រដ្ឋាភិបាលជំរុញដល់វិស័យឯកជនចូលរួមបង់ពន្ធឲ្យបានគ្រប់គ្នា និងត្រឹមត្រូវទៅតាមច្បាប់ ព្រោះថា ចំណូលពន្ធថយចុះ ដោយសាររដ្ឋាភិបាលធ្វើកំណែទម្រង់លើវិស័យមួយចំនួន ដើម្បីទាក់ទាញអ្នកវិនិយោគទុន។
អគ្គនាយកនៃអគ្គនាយកដ្ឋានពន្ធដារ លោក គង់ វិបុល បានថ្លែងក្នុងសិក្ខាសាលាមួយនាព្រឹកនេះក្នុងខេត្តសៀមរាប ថា វិធានការថ្មីរបស់រដ្ឋាភិបាលដែលមាន ដូចជា ការកាត់បន្ថយតម្លៃអគ្គិសនី ការលុបចោលប័ណ្ណ និងអ្នកត្រួតពិនិត្យលិខិតបញ្ជាក់ប្រភពដើមទំនិញ ការលុបចោលកាំសាប និងកាត់បន្ថយថ្លៃពិនិត្យទូរកុងតឺន័រ ជាដើម បានធ្វើឲ្យពន្ធដារបាត់បង់ចំណូលពន្ធជាច្រើន ហើយដើម្បីជំនួសនូវការខាតបង់នេះ អគ្គនាយកជំរុញដល់ក្រុមហ៊ុន សណ្ឋាគារ ផ្ទះសំណាក់ និងអ្នកជាប់ពន្ធទាំងអស់ចូលរួមបង់ពន្ធទាំងអស់គ្នា ដើម្បីជៀសវាងនៅការពិន័យ និងទោសទណ្ឌ។
លោកថា៖ «ប្រទេសដែលគេអភិវឌ្ឍន៍ប្រទេសនោះមានអនុលោមភាពខ្ពស់ណាស់ពន្ធដារ។ អស់លោកមិនចាំបាច់សុបិន្តពី Highway ពីរបីជាន់ អំពីការផ្ដល់សេវា អំពីសាលារៀនUniversity អំពីសាលារៀន វិស័យអប់រំល្អប្រសើរទេ បើសិនថវិកាជាតិមិនមាននោះ។ ហើយថវិកាជាតិបានមកពីណា? គឺបានពីការបង់ពន្ធរបស់អស់លោកអ្នកហ្នឹងហើយ!»
លោកបន្ថែមថា ឆ្នាំ២០១៩ រដ្ឋបានរៀបចំប្រព័ន្ធនៃការបង់ពន្ធតាមប្រព័ន្ធអនឡាញ ដែលមានភាពច្បាស់លាស់ ហើយអ្នកជាប់ពន្ធទាំងអស់នឹងមិនអាចគេចមិនបង់ពន្ធបាននោះទេ។
អ្នកវិភាគសេដ្ឋកិច្ច លោក យ៉ង ប៉ាក់ គាំទ្រចំពោះការរៀបចំនេះ តែលោកលើកឡើងពីក្ដីបារម្ភទៅលើប្រសិទ្ធភាព និងនីតិវិធីនៃការប្រមូល។
លោកថា៖ «ទាំងគេទាំងយើង គឺឃើញដូចគ្នាហើយ គឺការប្រមូលពន្ធ គឺផ្ដោតលើការប្រមូលពន្ធលើអាជីវកម្មខ្នាតតូច តែខ្នាតធំអត់សូវមានព័ត៌មានពិតប្រាកដទេ។ ពន្ធដារគួរមានរបាយការណ៍ពិតប្រាកដ ថាខ្នាតតូចយើងប្រមូលបានប៉ុន្មាន ខ្នាតធំយើងប្រមូលបានប៉ុន្មាន? ដែលទាំងគេទាំងខ្ញុំមើលឃើញនោះ គឺយើងគួរតែពង្រឹងការប្រមូលពន្ធខ្នាតធំឲ្យបានខ្លាំងជាងមុន។ ហើយការកាត់ការងារបែបការិយាធិបតេយ្យហ្នឹង គឺជារឿងល្អបំផុតហើយ ព្រោះធ្វើឲ្យអ្នកវិនិយោគធំក៏គេចាប់អារម្មណ៍ដែរ» ។
បើតាមលោក គង់ វិបុល ចំណូលពន្ធឆ្នាំ២០១៩ គិតមកត្រឹមថ្ងៃទី២០ខែ កុម្ភៈនេះ អគ្គនាយកដ្ឋាននេះ ប្រមូលពន្ធបានជាង៦លានដុល្លារអាមេរិក។
កាលពីដើមខែធ្នូ ឆ្នាំ២០១៧ លោកនាយករដ្ឋមន្ត្រី ហ៊ុន សែន បានប្រកាសថា រដ្ឋាភិបាលគ្មានវិធានការដំឡើងពន្ធនោះទេ តែតំរូវឲ្យមានការប្រមូលពន្ធឲ្យអស់ ដើម្បីឲ្យកម្ពុជាមានប្រភពចំណូល និងអាចតំឡើងប្រាក់ខែដល់មន្ត្រីរាជការផងដែរ៕
