របាយការណ៍សិក្សាស្រាវជ្រាវស្តីពីហេតុប៉ះពាល់បរិស្ថានហៅកាត់ថា EIA ចំនួន១០របាយការណ៍ ត្រូវបានបង្ហោះនៅលើគេហទំព័រនៃអង្គការប្រព័ន្ធទិន្នន័យអំពីការអភិវឌ្ឍ (ODC) និងដាក់ឲ្យសាធារណៈជនចូលមើលចាប់ពីព្រឹកថ្ងៃអង្គារ ទី២៦ ខែកុម្ភៈ ឆ្នាំ២០១៩ ក្នុងសិក្ខាសាលាស្តីពីការផ្សព្វផ្សាយគេហទំព័រ EIA នៅសណ្ឋាគារមួយក្នុងរាជធានីភ្នំពេញ។
នាយកប្រតិបត្តិអង្គការ ODC លោក ធី ទ្រី មានប្រសាសន៍ថា របាយការណ៍ទាំង១០ដែលបានបង្ហោះលើគេហទំព័រ www.opendevelopmentcambodia.net/km/ គឺជារបាយការណ៍ដែលមិនទាន់ចុងក្រោយនៅឡើយទេ។
លោកមានប្រសាសន៍ថា៖ «[របាយការណ៍]អត់ទាន់បានពេញលេញ (full) ដោយសារប្រហែលរដ្ឋាភិបាលអត់មានពេលវេលា និងធនធានឬអាចឆ្លងកាត់នីតិវិធីច្រើន។»
យោងតាមទំព័រស្តីពីការសិក្សាស្រាវជ្រាវហេតុប៉ះពាល់បរិស្ថាន ដែលបង្ហោះត្រឹមថ្ងៃអង្គារ ទី២៦ ខែកុម្ភៈនេះ បង្ហាញពីរបាយការណ៍ដែលក្រុមហ៊ុនចិនចំនួន៣ ក្រុមហ៊ុនវៀតណាម១ ក្រុមហ៊ុនអាមេរិក១ ក្រុមហ៊ុនកូរ៉េ១ ក្រុមហ៊ុនកម្ពុជា២ ក្រុមហ៊ុនរស្ស៊ី១ និងក្រុមហ៊ុនសឹង្ហបូរី១ បានធ្វើការសិក្សាពីផលប៉ះពាល់បរិស្ថាន។ ក្រុមហ៊ុនដែលបានធ្វើការសិក្សាផលប៉ះពាល់បរិស្ថាននេះ គឺជាក្រុមហ៊ុនដែលទទួលបានដីសម្បទានសេដ្ឋកិច្ច ក្រុមហ៊ុនរុករករ៉ែ វារីអគ្គីសនី សម្បទានកោះ និងរុករកប្រេង និងឧស្ម័នជាដើម។
យោងតាមគេហទំព័រប្រព័ន្ធទិន្នន័យ ODC បង្ហាញថា សប្បទានដីសេដ្ឋកិច្ចមានក្នុងបញ្ជីចំនួន២៨៦ និងអាជ្ញាប័ណ្ណរុករករ៉ែមានក្នុងបញ្ជីចំនួន២៦៧អាជ្ញាប័ណ្ណ។
អ្នកនាំពាក្យក្រសួងបរិស្ថាន លោក នេត ភក្ត្រា មានប្រសាសន៍អបអរសាទរចំពោះការដាក់ឲ្យប្រើប្រាស់ទំព័រថ្មីស្តីពីរបាយការណ៍ហេតុប៉ះពាល់បរិស្ថាន ដោយបញ្ជាក់ថា វានឹងជួយដល់ការទទួលបានព័ត៌មានរបស់ប្រជាពលរដ្ឋ។ លោក នេត ភក្ត្រា ស្នើទៅអង្គការមិនមែនរដ្ឋាភិបាលឲ្យដាក់តែផ្នែកណាមួយដែលមិនប៉ះពាល់ដល់ព័ត៌មាន ដែលលោកចាត់ទុកថាជាព័ត៌មានសម្ងាត់របស់ក្រុមហ៊ុន។
លោកមានប្រសាសន៍ថា៖ «ខ្ញុំមិនគាំទ្រការបង្ហោះរបាយការណ៍ទាំងដុលទេ ពីព្រោះថា វានឹងប៉ះពាល់ដល់ការសម្ងាត់ ឬភាពឯកជនរបស់ក្រុមហ៊ុនវិនិយោគ។ របាយការណ៍គួរតែដាក់តែមួយផ្នែក ឬគួរលុបមួយផ្នែកណាមួយ។ ព័ត៌មានសម្ងាត់អាចទាក់ទងនឹងសង្វាក់ផលិតកម្ម ទុនវិនិយោគ ដោយសារថាវាអាចនឹងប៉ះពាល់ដល់ការប្រកួតប្រជែង។»
បើតាមលោក នេត ភក្រ្តា ក្រសួងបរិស្ថានកំពុងតែរៀបចំគេហទំព័រថ្មីដែលគ្រោងនឹងបញ្ចប់នៅក្នុងខែមិនានេះ និងការប្រើប្រាស់បណ្តាញសង្គមរបស់ក្រសួងដើម្បីបង្ហោះរបាយការណ៍ ឬព័ត៌មានពាក់ព័ន្ធផ្សេងៗទៀត។ លោកបញ្ជាក់ថា ក្រសួងក៏កំពុងរៀបចំជាបណ្ណាល័យឌីជីថល (E-library) ដើម្បីសម្រួលដល់ការស្វែងរកព័ត៌មាន និងការសិក្សាស្រាវជ្រាវរបស់សាធារណៈជន។
លោក ធី ទ្រី មានប្រសាសន៍ថា អង្គការ ODC នឹងពិនិត្យលទ្ធភាពដើម្បីបង្ហោះរបាយការណ៍ EIA ចំនួនពី២០ ទៅ៣០របាយការណ៍បន្ថែមទៀត ទៅក្នុងគេហទំព័រ https://opendevelopmentcambodia.net/km/ នៅឆ្នាំ២០១៩នេះ។
រាជរដ្ឋាភិបាលកម្ពុជាបានចេញអនុក្រិត្យស្តីពីកិច្ចដំណើរការវាយតម្លៃហេតុប៉ះពាល់បរិស្ថានកាលពីឆ្នាំ១៩៩៩។ អនុក្រិត្យនោះបានកំណត់ថា ម្ចាស់គម្រោងត្រូវធ្វើរបាយការណ៍វាយតម្លៃហេតុប៉ះពាល់បរិស្ថានដំបូង ចំពោះគម្រោងដែលតម្រូវឲ្យមានការវាយតម្លៃហេតុប៉ះពាល់បរិស្ថាន។
បើតាមលោក ធី ទ្រី ក្រុមហ៊ុនដែលទទួលបានសិទ្ធិសម្បទានដីសេដ្ឋកិច្ច ក្រុមហ៊ុនរុករករ៉ែ មួយចំនួនកំពុងតែធ្វើប្រតិបត្តិការដោយពុំមានការសិក្សាពីហេតុប៉ះពាល់បរិស្ថានជាមុន។
គេហទំព័រទិន្នន័យអំពីការអភិវឌ្ឍត្រូវបានបង្កើតឡើងនៅក្នុងឆ្នាំ២០១១។ គេទំព័រនេះគឺជាប្រព័ន្ធទិន្នន័យដែលផ្ទុកដោយព័ត៌មាន របាយការណ៍ដែលទាក់ទងនឹងការការវិនិយោគ គម្រោងសម្បទានដីសេដ្ឋកិច្ច ក្រុមហ៊ុនរុករករ៉ែ។ល។ របាយការណ៍ស្តីពីការសិក្សាហេតុប៉ះពាល់បរិស្ថាន EIA គឺជារបាយការណ៍ផ្នែកថ្មីដែលអង្គការ ODC ទើបបានបង្ហោះជាផ្នែកមួយនៃគេហទំព័រប្រព័ន្ទទិន្នន័យអំពីការអភិវឌ្ឍនេះ៕