មន្ត្រីជាន់ខ្ពស់ក្រសួងសាធរណការ ឲ្យដឹងថា គម្រោងសាងសង់ផ្លូវល្បឿនលឿនពីភ្នំពេញទៅកាន់ខេត្តព្រះសីហុន គ្រោងនឹងចាប់ផ្ដើមការសាងសង់ជាផ្លូវការនៅខែក្រោយនេះហើយ ខណៈដែលអ្នកធ្វើការផ្នែកសុវត្ថិភាពចរាចរណ៍ចង់ឃើញលទ្ធផលនៃការសិក្សាផលប៉ះពាល់នៃការសាងសង់ផ្លូវនេះ។
អ្នកនាំពាក្យក្រសួងសារណការ និងដឹកជញ្ជូន លោក វ៉ា ស៊ីមសុរិយា ប្រាប់ VOD នៅព្រឹកនេះថា ក្រសួងគ្រោងធ្វើពិធីបើកការដ្ឋានសាងសង់ផ្លូវល្បឿនលឿនភ្នំពេញខេត្តព្រះសីហនុនៅក្នុងខែមីនាខាងមុខនេះ ដោយបញ្ជាក់ថា ផ្លូវនេះបានដំណើរការសាងសង់រួចខ្លះមកហើយ។
លោក វ៉ា ស៊ីមសុរិយា៖ «រឿងសាងសង់ វាចាប់ផ្តើមយូរមកហើយ គេធ្វើបណ្តើរៗ មានគេធ្វើរបង ដាក់គ្រឿងចក្រអីអញ្ចឹងទៅណា ប៉ុន្តែ ខែបីហ្នឹងគ្រាន់តែបើការដ្ឋានទេ។ ការងារវាអនុវត្តបន្តិចៗអញ្ចឹងទៅណា វាមិនមែនខែបីហ្នឹង យើងចាប់ផ្តើមតែម្តងដូចផ្ទះទេ។ អាហ្នឹង ធម្មតាការងារវាទៅអញ្ចឹង! ខែបីហ្នឹង គឺពិធីបើកការដ្ឋាន»។
អនុប្រធានវិទ្យាស្ថានសុវត្ថិភាពចរាចរណ៍ លោក គង់ រតនៈ សម្ដែងការអបអរ និងចង់ឲ្យអ្នកសិក្សាពីផលប៉ះពាល់នៃការសាងសង់ផ្លូវនេះបង្ហាញឲ្យដឹងផង។
លោក គង់ រតនៈ មានប្រសាសន៍ថា៖ «អ្វីដែលបារម្ភ គឺចំណេះដឹងទាក់ទងនឹងអ្នកបើកបរក្នុងការប្រើប្រាស់ផ្លូវ ប៉ុន្តែ អត់ទាន់ធ្វើហើយ អត់ទាន់ថាម៉េចទេ។ អ្វីដែលចង់ឃើញ គឺពេលដែលធ្វើហ្នឹង ចង់ឲ្យអ្នកដែលគាត់សិក្សាកន្លងមកហ្នឹង គាត់បង្ហាញថា តើគាត់បានសិក្សាពីផលប៉ះពាល់ ឬក៏សុវត្ថិភាព ហើយចង់ឲ្យបង្ហាញជាលក្ខណៈសាធារណៈ។ ឧទាហរណ៍ថា ម៉េចបានគាត់ជ្រើសយកផ្លូវចុះល្បឿនលឿន ឬផ្លូវឡើងល្បឿនលឿន ហើយចម្ងាយប៉ុន្មានដែលយានយន្តត្រូវធ្វើដំណើរ»។
អគ្គនាយករងនៃអគ្គនាយកដ្ឋានដោះស្រាយផលប៉ះពាល់របស់ក្រសួងសេដ្ឋកិច្ច និងហិរញ្ញវត្ថុ លោក យ៉េន សោភ័ណ្ឌ ប្រាប់ VOD ថា ក្រសួងមិនទាន់អាចជម្រាបបានពីការសិក្សាផលប៉ះផ្លូវនេះបាននៅឡើយទេ ដោយថា កំពុងដំណើរការរៀបចំ និងពិគ្រោះយោបល់ជាសាធារណៈ។
លោក យ៉េន សោភ័ណ្ឌ មានប្រសាសន៍ថា៖ «ឥឡូវយើងកំពុងតែរៀបចំដំណើរការចាប់ផ្តើម ប៉ុន្តែ ការដោះស្រាយយ៉ាងណា គឺយើងអត់ទាន់បានរួចរាល់។ អញ្ចឹងខ្ញុំជម្រាប Deatail (លម្អិត) អត់ទាន់ច្បាស់នៅឡើយ។ គម្រោង គឺយើងមានហើយ បានទទួលការឯកភាពពីប្រមុខរាជរដ្ឋាភិបាលហើយ ប៉ុន្តែ ការ Design (រៀបចំ) ជាការដោះស្រាយផលប៉ះពាល់ វាអត់ទាន់រួចរាល់បាទ។ យើងនឹងជួបប្រជាជននៅតាមគម្រោងដែលមានផលប៉ះពាល់ហ្នឹង គឺយើងនឹងធ្វើការពិគ្រោះយោបល់ជាសាធារណៈ បាទ»។
ក្រសួងសាធារណការ និងដឹកជញ្ជូន ក៏បានប្រកាសដឹងកាលពីចុងឆ្នាំ២០១៨ ថា គម្រោងសាងសង់ផ្លូវល្បឿនលឿនភ្នំពេញ-ខេត្តព្រះសីហនុ ជាខ្សែផ្លូវថ្មីទាំងស្រុងដែលមានប្រវែងសរុបប្រហែលជាង ១៩០គីឡូម៉ែត្រ ដោយគ្រោងចំណាយប្រមាណ ២ពាន់លានដុល្លារ ដែលជាកម្ចីសម្បទានពីប្រទេសចិន។
ផ្លូវនេះត្រូវសាងសង់ជា ៤គន្លង តួផ្លូវមានទទឹង ២៤ម៉ែត្រ ក្រាល AC មានសួនច្បារខណ្ឌកណ្តាលចេញពីភ្នំពេញនៅចំណុចផ្លូវខ្សែក្រវាត់ក្រុងទី៣។ ការវិនិយោគលើគម្រោងផ្លូវល្បឿនលឿននេះ ត្រូវអនុវត្តតាមទម្រង់សាងសង់ប្រតិបត្តិ និងផ្ទេរ (BOT) ដោយប្រើប្រាស់រយៈពេលសាងសង់ចំនួន ៤៨ខែ៕