មេធាវីការពារក្តីឱ្យអតីតសកម្មជនគណបក្សសង្រ្គោះជាតិខេត្តស្វាយរៀង សម្រេចដាក់ប្តឹងទៅសាលាឧទ្ធរណ៍ ចំពោះដីកាសម្រេចមិនព្រមដោះលែង លោក គង់ ម៉ាស់ ឱ្យនៅក្រៅឃុំ។
មេធាវីការពារក្តីឱ្យលោក គង់ ម៉ាស់ គឺលោក សំ សុគង់ ឱ្យ វី.អូ.ឌី ដឹងនៅថ្ងៃនេះថា ខាងលោកបានសម្រេចដាក់ពាក្យប្តឹងទៅសាលាឧទ្ធរណ៍កាលពីថ្ងៃពុធសប្តាហ៍នេះ ដោយថា ដើម្បីស្នើឱ្យសភាស៊ើបសួរនៃសាលាឧទ្ធរណ៍ពិនិត្យឡើងវិញ ចំពោះដីកាសម្រេចមិនព្រមដោះលែងកូនក្តីរបស់លោកបាននៅក្រៅឃុំជាបណ្តោះអាសន្នពេលនេះ។
លោក សំ សុគង់ មានប្រសាសន៍ថា ប្រសិនបើតុលាការនៅតែបន្តឃុំខ្លួនកូនក្តីរបស់លោក គឺធ្វើឱ្យប៉ះពាល់ដល់សិទ្ធិសេរីភាពក្នុងការបញ្ចេញមតិ និងសិទ្ធិនយោបាយរបស់ពលរដ្ឋផងដែរ។
មិនតែប៉ុណ្ណោះ លោកថា ប៉ះពាល់ដល់ជីវភាព និងសុខភាពកូនរបស់ខ្លួន ម្យ៉ាងលោកថា ករណីនេះ ជាបទល្មើសតូចតាច ដែលគួរតែមានការដោះលែងឱ្យ លោក គង់ ម៉ាស់ បាននៅឃុំក្រៅជាបណ្តោះអាសន្ន។
លោកបន្តថា៖ «ដោយសារបទល្មើសជាបទល្មើសតូចតាច បទល្មើសមជ្ឈឹម ហើយតុលាការគិតតែពីឃុំខ្លួន វាធ្វើឱ្យណែនណាន់តែនតាប់ក្នុងពន្ធនាគារ។ ហើយនេះក៏ជាយុទ្ធសាស្ត្រ ជាបំណងរបស់រដ្ឋាភិបាលអំពីការកាត់បន្ថយអំពីការណែនខ្លាំងចំពោះអ្នកជាប់ឃុំផងដែរ។ ហើយចំណុចមួយទៀតដែលជាចំណុចចុងក្រោយនោះ គឺថាសាធារណជន រឿងរបស់លោកគង់ ម៉ាស់ វាមានពាក់ព័ន្ធរឿងនយោបាយផងដែរ។ អីចឹងគួរតែមានការដោះលែងគាត់ ដើម្បី ជៀសវាងមានការរិះគន់ពីមជ្ឈដ្ឋានខាងក្រៅ»។
លោក គង់ ម៉ាស់ ជាអតីតសមាជិកក្រុមការងាររបស់គណបក្សសង្គ្រោះជាតិប្រចាំនៅខេត្តស្វាយរៀង និងជាអនុប្រធាននាយកដ្ឋានកិច្ចការបោះឆ្នោត និងនីតិកម្ម។ លោកត្រូវបានសមត្ថកិច្ចក្រសួងមហាផ្ទៃចាប់ឃាត់ខ្លួនកាលពីព្រឹកថ្ងៃទី១៦ ខែមករា នៅក្នុងហាងកាហ្វេមួយកន្លែងនៅរាជធានីភ្នំពេញ។
លោក គង់ ម៉ាស់ ត្រូវបានសមត្ថកិច្ចចាប់ខ្លួនតែ ២ថ្ងៃប៉ុណ្ណោះ ក្រោយពីលោក ហ៊ុន សែន ថ្លែងព្រមានកម្ចេចក្រុមបក្សប្រឆាំងចោល និងមិនអត់ឱនឱ្យក្រុមនេះជាដាច់ខាត ប្រសិនបើសហគមន៍អឺរ៉ុប និងអាមេរិក ដកហូតប្រព័ន្ធអនុគ្រោះពន្ធពីកម្ពុជា។
លោក ត្រូវបានតុលាការចោទប្រកាន់ពីបទប្រមាថនិងបទ ញុះញុងឲ្យប្រព្រឹត្តបទល្មើស តាមមាត្រា៤៩៥ និង មាត្រា៥០២ នៃក្រមព្រហ្មទណ្ឌ ។ ប្រសិនបើរកឃើញថាមានកំហុស សកម្មជនអតីតបក្សប្រឆាំងរូបនេះ អាចប្រឈមមុខនឹងការជាប់ទោសនៅក្នុងពន្ធនាគារចន្លោះពី ៦ខែ ទៅ ២ឆ្នាំ៕
