រដ្ឋមន្ត្រីក្រសួងមហាផ្ទៃ លោក ស ខេង បញ្ជាក់ថា ក្រសួងនឹងសហការជាមួយក្រសួងយុត្តិធម៌ ដើម្បីពន្លឿននីតិវិធីរបស់តុលាការលើជនជាប់ឃុំទាំងអស់ ដែលត្រូវបានក្រុមសិទ្ធិមនុស្សក្នុងស្រុករកឃើញថា ត្រូវបានដាក់ឲ្យជាប់ឃុំលើសនីតិវិធី ហើយស្ថានភាពពន្ធនាគារកាន់តែចង្អៀត។
ថ្លែងក្នុងពិធីសន្និបាតបូកសរុបការងារឆ្នាំ២០១៨ និងដាក់ទិសដៅសម្រាប់ឆ្នាំ២០១៩ នៅទីស្តីការក្រសួងមហាផ្ទៃកាលពីថ្ងៃម្សិលមិញ លោក ស ខេង មានប្រសាសន៍ថា អ្នកជាប់ឃុំនៅពន្ធនាគារទាំងអស់មានចំនួនជាង ៣ម៉ឺននាក់នាពេលបច្ចុប្បន្ននេះ។
រដ្ឋមន្ត្រីមហាផ្ទៃរូបនេះ ឲ្យដឹងទៀតថា អ្នកជាប់ឃុំប្រមាណ ២ ភាគ ៣ មានជាប់ពាក់ព័ន្ធនឹងបទល្មើសគ្រឿងញៀន ហើយក្នុងនោះ អ្នកជាប់ឃុំច្រើន មិនត្រូវបាននាំទៅជម្រះក្ដីនៅឡើយទេ ដែលជាបញ្ហាប្រឈមក្នុងការគ្រប់គ្រងពន្ធនាគារ និងអ្នកកំពុងជាប់ឃុំ។
លោក ស ខេង មានប្រសាសន៍ថា៖ «ហើយយើងកំពុងសហការជាមួយស្ថាប័នតុលាការ មិនហ៊ានថា ដូចថា ណែនាំ ជំរុញឱ្យគាត់ពន្លឿនអីយ៉ាងម៉េចទេ ប៉ុន្តែ យើងសហការក្នុងន័យអីចឹងទេ ក្នុងន័យថា ពន្លឿននីតិវិធី ប៉ុន្តែ ការសម្រេចបែបណានោះ ជាការសម្រេចរបស់តុលាការ។ ការកាត់ក្តី ព្រោះថា បើមិនអីចឹងទេ វាសល់ច្រើន សល់ច្រើនចំពោះអ្នកមិនទាន់ការក្តី។ អានោះជាបញ្ហា»។
អ្នកនាំពាក្យក្រសួងយុត្តិធម៌ លោក ជិន ម៉ាលីន ទទួលស្គាល់ការលើកឡើងរបស់រដ្ឋមន្ត្រីក្រសួងមហាផ្ទៃ ដោយថា ការអនុវត្តនីតិវិធីទៅលើអ្នកជាប់ឃុំយឺតយ៉ាវ គឺមានមូលហេតុមួយចំនួនពាក់ព័ន្ធបញ្ហារដ្ឋបាល ដូចជាសំណុំរឿងច្រើន ប៉ុន្តែ ចំនួនមន្ត្រីតុលាការមានតិច និងប្រព័ន្ធគ្រប់គ្រងទិន្នន័យមិនទាន់ទំនើបជាដើម។
យ៉ាងនេះក្តី អ្នកនាំពាក្យរូបនេះ លើកឡើងថា កន្លងមក រដ្ឋាភិបាលបានបង្កើតក្រុមការងារអន្តរក្រសួងចុះដោះស្រាយបញ្ហានេះ និងកំពុងបង្កើតយន្តការបន្ទាន់ ដើម្បីធ្វើការងារនេះ ដោយលោកថា ប្រសិនបើអាចដោះស្រាយបញ្ហានេះបាន នឹងកាត់បន្ថយការកកស្ទះចំនួនអ្នកជាប់ឃុំបានមួយចំណែកផងដែរ។
លោក ជិន ម៉ាលីន បន្ថែមថា៖ «យន្តការដែលយើងដោះស្រាយបន្ទាន់ហ្នឹង គឺការផ្ទៀងផ្ទាត់សំណុំរឿងដែលមាននៅតុលាការជាមួយខាងពន្ធនាគារ ហើយជំរុញឱ្យតុលាការនីមួយៗពន្លឿនតាមករណីជាក់ស្តែងនីមួយៗ។ អានេះជាអ្វីដែលយើងធ្វើបន្ទាន់ ប៉ុន្តែ ជាទិសដៅវែងឆ្ងាយទៅមុខទៀត ដើម្បីដោះស្រាយបញ្ហានេះ យើងនឹងរៀបក្របខណ្ឌច្បាប់ ក្របខណ្ឌគោលនយោបាយ និងរៀបចំយន្តការមួយចំនួនទៀតដែលមានលក្ខណៈយូរអង្វែង»។
មន្ត្រីផ្នែកស៊ើបអង្កេតរបស់អង្គការលីកាដូ លោក អំ សំអាត គាំទ្រចំពោះសំណើរបស់រដ្ឋមន្ត្រីក្រសួងមហាផ្ទៃ ដោយថា ការលើកឡើងនេះ ជាការឆ្លុះបញ្ចាំងពីតថភាពជាក់ស្តែងនៅក្នុងពន្ធនាគារបច្ចុប្បន្ន។
លោកមើលឃើញថា ភាពយឺតយ៉ាវក្នុងការអនុវត្តនីតិវិធីចំពោះអ្នកជាប់ឃុំ និងការឃុំខ្លួនលើសនីតិវិធី ដែលធ្វើឱ្យមានអ្នកជាប់ឃុំយូរ គឺធ្វើឱ្យប៉ះពាល់ដល់សិទ្ធិសេរីភាពរបស់អ្នកជាប់ឃុំ ប៉ះពាល់ដល់ក្រុមគ្រួសារ និងប៉ះពាល់ដល់សេដ្ឋកិច្ចជាតិផងដែរ។
លោក អំ សំអាត មានប្រសាសន៍ថា៖ «តាមប៉ះពាល់ដល់ជីវភាពគ្រួសាររបស់ពួកគាត់ ក៏វាធ្វើឱ្យប៉ះពាល់ដល់សង្គមជាតិយើងដែរ ពីព្រោះពួកគាត់ក្រីក្រ ពួកគាត់ខ្វះខាតអាហ្នឹងវាជាបញ្ហាមួយដល់សង្គមជាតិយើង។ ហើយបញ្ហាទីពីរ កាលណាឃុំខ្លួន ចង្អៀតណែនអីចឹងទៅ វាធ្វើឱ្យប៉ះពាល់ដល់សុខភាពរបស់ជនជាប់ឃុំធ្ងន់ធ្ងរផងដែរ »។
របាយការណ៍របស់ខ្លួនមានចំណងជើងថា «ពេលដែលត្រូវដោះលែងឲ្យនៅក្រៅឃុំ៖ បញ្ឈប់ការឃុំខ្លួនបណ្ដោះអាសន្នមិនចាំបាច់» ដែលចេញកាលពីចុងឆ្នាំមុននោះ អង្គការលីកាដូបានរកឃើញថា ក្នុងចំណោមជនជាប់ឃុំចំនួនជាង ២ម៉ឺននាក់( ២៥ ៩២៦) មានអ្នកជាប់ឃុំចំនួនជិត ១ម៉ឺននាក់(៩.៥២៧) ដែលស្មើជិត ៤០ភាគរយ(៣៧%) ត្រូវបានដាក់ឲ្យជាប់ឃុំបណ្តោះអាសន្នរង់ចាំសវនាការ។
អង្គការការពារសិទ្ធិមនុស្សមួយនេះ ដែលធ្វើការងារទៅលើពន្ធនាគារចំនួន ១៨កន្លែងនៅក្នុងចំណោមពន្ធនាគារ ២៨កន្លែងនៅទូទាំងប្រទេសនោះ បានរកឃើញទៀតថា នៅក្នុងពន្ធនាគារមួយចំនួន ជនជាប់ឃុំបណ្តោះអាសន្ន មានចំនួនពាក់កណ្តាល ឬច្រើនជាងពាក់កណ្តាលនៃចំនួនជនជាប់ឃុំសរុបទៅទៀត៕