ ហើយបើគ្មានអីកើតឡើងទេ គេកាន់តែមានប្រាក់ចំណេញ។ ហើយប្រាក់ចំណេញនេះ មួយផ្នែកនឹងត្រូវបានក្លាយជាប្រាក់រង្វាន់ឬក៏ដំឡើងបៀវត្សឲ្យកម្មកររបស់យើង ទាំងអស់នេះសុទ្ធតែជារបៀបវារៈដែលត្រូវធ្វើនៅក្នុងអាណត្តិនេះ » ។
អ្នកវិភាគសេដ្ឋកិច្ច លោក ង៉ែត ជូ យល់ស្របទៅនឹងវិធានការនេះ តែថាការបង្កើនទំនុកចិត្តអ្នកវិនិយោគគឺមិនអាចធ្វើឡើងក្នុងរយៈពេលខ្លីនោះទេ។
លោកថា៖ «វាអាស្រ័យលើវិធានការជាក់ស្ដែងក្នុងការចាត់ឲ្យមានប្រសិទ្ធភាព អញ្ចឹងចាំមើលទៅមុខទៀត ប្រសិនជាកើតដូចជាអ្វីដែលថ្នាក់ដឹកនាំមានប្រសាសន៍មែនរឿងហ្នឹង វាបង្ហាញពីសញ្ញាវិជ្ជមានហើយ ធម្មតាការកសាងទំនុកចិត្ត វាមិនអាចកសាងបានក្នុងរយៈពេលខ្លីទេវាត្រូវការរយៈពេលច្រើន » ។
រដ្ឋាភិបាលកាលពីថ្ងៃទី២៩ ខែមករា បានប្រកាសឈប់យកពន្ធលើប្រាក់ចំណេញចំពោះសហគ្រាសដាំដុះ ផលិត និងផ្គត់ផ្គងក្នុងស្រុក ឬនាំចេញផលិតផលកសិកម្មដែលមានដូចជា ស្រូវ អង្ករ ពោត សណ្ដែក ម្រេច គ្រាប់ស្វាយចន្ទី ដំឡូងមី និងកៅស៊ូរយៈពេល៥ឆ្នាំជាប់ៗគ្នា ដោយថា ដើម្បីជំរុញការនាំចេញផលិតផលកសិកម្មកម្ពុជាទៅកាន់ទីផ្សារអន្តរជាតិ៕
