លោកនាយករដ្ឋមន្ត្រី ហ៊ុន សែន បានអះអាងជាថ្មីថា លោកនឹងមិនបិទបណ្ដាញទំនាក់ទំនងសង្គម Facebook នោះឡើយ ប៉ុន្តែ លោកបានជំរុញឲ្យបង្កើតច្បាប់ ដើម្បីគ្រប់គ្រងលើឧក្រិដ្ឋកម្មតាមប្រព័ន្ធអ៊ីនធឺណិត។
លោក ហ៊ុន សែន បានប្រកាសបែបនេះ អំឡុងពេលលោកថ្លែងក្នុងពិធីបើកការដ្ឋានសាងសង់សំណង់ការពារទឹកជំនន់ និងកែលម្អប្រព័ន្ធប្រឡាយ-លូ នៅរាជធានីភ្នំពេញ នៅព្រឹកថ្ងៃនេះ។
លោក ហ៊ុន សែន បានអះអាងថា សារព្រមានបិទបណ្តាញសង្គមហ្វេសប៊ុក កាលពីថ្ងៃទី២៥ ខែកុម្ភៈ គឺជាស្នាដៃរបស់ក្រុមឧក្រិដ្ឋជនបច្ចេកវិទ្យា មិនមែនជាស្នាដៃរបស់លោកឡើយ ហើយលោកក៏គ្មានបំណងបិទហ្វេសប៊ុកមិនឱ្យប្រើប្រាស់នោះទេ ដោយថា ពលរដ្ឋត្រូវការប្រើប្រាស់បណ្តាញសង្គមមួយនេះ រួមទាំងលោកផងដែរ។
ជាមួយគ្នានេះ លោកថា ក៏មានមនុស្សមួយចំនួនប្រើប្រាស់បណ្តាញសង្គមមួយនេះក្នុងន័យមិនល្អ ដែលទាមទារឱ្យមានការអប់រំ និងវិធានការច្បាប់ប្រឆាំងព័ត៌មានក្លែងក្លាយ និងច្បាប់ប្រយុទ្ធប្រឆាំងឧក្រិដ្ឋកម្មអ៊ិនធឺណិតផងដែរ។
លោកបន្តថា៖ «ច្បាស់ណាស់ថា យើងនឹងទទួលផលបានប្រយោជន៍ពីវាតែម្តង ប៉ុន្តែ ក៏មានអ្នកប្រើប្រាស់ក្នុងផ្លូវអវិជ្ជមានដែរ ហើយរឿងនេះយើងក៏ត្រូវការអប់រំជាបណ្តើរៗ ក្នុងចំណោមប្រជាពលរដ្ឋរបស់យើងទៅលើការប្រើប្រាស់ពាក្យសម្តី ហើយក៏ដូចជាវិធានការច្បាប់មួយចំនួនផងដែរ។ នៅប្រទេសមួយចំនួនបានបង្កើតច្បាប់ប្រយុទ្ធប្រឆាំងនឹងព័ត៌មានក្លែងក្លាយហើយៗ នៅប្រទេសមួយចំនួនកំពុងរួមគ្នាប្រយុទ្ធប្រឆាំងនឹងបទឧក្រិដ្ឋកម្មអ៊ិនធឺណិត គេហៅថា ឧក្រិដ្ឋកម្មខាងព័ត៌មានវិទ្យា អីចឹងកម្ពុជាក៏គួរគិតគូរអំពីបញ្ហានេះផងដែរ»។
ទំព័រហ្វេសប៊ុកផ្លូវការរបស់លោកនាយករដ្ឋមន្ត្រី ហ៊ុន សែន បានអះអាងដោយខ្លួនឯងកាលពីឆ្នាំមុនថា ត្រូវបានជនអនាមិកលួចយកទៅគ្រប់គ្រងម្ដងរួចមកហើយកាលពីថ្ងៃទី១៦ ខែសីហា ឆ្នាំ២០១៨ តែជាងកន្លះខែប៉ុណ្ណោះក្រោយការបោះឆ្នោតជាតិកាលពីចុងខែកក្កដាឆ្នាំមុន។
ទំព័រហ្វេសប៊ុករបស់លោក ហ៊ុន សែន ដដែល ធ្លាប់អះអាងថា ករណីជនអនាមិកលួចចូលទៅគ្រប់គ្រងនោះ គឺ មិនតិចជាង ៣លើកឡើយ ប៉ុន្តែមកទល់ពេលនេះ គ្មានឧក្រិដ្ឋជនបច្ចេកវិទ្យាណាម្នាក់ ត្រូវបានរកឃើញ និងចាប់ខ្លួននោះឡើយ។
គិតត្រឹមចុងខែកុម្ភៈ ទំព័រហ្វេសប៊ុកផ្លូវការរបស់លោកនាយករដ្ឋមន្ត្រី ហ៊ុន សែន មានអ្នកចុច Like និង Follow ដល់ទៅជិត ១១លាននាក់។
ក្រៅពីទំព័រហ្វេសប៊ុកផ្លូវការលោក ហ៊ុន សែន ទំព័រហ្វេសប៊ុករបស់គណៈកម្មាធិការជាតិរៀបចំការបោះឆ្នោត និងទំព័រហ្វសប៊ុករបស់សារព័ត៌មាន Fresh News ទំព័រហ្វេសប៊ុករបស់អ្នកនាំពាក្យក្រសួងព័ត៌មាន លោក អ៊ុក គឹមសេង ក៏បានអះអាងថា ត្រូវបានជនអនាមិកលួចយកទៅគ្រប់គ្រង និងបង្ហោះព័ត៌មានក្លែងក្លាយផងដែរកាលពីឆ្នាំមុននោះ៕
