មន្ត្រីជាន់ខ្ពស់រដ្ឋាភិបាលថា កម្រងសំណួរភាគច្រើនសម្រាប់ជំរឿន ផ្ដោតលើស្ថានភាពជីវភាពប្រជាជន ដែលអាចនាំឲ្យរដ្ឋាភិបាលដឹងពីជីវភាព និងការរស់នៅរបស់ពលរដ្ឋបានកាន់តែច្រើន និងងាយស្រួលរៀបចំផែនការសម្រាប់អភិវឌ្ឍជាតិ។
ប្រធានវិទ្យាស្ថានជាតិស្ថិតិនៃក្រសួងផែនការ លោកស្រី ហង់ លីណា មានប្រសាសន៍ប្រាប់ VOD ថា កម្រងសំណួរសម្រាប់ធ្វើជំរឿនលើកនេះមាន ៦កម្រងសំណួរ ដែលសួរពីព័ត៌មានសមាជិកគ្រួសារ កម្រិតវប្បធម៌ លទ្ធភាពក្នុងការបង្កើតកូន ការប្រើប្រាស់ទឹក និងភ្លើងអគ្គិសនី សម្ភារប្រើប្រាស់ និងទ្រព្យសម្បត្តិក្នុងផ្ទះ មធ្យោបាយដឹកជញ្ជូន និងអត្រាមរណភាព។
លោកស្រីមានប្រសាសន៍ថា៖ «ប្រទេសនីមួយៗ បើមិនដឹងពីស្ថានភាពប្រជាជនទេ តើគិតគូរផែនការ គោលនយោបាយអីទៀតយ៉ាងមិចកើត? វាជាព័ត៌មានដែលសំខាន់ ដែលយើងត្រូវការជាចាំបាច់»។
លោកស្រី ហង់ លីណា ក៏បានឲ្យដឹងបន្ថែមផងដែរថា ការធ្វើជំរឿននេះមិនមានសំណួរទាក់ទងលើបំណុលនោះទេ ដោយអ្នកស្រីថា ការស្រង់ស្ថិតិស្ដីពីបំណុល ស្ថិតក្នុងផ្នែកផ្សេងពីជំរឿន ខណៈការកំណត់អត្រាបន្ទាត់នៃភាពក្រីក្ររបស់ពលរដ្ឋ អ្នកស្រីថា ក្រសួងក៏មិនបានកំណត់នោះទេសម្រាប់ការធ្វើជំរឿននេះ។
លោកស្រីថា៖ «ទិន្នន័យជំរឿន យើងអាចយកមកធ្វើការគណនាពីភាពក្រីក្របាននាពេលក្រោយ ក្រោយពីយើងបានទទួលលទ្ធផលជំរឿន ក៏ប៉ុន្តែ ឥឡូវនេះ យើងអត់ទាន់គិតគូរបានទេ ព្រោះកំពុងធ្វើជំរឿន»។
លោកនាយករដ្ឋមន្ត្រី ហ៊ុន សែន នៅព្រឹកថ្ងៃនេះដែរ ក៏បានអំពាវនាវដោយផ្ទាល់មាត់ទៅប្រជាពលរដ្ឋទូទាំងប្រទេស ឲ្យចូលរួមផ្ដល់ព័ត៌មានទៅដល់មន្ត្រីជំរឿនផងដែរ ខណៈដែលលោកអះអាងថា ជំរឿនមានសារៈសំខានសម្រាប់ការធ្វើសេចក្ដីសម្រេចចិត្តលើគោលនយោបាយ។
ការធ្វើជំរឿនទូទាំងលើកនេះ មានរយៈពេល ១១ថ្ងៃ ចាប់ពីថ្ងៃទី៣ រហូតដល់ថ្ងៃទី១៣ មីនា ឆ្នាំ២០១៩នេះ ដោយមានមន្ត្រីជំរឿនប្រមាណ ៥ម៉ឺននាក់ទូទាំងប្រទេស។
បើតាមប្រតិទិនរបស់វិទ្យាស្ថានជាតិស្ថិតិ លទ្ធផលនៃជំរឿននឹងត្រូវប្រកាសឲ្យដឹងជាបណ្ដោះអាសន្ននៅរយៈពេល ៣ខែក្រោយ ហើយលទ្ធផលផ្លូវការនឹងត្រូវប្រកាសផ្សព្វផ្សាយជាសាធារណៈនៅក្នុងរយៈពេលចន្លោះពី៦ ទៅ ៩ខែ ក្រោយការធ្វើជំរឿននេះ។
ប្រទេសកម្ពុជាបានធ្វើជំរឿនប្រជាសាស្ត្រចំនួន ២លើករួចមកហើយនៅក្នុងរយៈពេល ២០ឆ្នាំចុងក្រោយមកនេះ។
ជំរឿនលើកដំបូងនៅឆ្នាំ១៩៩៨ បានរកឃើញថា ប្រជាជនកម្ពុជាមានចំនួនជាង ១១លាននាក់ ដោយក្នុងនោះ ពលរដ្ឋដល់ទៅជាង ៩.៦លាននាក់ រស់នៅតាមតំបន់ជនបទនៃប្រទេសកម្ពុជា។
ចំណែកឯជំរឿនលើកទី២ នៅឆ្នាំ២០០៨ បានរកឃើញថា ប្រជាជនកម្ពុជាបានកើនឡើងដល់ចំនួនជាង ១៣លាននាក់ ក្នុងនោះប្រជាជនជាង ៥០ភាគរយ គឺជាស្ត្រី ហើយប្រជាជនដល់ទៅជាង ១០.៧៨លាននាក់ រស់នៅតាមតំបន់ជនបទ។
តួលេខរបស់ធនាគារពិភពលោក បង្ហាញថា ចំនួនប្រជាជនកម្ពុជាត្រូវបានប៉ាន់ប្រមាណថា មានចំនួនជាង ១៦លាននាក់នៅឆ្នាំ២០១៧កន្លងមកនេះ៕