អ្នកនាំពាក្យអគ្គស្នងការនគរបាលជាតិ លើកឡើងថា សមត្ថកិច្ចមានតម្រុយមួយចំនួនហើយជុំវិញករណីប្លន់ធនាគារ RHB ទាំងកណ្ដាលថ្ងៃត្រង់ កាលពីខែសីហា ឆ្នាំមុន។
នេះបើតាមបញ្ជាក់របស់អ្នកនាំពាក្យអគ្គស្នងការនគរបាលជាតិ លោក ឆាយ គឹមខឿន ដល់អ្នកសារព័ត៌មាន វី.អូ.ឌី នៅរសៀលថ្ងៃនេះ។
លោក មានប្រសាសន៍ថា៖ « យើងមានហើយតម្រុយ តែការសន្និដ្ឋានឲ្យបាន១០០ភាគរយ គឺយើងនៅចាំឲ្យច្បាស់ជាងនេះសិន។ […] ព្រោះបទឧក្រិដ្ឋ ជួនកាលប៉ូលិសខ្មែររកឃើញភ្លាម តែរឿងខ្លះក៏ពិបាករកដែរ » ។
ករណីប្លន់ធនាគារនេះបានកើតឡើងទាំងកណ្តាលថ្ងៃត្រង់កាលពីចុងខែសីហា ឆ្នាំ២០១៨ នៅធនាគារ RHB IndoChina Bank ម្ដុំសាលាវ៉ាន់ដា តាមបណ្ដោយផ្លូវម៉ៅសេទុង សង្កាត់ទំនប់ទឹក ខណ្ឌចំការមន រាជធានីភ្នំពេញ។
តាមការចុះផ្សាយរបស់អគ្គស្នងការដ្ឋាននគរបាលជាតិឲ្យដឹងថា ក្រុមចោរប្លន់នោះមានគ្នា៥នាក់។ ហេតុការណ៍ប្លន់ប្រដាប់អាវុធនោះ មិនបានបង្កឲ្យមានរណាម្នាក់រងរបួសទេ៕
