សមត្ថកិច្ចរាជធានីភ្នំពេញ សម្រេចបញ្ជូនជនជាតិអាមេរិកម្នាក់ទៅកាន់សាលាដំបូងរាជធានីភ្នំពេញនៅរសៀលនេះ ក្រោយពីបុរសបរទេសរូបនេះ ត្រូវបានឃាត់ខ្លួនក្រោមការចោទថា ពាក់ព័ន្ធនឹងការទិញពេស្យាចារកុមារ។
ប្រធានការិយាល័យប្រឆាំងការជួញដូរមនុស្សនៃនគរបាលរាជធានីភ្នំពេញ លោក កែវ ធា បានឲ្យVOD ដឹងថា បន្ទាប់ពីកសាងសំណុំរឿងរួច ជនជាតិអាមេរិកឈ្មោះ Pope Danny Lee អាយុ ៦០ឆ្នាំ នឹងត្រូវបញ្ជូនទៅសាលាដំបូងរាជធានីភ្នំពេញ ដើម្បីបន្តនីតិវិធី បន្ទាប់ពីត្រូវបានឃាត់ខ្លួនកាលពីចុងសប្ដាហ៍កន្លងមក ក្រោមការចោទថា ពាក់ព័ន្ធនឹងការទិញពេស្យាចារកុមារី ៥នាក់។
មន្ត្រីនគរបាលរូបនេះ បានឲ្យដឹងទៀតថា សមត្ថកិច្ចក៏កំពុងតែបន្តការស៊ើបអង្កេត និងស្វែងរកមនុស្សពាក់ព័ន្ធដទៃទៀតផងដែរនៅក្នុងអំពើជួញដូរពេស្យាចារនេះ។
លោក កែវ ធា ប្រាប់ថា៖ «ដំបូង គឺយើងទទួលពាក្យបណ្ដឹងពីម្ដាយជនរងគ្រោះដែលគាត់បានយកកូនគេទៅ ហើយក្រោយមកទៀត ពេលដែលយើងអញ្ជើញកូនហ្នឹងមកសាកសួរក៏មានព័ត៌មាន។ យើងបានសុំគោលការណ៍ពីព្រះរាជអាជ្ញាឃាត់ខ្លួនគាត់។ គាត់គឺជាមុខសញ្ញាចាស់ដែលធ្លាប់ប្រព្រឹត្តបទល្មើសជាយូរឆ្នាំណាស់មកហើយ តែយើងអត់ទាន់មានភស្តុតាងក្នុងការឃាត់ខ្លួនគាត់កន្លងមក»។
បើតាមលោក កែវ ធា ក្មេងស្រីរងគ្រោះទាំង ៥នាក់នោះ មានអាយុចន្លោះពី ៨ ដល់ ១៨ឆ្នាំ ហើយនៅពេលនេះ អាជ្ញាធរបានបញ្ជូនទៅមន្ទីរសង្គមកិច្ចដើម្បីអប់រំ និងថែទាំផងដែរ៕
