ប្រទេសជប៉ុននឹងបើកទីផ្សារទទួលពលករជំនាញខ្មែរនៅខែមេសាខាងមុខនេះ បន្ទាប់ពីបានកែសម្រួលច្បាប់របស់ខ្លួន និងត្រៀមចុះកិច្ចព្រមព្រៀងសហប្រតិបត្តិការជាមួយកម្ពុជា។ នេះបើតាមក្រសួងការងារកម្ពុជា។
ក្រសួងការងារ និងបណ្តុះបណ្តាលវិជ្ជាជីវៈ ផ្សព្វផ្សាយថា រដ្ឋមន្ត្រីក្រសួងការងារ លោក អ៊ិត សំហេង បានជួបពិភាក្សាជាមួយអគ្គរាជទូតជប៉ុនប្រចាំកម្ពុជាកាលពីម្សិលមិញថា អំពីការកែសម្រួលច្បាប់ថ្មីរបស់ជប៉ុន ដែលអនុញ្ញាតិឱ្យពលករកម្ពុជា អាចដាក់ពាក្យទទួលបានទិដ្ឋាការកាងារ (Working Visa) ដែលពីមុនពលករកម្ពុជាទទួលបានត្រឹមតែជាកម្មសិក្សាការីប៉ុណ្ណោះ។
ក្រសួងឲ្យដឹងបន្តថា ប្រព័ន្ធថ្មីរបស់ជប៉ុននេះ នឹងផ្តល់ឱកាសដល់ពលករកម្រិតជំនាញ និងកម្រិតបច្ចេកទេស អាចចូលទៅបំពេញតម្រូវការកង្វះខាតកម្លាំងពលកម្មទៅប្រទេសជប៉ុនបន្ថែមទៀត។
ក្រសួងបញ្ជាក់ថា ខ្លួននឹងជំរុញឱ្យក្រុមការងារបច្ចេកទេសពិនិត្យកែសម្រួលសេចក្តីព្រាងអនុស្សរណៈយោគយល់គ្នាលើកិច្ចសហប្រតិបត្តិការ (MOC) ឱ្យបានឆាប់ ហើយគ្រោងទៅចុះហត្ថលេខានៅទីក្រុងតូក្យូក្នុងកំឡុងសប្តាហ៍ទី៣ ខែមីនាខាងមុខនេះ។
VOD មិនទាន់អាចទាក់ទងអ្នកនាំពាក្យក្រសួងការងារ លោក ហេង សួរ បំភ្លឺបន្ថែមបានទេនៅថ្ងៃនេះ ដោយទូរសព្ទចូលពុំមានអ្នកទទួល។
មន្ត្រីកម្មវិធីអង្គការសង់ត្រាល់ លោក ឌីថេ ហូយ៉ា បង្ហាញក្ដីបារម្ភចំពោះសុវត្ថិភាពពលករ បើទោះជាជប៉ុនជាប្រទេសជឿនលឿនក៏ដោយ ដោយថា ពុំឃើញមានបើកឲ្យចូលរួមជជែកពីកិច្ចព្រមព្រៀងសហប្រតិបត្តិការជាមួយសង្គមស៊ីវិលដែលពាក់ព័ន្ធ។
លោក ឌីថេ ហូយ៉ា មានប្រសាន៍ថា៖ «ការដែលបើកលំហរទីផ្សារការងារបញ្ជូនពលករទៅប្រទេសជប៉ុន វាជារឿងមួយដែលគិតថា រកការងារឲ្យប្រជាពលរដ្ឋ ក៏ប៉ុន្តែ ទន្ទឹមនឹងការរកការងារឲ្យប្រជាពលរដ្ឋហ្នឹងណា៎! វាគួរគិតគូរទៅលើប្រព័ន្ធការការពារ និងជួយសង្គ្រោះ។ កន្លងមកយើងដឹងហើយ! រដ្ឋរបស់យើងគ្មានយន្តការ! យន្តការ! វាមានតែនៅក្នុងសៀវភៅអីចឹងទៅ! បើមែនទែនទៅ រហូតដល់ឥឡូវ វាមានមិនក្រោមពី៤០០ប្រភេទនៃយន្តការ ទាំងច្បាប់ ទាំងគោលនយោបាយជាតិអីចឹង ប៉ុន្តែ ការអនុវត្តឲ្យមានប្រសិទ្ធិភាព វាអត់មានណ៎ា! ដូចកន្លងដូចមក នៅម៉ាឡេអីចឹង ក្នុងពេលដែលពួកគាត់ត្រូវបានគេធ្វើបាប ចង់ឲ្យស្ថានទូតជួយ ស្ថានទូតថា អត់មានថវិកា»។
ក្រសួងការងារឲ្យដឹងផងដែរថា ជប៉ុនបានផ្តល់ឱកាសដល់កម្មសិក្សាការីកម្ពុជាទៅហាត់ការនៅប្រទេសជប៉ុន ដែលមកដល់បច្ចុប្បន្ននេះមានចំនួនប្រមាណជាង ៩ពាន់នាក់៕
