រដ្ឋាភិបាលជប៉ុនជំរុញទៅកាន់អ្នកវិនិយោគរបស់ខ្លួនឲ្យមកបោះទុននៅកម្ពុជា ដោយថា ចង់យកកម្ពុជាជាប្រទេសដំបូងគេនៃការចាប់ផ្តើមអនុវត្តនយោបាយជប៉ុន ក្នុងការរៀបចំហេដ្ឋារចនាសម្ព័ន្ធ និងអចលនទ្រព្យនៅក្នុងតំបន់អាស៊ាន។
ថ្លែងក្នុងវេទិកាសាធារណៈលើកទី១ ស្ដីពីការអភិវឌ្ឍនគរូបនីយកម្ម កម្ពុជា-ជប៉ុន នៅព្រឹកនេះ អនុរដ្ឋមន្ត្រីក្រសួងដីធ្លី ហេដ្ឋារចនាសម្ព័ន្ធ ដឹកជញ្ជូន និងទេសចរណ៍ជប៉ុន លោក Yuki Fumihiko បានលើកឡើងថា រដ្ឋាភិបាលជប៉ុនចង់នាំមកនូវការរៀបចំហេដ្ឋារចនាសម្ព័ន្ធ និងអចលនទ្រព្យរបស់ប្រទេសជប៉ុនមកកាន់អាស៊ាន ហើយកម្ពុជាជាចំណុចចាប់ផ្ដើមនៃនយោបាយនេះ។ លោកជំរុញដល់អ្នកវិនិយោគរបស់ខ្លួនដែលមានជិត៦០ក្រុមហ៊ុន ដែលមានវត្តមាននៅក្នុងវេទិកានេះឲ្យចូលរួមក្នុងគោលនយោបាយនេះផងដែរ។
លោកថា៖ «យើងចង់បង្កើតនូវតំបន់គំរូមួយដែលយើងជ្រើសរើសយកកម្ពុជាជាប្រទេសដំបូងក្នុងការបង្កើតនូវគម្រោងនេះ។ សង្ឃឹមថាទទួលបានការសហការអំពីឯកឧត្ដម លោកជំទាវ និងភ្ញៀវកិត្តិយសទាំងអស់ ដើម្បីសម្រេចបាននូវគម្រោងអភិវឌ្ឍន៍សាកល្បងមួយនេះ » ។
ឧបនាយករដ្ឋមន្ត្រីក្រសួងរៀបចំដែនដីកម្ពុជា លោក ជា សុផារ៉ា មានប្រសាសន៍ក្នុងវេទិកានោះផងដែរ ថាប្រទេសកម្ពុជាគាំទ្រគំនិតផ្ដួចផ្ដើមនេះ ដោយថា ដើម្បីជាប្រយោជន៍ដល់ប្រទេសទាំងពីរ ខណៈរាជធានីភ្នំពេញ ក្រុងបាត់ដំបង និងក្រុងសៀមរាប ក៏ត្រូវបានជប៉ុនជួយរៀបចំឲ្យក្លាយជាទីក្រុងវៃឆ្លាតអាស៊ានផងដែរ។
លោកថា៖ «ខ្ញុំសូមថ្លែងអំណរគុណចំពោះរដ្ឋាភិបាលជប៉ុន ដែលបានសម្រេចជ្រើសរើសកម្ពុជាជាប្រទេសទីមួយ ក្នុងចំណោមប្រទេសអាស៊ាន។ សម្រាប់រៀបចំវេទិកាសាធារណៈឯកជនដំបូងគេ ដើម្បីអភិវឌ្ឍនគរូបនីយកម្ម ដែលបានបង្ហាញការជឿជាក់របស់អ្នកវិនិយោគជប៉ុនលើសក្ដានុពលសេដ្ឋកិច្ចកម្ពុជា»។
ក្រុមហ៊ុនជប៉ុនដែលមានវត្តមានក្នុងវេទិកានេះ រួមមាន ក្រុមហ៊ុនអភិវឌ្ឍន៍វិស័យអចលនទ្រព្យ សំណង់ ស្ថាបត្យកម្ម លំនៅឋាន ធនាគារ និងក្រុមហ៊ុនធានារ៉ាប់រង។
បើតាមលោក ជា សុផារ៉ា គិតមកដល់ពេលនេះ ក្រុមហ៊ុនជប៉ុនដែលមកវិនិយោគនៅកម្ពុជាមានចំនួន៨៦ក្រុមហ៊ុន ដែលមានតម្លៃវិនិយោគជាង ៤២៥លានដុល្លារ និងបានផ្ដល់ការងារដល់ពលរដ្ឋកម្ពុជាជាង២ម៉ឺននាក់៕
