មន្ត្រីសាលាដំបូងខេត្តសៀមរាបឲ្យដឹងថា សំណុំរឿងអ្នកព័ត៌មានដែលរងហិង្សាពីសមាជិកសហគមន៍បឹងពារាំងបានទៅដល់ដៃតុលាការហើយ និងកំពុងបន្តនីតិវិធីស៊ើបអង្កេត។
អ្នកនាំពាក្យសាលាដំបូងខេត្តសៀមរាប លោក យិន ស្រាង ប្រាប់ VOD នៅព្រឹកនេះថា សំណុំរឿងនោះបានទៅដល់ដៃតុលាការហើយ។
លោក យិន ស្រាង៖ «សំណុំរឿងមកដល់អយ្យាការហើយ គេចុះបញ្ជីហើយ បានគេបញ្ជូនទៅការិយាល័យព្រះរាជអាជ្ញា ដើម្បីចាត់តំណាងអយ្យការចាត់ការបន្តទៀតណា៎!»។
កាលពីអំឡុងចុងខែមករាមុននេះ លោក ស៊ីម ឈីវឈានពិសិដ្ឋ ដែលគេស្គាល់ថា ជាអ្នកយកព័ត៌មាននៅសមាគមអ្នកសារព័ត៌មានកម្ពុជាដើម្បីសេរីភាព បានចុះទៅយកព័ត៌មានពីបទល្មើសនេសាទនៅសហគមន៍ទេសចរណ៍វប្បធម៌ធម្មជាតិបឹងពារាំង។ លោកអះអាងថា បានជួបហេតុការណ៍ហិង្សាបង្កដោយសមាជិកសហគមន៍នោះរហូតសន្លប់។
លោក ស៊ីម ឈីវឈានពិសិដ្ឋ បានចោទចំឈ្មោះ លោក គង់ មង្គល ប្រធានសមាគមសហគមន៍ទេសចរណ៍វប្បធម៌ធម្មជាតិបឹងពារាំង ថាជាអ្នកបញ្ជាឲ្យប្រព្រឹត្តហិង្សាលើរូបលោក ប៉ុន្តែ លោក គង់ មង្គល បានបដិសេធចំពោះការចោទប្រកាន់នេះ ដោយថា លោកជាអ្នកចូលអន្តរាគមន៍ជួយជនរងគ្រោះទៅវិញទេ។