សមត្ថកិច្ចខេត្តពោធិ៍សាត់ ជំរុញទៅអាជ្ញាធរមូលដ្ឋានពង្រឹងក្រុមប្រជាការពារភូមិឡើងវិញ នឹងអនុវត្តគោលការណ៍ភូមិឃុំមានសុវត្ថិភាព ដោយថា ដើម្បីទប់ស្កាត់អ្នកប្រើប្រាស់សារធាតុញៀនបង្កហិង្សាក្នុងគ្រួសារ។
ក្នុងកិច្ចប្រជុំកាលពីថ្ងៃទី៧ ខែកុម្ភៈ នគរបាលប៉ុស្តិ៍ចំរើនផល ខេត្តពោធិ៍សាត់ លោក អ៊ុល ហៃ បានថ្លៃងថា ដើមចមដែលនាំឲ្យមានអំពើហិង្សាក្នុងគ្រួសារ ដោយសារជនបង្កប្រើប្រាស់សារធាតុញៀន ។ ករណីនេះ លោកថា ដើម្បីទប់ស្កាត់អ្នកប្រើប្រាស់សារធាតុញៀនដែលបង្កអំពើហិង្សាក្នុងគ្រួសារបាន លុះត្រាតែអាជ្ញាធរមូលដ្ឋាន រួមជាមួយប្រជាពលរដ្ឋចូលរួមសហការណ៍ជាមួយសមត្ថកិច្ចខេត្ត ទើបទទួលបានផលវិជ្ជមាន។
ទាក់ទងករណីនេះ ចៅសង្កាត់ចំរើនផល លោក ឈុន សៀង បានប្រាប់ទៅមេភូមិទាំងប្រាំបីភូមិ ឲ្យពង្រឹងក្រុមប្រជាការពារភូមិឡើងវិញ ដើម្បីអនុវត្តតាមគោលការភូមិឃុំមានសុវត្ថិភាពផងដែរ។
គួរបញ្ជាក់ថា កាលពីដើមឆ្នាំ ២០១៩នេះ នាយប៉ុស្តិ៍នគរបាលសង្កាត់ចំរើនផល លោក អ៊ុល ហៃ មានប្រសាសន៍ថា សម្ថកិច្ចរបស់លោកចុះបង្រ្កាបបទល្មើសបានពីរករណី និងឃាត់ខ្លួនមនុស្សបានពីរនាក់ ទីមួយឈ្មោះ ហែ ហៃ ភេទប្រុស រស់ភូមិក្តីខ្វាវ និងម្នាក់ទៀតឈ្មោះ ហៃ ភី ភេទប្រុស រស់នៅភូមិអូរតូង ដែលជនបង្កទាំងពីរសុទ្ធតែប្រើប្រាស់គ្រឿងញៀន និងបង្កហិង្សាក្នុងគ្រួសារ ករណីនេះ សម្ថកិច្ចបានកសាងសំណុំរឿងបញ្ជូនទៅតុលាការ ដើម្បីអនុវត្តតាមនិតិវិធីច្បាប់ទៀតផង៕
