លោកនាយករដ្ឋមន្ត្រី ហ៊ុន សែន បានអះអាងថា ការសម្រេចយកពន្ធលើអង្ករកម្ពុជាពីសំណាក់សហភាពអឺរ៉ុប មិនមែនធ្វើឱ្យកសិករខ្មែរនៅក្នុងស្រុករងផលប៉ះពាល់ធ្ងន់ធ្ងរទេ ប៉ុន្តែ លោកថា វានឹងប៉ះពាល់ខ្លាំងដល់ពលរដ្ឋខ្មែរដែលរស់នៅអឺរ៉ុបតែម្តង។
ថ្លែងក្នុងពិធីបិទបញ្ចប់សន្និបាតបូកសរុបការងារឆ្នាំ២០១៨ និងលើកទិសដៅសម្រាប់ឆ្នាំ២០១៩ នៅក្រសួងមហាផ្ទៃ នៅរសៀលថ្ងៃនេះ លោក ហ៊ុន សែន បានអះអាងជាថ្មីថា ដោយសារអង្ករកម្ពុជាឆ្ងាញ់ទើបមានការទប់ស្កាត់អង្ករកម្ពុជា មិនចង់ឱ្យនាំចេញទៅលក់នៅទឹកដីអឺរ៉ុប ដោយគ្មានការបង់ពន្ធ។
លោកថា នៅពេលអឺរ៉ុបយកពន្ធអង្ករកម្ពុជា អ្នកដែលរងផលប៉ះពាល់ធ្ងន់ធ្ងរជាងគេ គឺពលរដ្ឋខ្មែរដែលនៅអឺរ៉ុប ដោយសារប្រឈមនឹងការពិបាករកអង្ករឆ្ងាញ់បរិភោគ និងត្រូវចេញថ្លៃក្នុងការបង់ពន្ធនោះ។
លោក ហ៊ុន សែន ថ្លែងថា៖ «ហើយអង្ករកម្ពុជាបង់ពន្ធ ប៉ុន្តែ អ្នករងគ្រោះពិតប្រាកដមិនមែនកសិករកម្ពុជាម្នាក់ឯងទេ គឺខ្មែរដែលរស់នៅអឺរ៉ុបឯណោះ ដែលធ្លាប់ស៊ីអង្ករខ្មែរអីណោះ គឺជាអ្នកបង់ថ្លៃទេ។ សូមកុំភ័ន្តច្រឡំ បងប្អូនខ្មែរនៅក្រៅប្រទេសទាំងឡាយ អង្ករកម្ពុជាមិនអាចនាំទៅអឺរ៉ុបតាមរយៈដោយគ្មានការបង់ពន្ធ មិនមែនបណ្តាលមកពីបញ្ហានយោបាយទេ បណ្តាលមកពីការទាមទាររបស់ប្រទេសអ៊ីតាលី និងអេស្ប៉ាញ»។
កាលពីថ្ងៃទី១៧ ខែមករាកន្លងមកនេះ សហភាពអឺរ៉ុបបានសម្រេចយកពន្ធលើអង្ករនាំចូលពីប្រទេសកម្ពុជា និងប្រទេសភូមា នៅក្នុងរយៈពេល៣ឆ្នាំជាប់គ្នា ដោយការសម្រេចនេះ ចាប់ផ្តើមអនុវត្តពីថ្ងៃទី១៨ ខែមករាតទៅ ។
ក្នុងរបាយការណ៍នាំចេញអង្ករទៅលក់នៅទីផ្សារអន្តរជាតិឆ្នាំ២០១៨ អង្ករកម្ពុជាជិត ២៧ម៉ឺនតោន ត្រូវបាននាំចូលទៅកាន់ទីផ្សារសហគមន៍អឺរ៉ុប ដែលធ្វើឲ្យអឺរ៉ុបក្លាយជាទីផ្សារធំបំផុតសម្រាប់អង្ករកម្ពុជាមានចំណែកដល់ទៅជាង ៤៣ភាគរយនៃតួលេខអង្ករកម្ពុជានាំចេញទៅទីផ្សារអន្តរជាតិ៕