រដ្ឋមន្ត្រីក្រសួងមហាផ្ទៃ លោក ស ខេង បានជំរុញឱ្យរដ្ឋបាលខេត្តទាំងអស់ពង្រឹងការអនុវត្តច្បាប់ឲ្យបានត្រឹមត្រូវ ពិសេសការចុះអនុវត្តសាលដីការបស់តុលាការ ដោយថាការប្រើប្រាស់កម្លាំងយោធាណាមួយ គឺជារឿងខុសច្បាប់។
លោក ស ខេង បានថ្លែងបែបនេះក្នុងពិធីសន្និបាតបូកសរុបការងារឆ្នាំ២០១៨ និងដាក់ទិសដៅសម្រាប់ឆ្នាំ២០១៩ នៅទីស្តីការក្រសួងមហាផ្ទៃនាព្រឹកម្សិលមិញនេះ។ រដ្ឋមន្រ្តីក្រសួងមហាផ្ទៃរូបនេះ បានលើកឡើងករណីខេត្តចំនួនពីរ ដែលប្រើប្រាស់កម្លាំងយោធាទៅបង្ក្រាបទាំងកម្រោលលើពលរដ្ឋ ក្នុងការអនុវត្តសាលដីការបស់តុលាការគឺ ខេត្តព្រះសីហនុ និង ខេត្តក្រចេះ ដោយថាជាការប្រព្រឹត្តខុសទាំងស្រុង។
លោកបញ្ជាក់ថា ក្នុងស្ថានភាពបច្ចុប្បន្នការប្រើប្រាស់កម្លាំងទៅបង្រ្កាបឬ ដោះស្រាយទំនាស់ជាមួយពលរដ្ឋគឺ មិនបានឡើយ ហើយទៅថ្ងៃមុខក៏រឹតតែមិនបានថែមទៀត ដោយលោកថាអ្នកកាន់អំណាចមិនអាចពឹងលើកាំភ្លើងនោះទេ ប៉ុន្តែគេត្រូវរកវិធីដោះស្រាយឈរនៅលើផ្លូវច្បាប់ ប្រកបដោយភាពយុត្តិធម៌។
លោកបន្ថែមថា៖ «ហើយយើងរដ្ឋបាលខេត្តប៉ុណ្ណាណី អត់ដឹងច្បាប់។ ណែប្រយ័ត្នដល់ខេត្តផ្សេងទៀត ដែលមិនបានប្រាប់ ហើយរមៀលទៅអីចឹងទៀត មានអីនឹកឃើញយោធា ទៅប្រើយោធាអនុវត្តច្បាប់ អន្តរធានហើយ។ មន្ត្រីអនុវត្តច្បាប់ វាមានតែនគរបាល មានកងរាជអាវុធហត្ថ ព្រះរាជអាជ្ញា ហើយរឿងវាមិនទាន់ត្រូវធ្វើផង។ វាមិនទាន់ចាំបាច់ត្រូវធ្វើខានមិនបានផង។ ខ្ញុំនិយាយច្រើនដងហើយអាហ្នឹង ប៉ុន្តែខ្ញុំនឹងនិយាយទៀត ថាបើធ្វើទៅ បើយើងមិនធ្វើខុស ប៉ុន្តែដល់ពេលធ្វើ យើងធ្វើខុសច្បាប់ អាហ្នឹងក៏កាន់តែខុសទៅទៀត »។
មន្ត្រីអង្កេតជាន់ខ្ពស់របស់សមាគមការពារសិទ្ធិមនុស្សអាដហុក លោក ស៊ឹង សែនករុណា គាំទ្រចំពោះការលើកឡើងរបស់រដ្ឋមន្ត្រីក្រសួងមហាផ្ទៃ ដោយថាការប្រើកម្លាំងចុះអនុវត្តច្បាប់ឬដោះស្រាយបញ្ហាកន្លងមក មានភាពមិនច្បាស់លាស់ គ្មានការបណ្តុះបណ្តាលត្រឹមត្រូវ និងផ្ទុយពីច្បាប់ទៀតផង។
លោកថា កម្លាំងទាំងនោះ មានមួយចំនួនក្នុងជួរកងរាជអាវុធហត្ថ កម្លាំងទាហាន និងកម្លាំងសន្តិសុខឬ ប្រជាការងារជាដើម ដោយថាការប្រើប្រាស់កម្លាំងខុសច្បាប់ ជាការរំលោភសិទ្ធិពលរដ្ឋ។
លោកបន្ថែមថា៖ «ក្នុងនាមអាជ្ញាធរមានសមត្ថកិច្ចដែលមានការបណ្តុះបណ្តាលទៅតាមនីតិវិធីច្បាប់ហ្នឹង គឺ គាត់ដឹងពីសិទ្ធិក្នុងការអនុវត្តតួនាទីរបស់គាត់ទៅតាមមុខងាររៀងៗខ្លួនហ្នឹង។ ហើយការអនុវត្តហ្នឹងគាត់តែងយកច្បាប់ជាធំ យកការគោរពសិទ្ធិទៅលើប្រជាពលរដ្ឋជាធំ។ ក្នុងហ្នឹងយើងដឹងហើយ បើនិយាយពីផ្លូវច្បាប់វិញ ពាក់ព័ន្ធក្រមសីលធម៌អ្នកអនុវត្តច្បាប់ ហើយក្នុងហ្នឹងក៏មានការរំលោភ ទៅខាងសេចក្តីប្រកាស នានារបស់អន្តរជាតិ ផងដែរ ពាក់ព័ន្ធការប្រើប្រាស់កម្លាំងដែលមិនតុល្យភាពបង្ក្រាបទៅលើប្រជាពលរដ្ឋហ្នឹង »។
ជាមួយគ្នានេះ លោក ស្នើឱ្យកែប្រែក្នុងការប្រើប្រាស់កម្លាំងទាំងនោះឡើងវិញ ព្រមទាំងដាក់ទោសទណ្ឌចំពោះមន្ត្រីទាំងឡាយណា ទាំងអ្នកអនុវត្តន៍ផ្ទាល់ និងអ្នកបញ្ជា ដែលបានអនុវត្តខុសពីនីតិវិធីច្បាប់។
កាលពីខែមីនា ឆ្នាំ២០១៨ អាជ្ញាធរខេត្តក្រចេះ បានប្រើកម្លាំងចម្រុះ ដោយមានយោធារាប់សិបនាក់ផង បានបង្រ្កាបដោយហិង្សា និងមានទាំងបាញ់ប្រហារ ទៅលើពលរដ្ឋមានជម្លោះដីធ្លីនៅស្រុកស្នួល ដែលបណ្តាលឱ្យពលរដ្ឋជាច្រើននាក់រងរបួស។
កាលពីថ្ងៃទី២៤ ខែមករា ឆ្នាំ២០១៩ មន្ត្រីតុលាការ និងអាជ្ញាធរខេត្តព្រះសីហនុ បានដឹកនាំកម្លាំងចម្រុះ ពិសេសមានកម្លាំងទាហានជាច្រើននាក់ចុះអនុវត្តសាលដីការបស់តុលាការ។ ពេលនោះ ពលរដ្ឋ និងសមត្ថកិច្ចមានការប៉ះទង្គិចគ្នា រហូតដល់មានការបាញ់ប្រហារទៅលើពលរដ្ឋ បណ្តាលឱ្យកម្មករសំណង់ម្នាក់ត្រូវគ្រាប់កាំភ្លើងរហូតដល់ស្ពឹកមួួយចំហៀងខ្លួនទៀតផង។ ក្នុងហេតុការណ៍នេះ ក៏ឃើញមានទាហានម្នាក់ យកកាំភ្លើងវែងរបស់ខ្លួនទៅវាយលើបុរសម្នាក់ ខណៈបុរសរូបនោះជាប់ខ្នោះដៃព័ទ្ធទៅក្រោយ ទោះបីលុតជង្គង់លើដីរួចហើយក្តី៕
