មន្ត្រីពន្ធនាគារខេត្តព្រះវិហារ បានឲ្យដឹងថា ពន្ធនាគារខេត្តមួយនេះ កំពុងប្រឈមមុខនឹងកង្វះខាតទឹកប្រើប្រាស់ និងកំពុងជីកអណ្តូងថ្មីដើម្បីទាញយកទឹកមកផ្គត់ផ្គង់តម្រូវការ។
ប្រធានពន្ធនាគារខេត្តព្រះវិហារ លោក យុន ម៉ានី ឲ្យ VOD ដឹងនៅព្រឹកនេះថា ទឹកស្រះ និងទឹកអណ្ដូងនៅក្នុងបរិវេណពន្ធនាគារខេត្តនេះ បានរីងស្ងួតស្ទើរអស់នៅពេលរដូវក្ដៅចូលមកដល់។
មន្ត្រីរូបនេះ បានឲ្យដឹងទៀតថា ក្រសួងធនធានទឹកកំពុងជួយជីកអណ្តូងថ្មីដែលមានជម្រៅជ្រៅជាងមុន និងអាចផ្គត់ផ្គង់ទឹកសម្រាប់ការប្រើប្រាស់វិញបាន។
លោក យុន ម៉ានី មានប្រសាសន៍ថា៖ «ក្រសួងធនធានទឹកជួយអណ្តូងស្នប់អាខ្នាតធំបំពាក់ម៉ូទ័របូម។ បាទ! ឥឡូវនេះ គឺកំពុងតែដំណើរការជិតរួចហើយ បូមខួងហើយ ប៉ុន្តែ គាត់បំពាក់ទុយោអីសម្រាប់បូមប្រើប្រាស់ យើងរៀបបណ្តាញទុយោរួច គឺបូមប្រើបាន។ ដោយសារអាកាសធាតុក្តៅហើយ យើងមើលស្ថានភាពជាក់ស្តែង គឺវារីងរាំងខ្លាំងទៅ គឺវារាំងប្រភពទឹកក្រោមដីមួយចំនួន ហើយអណ្តូងស្នប់ដែលយើងបុកកន្លងទៅ វារាក់ ត្រឹមតែ ៣០ ទៅ ៤០ម៉ែត្រ! ដល់អញ្ចឹងអាខ្សែទឹកវាអត់គ្រប់គ្រាន់!»។
អភិបាលខេត្តព្រះវិហារ លោក អ៊ុន ចាន់ដា បានអះអាងថា ក្រៅពីពន្ធនាគារខេត្តទេ ដែលកំពុងប្រឈមមុខនឹងកង្វះខាតទឹកនោះ តំបន់ផ្សេងៗទៀតនៃខេត្តព្រះវិហារ មិនទាន់ជួបប្រទះកង្វះខាតទឹកប្រើប្រាស់នោះឡើយ។
លោក អ៊ុន ចាន់ដា មានប្រសាសន៍ថា៖ «នៅតំបន់ផ្សេង គឺអត់ទាន់មានបញ្ហាប្រឈមទេ! ទើបតែបានណែនាំឲ្យអាជ្ញធរស្រុក ហើយនិងក្រុងពិនិត្យតាមដាននូវសភាពការណ៍ទាំងឡាយដែលកើតឡើង។ ក្នុងករណីមានបញ្ហាប្រឈម គឺសុំរាយការណ៍មកខេត្តជាបន្ទាន់ ដើម្បីខេត្តទៅអន្តរាគមន៍ជួយ។ អត់ទាន់មានបានព័ត៌មានអី ឬក៏មិនទាន់មានបញ្ហាប្រឈមខ្វះទឹកទេសម្រាប់ប្រជាពលរដ្ឋទេ»។
ពន្ធនាគារខេត្តព្រះវិហារដែលស្ថិតក្នុងសង្កាត់ប៉ាលហាល ក្រុងព្រះវិហារ មានស្រះទឹកចាស់ចំនួនមួយ អណ្តូងចំនួនបួន និងមានមន្ត្រីបម្រើការងាររួមទាំងជនជាប់ឃុំសរុបចំនួនជាង ៥០០នាក់។
រដ្ឋាភិបាលបានប្រកាសកាលពីចុងឆ្នាំកន្លងមកនេះ ឲ្យពលរដ្ឋប្រើប្រាស់ទឹកដោយសន្សំសំចៃនៅក្នុងរដូវប្រាំងនេះ ដោយថា កម្ពុជាប្រឈមមុខនឹងបម្រែបម្រួលអាកាសធាតុ និងការកើនឡើងកម្ដៅរហូតដល់ ៤២អង្សានៅអំឡុងខែមេសា និងខែឧសភាខាងមុខនេះ៕