អាជ្ញាធរខេត្តពោធិ៍សាត់ បង្ហាញការព្រួយបារម្ភលើបញ្ហាកង្វះទឹក សម្រាប់ជួយសង្គ្រោះស្រូវប្រជាពលរដ្ឋនារដូវប្រមូលផលនេះ ខណៈស្រូវជាច្រើនហិកតាកំពុងរងការខូចខាត។
ក្នុងកិច្ចប្រជុំជាមួយពលរដ្ឋកាលពីថ្ងៃព្រហស្បតិ៍ទី០៧ ខែកុម្ភៈ ម្សិលមិញ ចៅសង្កាត់ចំរើនផលលោក ឈុន សៀង បានឲ្យដឹងថា មន្ទីរធនធានទឹក និងឧតុនិយម កំពុងតែបង្ហូរទឹកចូលតាមប្រឡាយធំៗនៅភូមិអូរកា ក្រុងពោធិ៍សាត់ ដើម្បីទុកឲ្យប្រជាពលរដ្ឋប្រើប្រាស់សង្គ្រោះស្រូវរបស់ពួកគេ ប៉ុន្តែលោកបារម្ភថា ទឹកនេះមិនគ្រប់គ្រាន់ទាំងស្រុងបានទេ ដោយសារអាកាសធាតុកើនឡើងកំដៅនាពេលបច្ចុប្បន្ន។
លោកបានបញ្ជាក់ថា៖ «រឿងខ្វះខាតទឹកគឺជារឿងសំខាន ចឹងខ្ញុំធ្វើការងារជាមួយមន្ទីរដើម្បីបង្ហូរទឹកដាក់តាមប្រឡាយ ព្រោះស្រូវជិតបានច្រូតហើយ អត់មានទឹកស្រូវខូចអស់ច្រើន»។
ចៅសង្កាត់ចំរើនផលរូបនោះ អះអាងថា លោកនិងព្យាយាមធ្វើការងារជាមួយមន្ទីធនធានទឹក និងឧតុនិយម ដើម្បីជួយរកដំណោះស្រាយជូនពលរដ្ឋ ឲ្យទទួលបានទឹកគ្រប់គ្រាន់ ដើម្បីធ្វើស្រូវប្រាំងនាពេលខាងមុខនេះ៕