លោកនាយករដ្ឋមន្ត្រី ហ៊ុន សែន សម្រេចដកអភិបាលរងខេត្តព្រះសីហនុ២រូបចេញពីតំណែងបន្ទាប់ពីមានភាពប្រក្រតីនៃជម្លោះដីធ្លីមួយចំនួននៅខេត្តព្រះសីហនុ និងប្រើហិង្សាលើពលរដ្ឋដែលតវ៉ា។
ក្នុងអនុក្រឹត្យចុះថ្ងៃទី១ ខែមីនា នេះ លោក ហ៊ុន សែន បានសម្រេចដកអភិបាលរងខេត្តព្រះសីហនុពីររូបដែលមាន លោក ស្រ៊ុន ស្រ៊ន់ និងលោក ផៃ ប៊ុនវណ្ណៈ ចេញពីតំណែង ដោយមិនបានបញ្ជាក់មូលហេតុនោះទេ។
ទោះជាយ៉ាងណាការដកអ្នកទាំងពីរនេះ គឺបន្ទាប់ពីលោកនាយករដ្ឋមន្ត្រីប្រជុំកាលពីម្សិលមិញជាមួយឧត្តមក្រុមប្រឹក្សាពិគ្រោះ និងផ្ដល់យោបល់ដើម្បីសួរដេញជុំវិញភាពអសកម្មរបស់អាជ្ញាធរ ដែលក្នុងនោះក៏មានការលើកឡើងពីភាពមិនប្រក្រតីនៃការអនុវត្តសាលដីការបស់រដ្ឋបាលខេត្តព្រះសីហនុផងដែរ ។
លោក ហ៊ុន សែន បានសរសេរនៅលើហ្វេសបុកលោកថា ការដកអភិបាលរងខេត្តពីរនាក់នេះ គឺជាការអនុវត្តអភិក្រមទី៥របស់លោក ដោយលោកថា ចាប់ពីពេលនេះតទៅ លោកគ្មានពេលនិយាយច្រើនជាមួយមន្ត្រីខិលខូចទៀតទេ ដើម្បីឲ្យរដ្ឋាភិបាលលោកអាចដើរទៅមុខទៀតបាន។
លោកសរសេរថា៖ «ថ្ងៃនេះខ្ញុំបង្ខំចិត្តអនុវត្តអភិក្រមទី៥ គឺការវះកាត់ ដោយដកអភិបាលរងខេត្តព្រះសីហនុពីររូបចេញពីតំណែង។ ខ្ញុំត្រូវតែយកគ្រាប់ក្រួស និងខ្សាច់ចេញពីស្បែកជើងទើបអាចដើរទៅមុខទៀតបាន។ ខ្ញុំគ្មានពេលនិយាយច្រើនជាមួយមន្ត្រីខិលខូចទៀតទេ ព្រោះខ្ញុំបានអប់រំពួកគេច្រើនហើយ។ ដល់ពេលនេះ ខ្លាក៏ត្រូវវាយ ពស់ក៏ត្រូវវាយ កណ្ដុរក៏ត្រូវវាយ រុយក៏ត្រូវវាយ អោយតែបំពានលើផលប្រយោជន៍ប្រជាជន» ។
លោកនាយករដ្ឋមន្ត្រីក៏បានបន្ថែមផងដែរថា អភិបាលរងខេត្តទាំងពីរដែលរងការដកតំណែងនេះ ក៏នឹងត្រូវប្រគល់ភារកិច្ចដល់អង្គភាពប្រឆាំងអំពើពុករលួយ និងក្រសួងមហាផ្ទៃមានចំណាត់ការផងដែរ។
នាយកប្រតិបត្តិសម្ព័ន្ធគណនេយ្យសង្គមលោក សន ជ័យ យល់ថា ការដកអភិបាលរងខេត្តពីរនាក់នេះនៅមិនទាន់គ្រប់គ្រាន់នោះទេ ដោយសារការអនុវត្តកិច្ចការក្នុងខេត្តមួយគឺមានការពាក់ព័ន្ធនឹងបុគ្គលច្រើនរូប ខណៈលោកជំរុញឲ្យមានការស៊ើបអង្កេតបន្ថែមទៀតផងដែរ។
លោកថា៖ « យើងក៏ចង់ដឹងដែរថា តើអំពើហិង្សានេះកើតឡើងតាមរយៈការសម្រេចចិត្តរបស់អភិបាលរងខេត្តទាំងពីររូបនេះ មួយក៏មានចំណែកអ្នកណាផ្សេងទៀតដែរ។ ដូច្នេះយើងចង់ឃើញការទទួលខុសត្រូវដោយផ្ទាល់ទៅលើការបង្ក្រាបទៅលើពលរដ្ឋដែលរងគ្រោះនេះ » ។
កាលពីថ្ងៃទី២៤ ខែមករា អភិបាលរងខេត្តព្រះសីហនុ លោក ផៃ ប៊ុនវណ្ណៈ បានដឹកនាំកម្លាំងចម្រុះ ៣០០នាក់ ក្នុងនោះមានទាំងកម្លាំងយោធាផងដែរ ចុះទៅអនុវត្តសាលដីកាទាក់ទិនទៅនឹងជម្លោះដីធ្លីនៅភូមិគគរ ឃុំបិតទ្រាំង ស្រុកព្រៃនប់ ដើម្បីវាស់វែងដីឲ្យអ្នកស្រី ហុង សួន ភរិយារបស់ឧកញ៉ា ស៊ីវ គង់ទ្រីវ ខណៈមានពលរដ្ឋរាប់រយនាក់តវ៉ា ដុតកង់ឡានបិទផ្លូវ ប្រឆាំងការចុះអនុវត្តសាលដីកានោះ ដោយអះអាងថា ចំណាត់ការនោះ រំលោភដីរបស់ពួកគាត់។
ក្នុងហេតុការណ៍ប៉ះទង្គិចគ្នានោះ សមត្ថកិច្ចបានផ្ទុះអាវុធច្រើនគ្រាប់ ហើយក៏បានយកកាំភ្លើង AK វាយដំលើពលរដ្ឋម្នាក់ ដែលគេចងដៃទៅក្រោយដែរ។
ចំណែកពលរដ្ឋម្នាក់ស្ថិតក្នុងហេតុការណ៍នោះ បានរងរបួសដោយគ្រាប់បៀមជាប់ឆ្អឹងខ្នង ហើយត្រូវគ្រួសារបញ្ជូនមកវះកាត់នៅមន្ទីរពេទ្យនៅរាជធានីភ្នំពេញ។
ជាងមួយខែមកនេះ សមត្ថកិច្ចខេត្តព្រះសីហនុ មិនទាន់វែកមុខខ្មាន់កាំភ្លើង បាញ់ពលរដ្ឋឲ្យរងរបួសក្នុងហេតុការណ៍នោះមកផ្ដន្ទាទោសនៅឡើយទេ ក្រៅពីមានចំណាត់ការទៅលើមន្ត្រីមួយចំនួនដែលគេអះអាងថា បានប្រើស្វាយកាំភ្លើងវាយដំទៅលើពលរដ្ឋ ដែលគេចាប់ចងដៃទៅក្រោយហើយនោះ៕