គណៈកម្មការសាងសង់ព្រលានយន្តហោះថ្មីនៅខេត្តកណ្តាល និងតាកែវ ជំរុញឲ្យភាគីក្រុមហ៊ុនដែលទទួលបន្ទុកអនុវត្តគម្រោង ជ្រើសរើសបុគ្គលិកចេញពីមូលដ្ឋានឲ្យអស់លទ្ធភាព។
យោងតាមការសេចក្តីប្រកាសព័ត៌មានរបស់ក្រសួងដែនដី គណៈកម្មការរៀបចំទីតាំងគម្រោងសាងសង់អាកាសយានដ្ឋានអន្តរជាតិភ្នំពេញថ្មីកាលពីម្សិលមិញ បានបើកកិច្ចប្រជុំជាលើកដំបូងជាមួយភាគីពាក់ព័ន្ធក្នុងការអនុវត្តគម្រោងនេះ។ ប្រភពដដែលឲ្យដឹងថា ក្រោយកិច្ចប្រជុំនោះគណៈកម្មការនេះ បានស្នើឲ្យក្រុមហ៊ុនប្រើប្រាស់ធនធានមនុស្សក្នុងស្រុកទាំងអ្នកជំនាញ និងអ្នកគ្មានជំនាញឱ្យអស់លទ្ធភាព ក្នុងការអនុវត្តគម្រោងសាងសង់អាកាសយានដ្ឋានអន្តរជាតិភ្នំពេញថ្មីនេះ។
ប្រធានគណៈកម្មការរៀបចំគម្រោងសាងសង់អាកាសយានដ្ឋានអន្តរជាតិភ្នំពេញថ្មី លោក ជា សុផារ៉ា បានប្រាប់ VOD បន្ថែមនៅព្រឹកនេះថា លោកបានសំណូមពរដល់ក្រុមហ៊ុនឲ្យទទួលយកពលរដ្ឋដែលរស់នៅនៅក្បែរតំបន់ដែលត្រូវសាងសង់ធ្វើជាបុគ្គលិក ដើម្បីឲ្យពួកគាត់ទទួលបានផលប្រយោជន៍ និងបានជិតកន្លែងធ្វើការផង។
លោក ជា សុផារ៉ា មានប្រសាសន៍ថា៖ «ខ្ញុំសំណូមពរឲ្យក្រុមហ៊ុនហ្នឹង! ខ្លាចយកមនុស្សពីណាពីណីមក វានាំឲ្យបងប្អូននៅក្បែរភូមិសាស្ត្រហ្នឹងបាត់បង់នូវផលប្រយោជន៍។ ហើយទី២ ធ្វើដំណើរហ្នឹង ខាតពេលវេលា ស្ទះចរាចរណ៍ពេញតែផ្លូវឥតអំពើ។ ហើយបើយកបងប្អូននៅនេះជិតផង ងាកមកសម្រាកនៅផ្ទះហ្នឹង រកការងារធ្វើឲ្យបងប្អូន យកកម្លាំងនៅហ្នឹង ធ្វើការនៅហ្នឹង វាមានភាពសុខុដុមជាង!»។
ប្រធានអង្គការសម្ព័ន្ធគណនេយ្យភាពសង្គមកម្ពុជា លោក សន ជ័យ គាំទ្រចំពោះសំណើនេះ និងសំណូមពរបន្ថែមដល់អ្នកទទួលខុសត្រូវថា កុំដាក់បញ្ចូលជនបរទេសមកច្រើនពេក។
លោក សន ជ័យ មានប្រសាសន៍ថា៖ «ព្រោះកន្លង យើងឃើញថា រាល់សំណង់ផ្សេងៗហ្នឹងមានជនបរទេសច្រើនគួរសមដែរ! មានចិនមានយួនអីជាដើមហ្នឹងណា! បាទ អញ្ចឹងធនធានមនុស្សកម្ពុជាយើងកំពុងតែនៅសល់ អញ្ចឹងទៅ! ការដាក់បញ្ចូលនូវធនធានមនុស្សដែលជាម្ចាស់ស្រុកហ្នឹងឲ្យបានច្រើន ទោះក្នុងកម្រិតបច្ចេកទេសក្តី នៅក្នុងកម្រិតកិច្ចការងារដែលអ្នកស្រុកអ្នកភូមិអាចធ្វើបាន គឺជារឿងល្អ!»។
VOD នៅមិនទាន់អាចសុំការឆ្លើយតបពី ក្រុមហ៊ុន OCIC និង ខេមបូឌា អ៊ែរផត អ៊ិនវេសមិន បាននៅឡើយទេនៅថ្ងៃនេះ។
ក្នុងកិច្ចប្រជុំកាលពីម្សិលមិញនោះ គណៈកម្មការរៀបចំគម្រោងសាងសង់អាកាសយានដ្ឋានអន្តរជាតិភ្នំពេញថ្មី ក៏បានសម្រេចប្រគល់ភារកិច្ចជូនរដ្ឋបាលខេត្តកណ្តាល រដ្ឋបាលខេត្តតាកែវ និងអគ្គនាយកដ្ឋានសុរិយោដី និងភូមិសាស្ត្រ កំណត់អត្តសញ្ញាណប្រជាពលរដ្ឋដែលមានដីនៅក្នុងទីតាំងគម្រោងឲ្យបានច្បាស់លាស់ ដោយផ្អែកទៅតាមការកាន់កាប់ជាក់ស្តែង និងឯកសារពាក់ព័ន្ធ ដើម្បីមានមូលដ្ឋានក្នុងការដោះស្រាយផលប៉ះពាល់។
អាកាសយានដ្ឋានលំដាប់អន្តរជាតិថ្មីនេះមានទីតាំងនៅក្រុងតាខ្មៅ និង ស្រុកកណ្តាលស្ទឹង ខេត្តកណ្តាល និង ផ្នែកខ្លះក្នុងស្រុកបាទី ខេត្តតាកែវ។ វាគ្រប់ដណ្ដប់លើផ្ទៃដីទំហំប្រមាណ ២ ៦០០ហិកតា និង គ្រោងចំណាយប្រាក់ ១ ៥០០លានដុល្លារ ហើយស្ថិតក្រោមការគ្រប់គ្រងរបស់ក្រុមហ៊ុន ខេមបូឌា អ៊ែរផត អ៊ិនវេសមិន។
ថវិការបស់ក្រុមហ៊ុននេះ បានមកពីប្រាក់កម្ចីធនាគារបរទេសចំនួន ១ ១០០ លានដុល្លារ កម្ចីពីភាគទុនក្រុមហ៊ុន OCIC ចំនួន ២៨០លានដុល្លារ និងដើមទុនចុះបញ្ជីចំនួន ១២០លានដុល្លារ ក្នុងទុនវិនិយោគទាំងនោះមាន ៩០ភាគរយជារបស់ក្រុមហ៊ុន OCIC និង ១០ភាគរយទៀត ជារបស់រដ្ឋលេខាធិការដ្ឋានអាកាសចរស៊ីវិល តំណាងរាជរដ្ឋាភិបាលកម្ពុជា។
បច្ចុប្បន្ន កម្ពុជាមានព្រលានយន្តហោះអន្តរជាតិ ធំៗចំនួន៣ហើយ ដែលមានទីតាំងនៅរាជធានីភ្នំពេញ ខេត្តសៀមរាប និងខេត្តព្រះសីហនុ ៕