មន្ត្រីជាន់ខ្ពស់នគរបាលជាតិ បានឲ្យដឹងថា សមត្ថកិច្ចរកឃើញអ្នកពាក់ព័ន្ធគ្រឿងញៀនជិត ៣០នាក់ នៅក្នុងចំណោមមនុស្សជាង ៣០០នាក់ ដែលត្រូវបានឃាត់ខ្លួននៅអំឡុងការបង្ក្រាបមួយនៅមជ្ឈមណ្ឌលកំសាន្តរ៉ក់កាលពីចុងសប្តាហ៍មុន។
អ្នកនាំពាក្យអគ្គស្នងការនគរបាលជាតិ លោក ឆាយ គឹមឃឿន ឲ្យ VOD ដឹងនៅរសៀលនេះ ថា សមត្ថកិច្ចរកឃើញអ្នកដែលពាក់ព័ន្ធនឹងការចែកចាយគ្រឿងចំនួន ២៩នាក់ និងបានអនុញ្ញាតិឲ្យអ្នកដែលអត់ពាក់ព័ន្ធត្រឡប់ទៅផ្ទះវិញហើយ ក្រោយមានការធានាពីអាណាព្យាបាល។
លោក ឆាយ គឹមឃឿន មានប្រសាសន៍ថា៖ «ទាំងអស់ ៣១១នាក់អូន! ក្នុងនោះយើងរកឃើញអ្នកពាក់ព័ន្ធតែ ២៩នាក់ទេ។ ៧១នាក់គាត់អត់មានពាក់ព័ន្ធអីទេ! ហើយឆែកទឹកម៉ូតគាត់(ទឹកនោម) ក៏អត់មានប្រើប្រាស់គ្រឿងញៀនដែរ និង ២៣១នាក់ យើងឆែកឃើញគាត់ប្រើប្រាស់! ឆែកទឹកម៉ូតនោះណា!។ សម្រាប់អ្នកទាំងអស់នោះ! អ្នកដែលអត់បានប្រើប្រាស់ទេ អាហ្នឹងអញ្ជើញមាតាបិតា ឬអាណាព្យាបាលធ្វើកិច្ចសន្យាយកគាត់ទៅអប់រំណែនាំយកទៅផ្ទះវិញ។ បើអ្នកមានសារធាតុញៀនជាប់ខ្លួន ក៏ត្រូវហៅអាណាព្យាបាលមកដែរ ដើម្បីធ្វើកិច្ចសន្យាយកគាត់ទៅអប់រំ កែប្រែ និងព្យាបាលបន្សាប»។
នៅពេលត្រូវបានសាកសួរអំពីវិធានការទៅលើឧកញ៉ា គិត ធាង ម្ចាស់មជ្ឈមណ្ឌលកម្សាន្តរ៉ក់ និងមនុស្សដទៃទៀតដែលជាប់ពាក់ព័ន្ធនឹងបទល្មើសគ្រឿងញៀននោះ អ្នកនាំពាក្យនគរបាលរូបនេះ មិនជម្រាបព័ត៌មានបន្ថែមទេ ដោយថា កំពុងដំណើរការនីតិវិធីបន្តទៀត។
ប្រធានអង្គការសម្ព័ន្ធគណនេយ្យភាពសង្គមកម្ពុជា លោក សន ជ័យ ដែលបានតាមដានករណីនេះ ជំរុញឲ្យមានការស៊ើបអង្កេតរកអ្នកទទួលខុសត្រូវរបស់ក្លឹបកំសាន្តមួយនេះ មកប្រឈមមុខនឹងផ្លូវច្បាប់។
លោក សន ជ័យ មានប្រសាសន៍ថា៖ «មុខសញ្ញាធំ ហើយជាមេរោគនៃសង្គម! យើងចង់ឃើញមានការស៊ើបអង្កេតឲ្យបានល្អិតល្អន់ ហើយនិងយកអ្នកទទួលខុសត្រូវពិតប្រាកដមកប្រឈមុខនឹងផ្លូវច្បាប់។ អ្នកទទួលខុសត្រូវពិតប្រាកដ គឺអ្នកគ្រប់គ្រង អ្នកដឹកនាំនៅក្នុងក្លឹបហ្នឹង! ពីព្រោះអី កម្សាន្តនេះ គឺជាមធ្យោបាយនៃការចែកចាយការប្រើប្រាស់គ្រឿងញៀន»។
ប្រធានផ្នែកស៊ើបអង្កេតនៃអង្គការលីកាដូ លោក អំ សំអាត បានអបអរសាទរចំពោះការចុះបង្ក្រាបនេះ ហើយលោកស្នើឲ្យអនុវត្តន៍នៅកន្លែងផ្សេងផង។
លោក អំ សំអាត មានប្រសាសន៍ថា៖ «យើងស្វាគមន៍ និងសាទរចំពោះការចុះបង្ក្រាបនេះ! ប៉ុន្តែ យើងក៏ទទូចសុំឲ្យធ្វើការចុះបង្ក្រាប ឬក៏ការទប់ស្កាត់បញ្ហាគ្រឿងញៀនហ្នឹងនៅកន្លែងផ្សេងៗទៀតទៅណា៎! ហើយខ្ញុំជឿថា នេះតែមួយកន្លែងទេ អាចនឹងមានច្រើនកន្លែងទៀត។ អញ្ចឹង សុំឲ្យអាជ្ញាធរហ្នឹងគាត់ធ្វើការអនុវត្តបន្តទៅទៀតទាក់ទងនឹងការបង្ក្រាបគ្រឿងញៀននេះ!»។
កាលពីថ្ងៃទី២៣ ខែកុម្ភៈ រដ្ឋបាលសាលារាជធានី បានសម្រេចបិទអាជីវកម្មមជ្ឈមណ្ឌលកម្សាន្តរ៉ក់ (Rock) ដើម្បីឲ្យតុលាការបន្តនីតិវិធីស្រាវជ្រាវ ក្រោយការចុះបង្ក្រាបកាលពីពេលទៀបភ្លឺថ្ងៃដដែល ដោយសមត្ថិកិច្ចឃាត់ខ្លួនជនសង្ស័យចំនួន ៣១១នាក់(ស្រី៥៦នាក់) និងដកហូតបានគ្រឿងញៀនគ្រប់ប្រភេទប្រហែល ៥០គីឡូក្រាម។
កាលពីឆ្នាំទៅម្ចាស់អាជីវកម្មសេវាកម្សាន្ត និងវិស័យទេសចរណ៍មួយចំនួន រួមទាំងម្ចាស់មជ្ឈមណ្ឌលកំសាន្តរ៉ក់ផង បានធ្វើកិច្ចសន្យាជាមួយអាជ្ញាធរ ដោយសន្យាមិនឲ្យមានការផលិត ជួញដូរ និងប្រើប្រាស់គ្រឿងញៀនក្នុងទីតាំងអាជីវកម្មរបស់ខ្លួន ក្រោយមានការព្រមានបង្រ្កាបពីសមត្ថកិច្ច។
មន្ត្រីអាជ្ញាធរជាតិប្រយុទ្ធប្រឆាំងគ្រឿងញៀនបានឲ្យដឹងថា បទល្មើសគ្រឿងញៀនសរុបជាង ៨ពាន់ករណី ត្រូវបានសមត្ថកិច្ចបង្ក្រាបបាននៅទូទាំងប្រទេសគិតចាប់តាំងពីដើមខែមករា រហូតដល់ត្រឹមថ្ងៃទី៣០ ខែធ្នូ ឆ្នាំ២០១៨ ក្នុងនោះបទល្មើសជួញដូរមានចំនួន ៥,០៥១ករណី និងបានឃាត់ខ្លួនអ្នកពាក់ព័ន្ធជា ១ម៉ឺន ៦ពាន់នាក់។
ពាក់ព័ន្ធនឹងរឿងគ្រឿងញៀនដែរ កាលពីពេលថ្មីៗនេះ រដ្ឋមន្ត្រីក្រសួងមហាផ្ទៃ បានឲ្យដឹងថា អ្នកជាប់ឃុំប្រមាណ ២ ភាគ ៣ មានជាប់ពាក់ព័ន្ធនឹងបទល្មើសគ្រឿងញៀន ហើយក្នុងនោះ អ្នកជាប់ឃុំជាច្រើន មិនទាន់ត្រូវបាននាំទៅជម្រះក្ដីនៅឡើយទេ ដែលជាបញ្ហាប្រឈមក្នុងការគ្រប់គ្រងពន្ធនាគារ និងអ្នកកំពុងជាប់ឃុំ៕
