កម្មវិធីអភិវឌ្ឍន៍សហប្រជាជាតិ (UNDP) ជំរុញកម្ពុជាឲ្យប្រើប្រាស់ប្រព័ន្ធបច្ចេកវិទ្យាបន្ថែមទៀត ដោយថា ដើម្បីជំរុញកិច្ចខិតខំប្រឹងប្រែងផ្តល់សេវាដល់ប្រជាពលរដ្ឋកាន់តែប្រសើរជាងមុន។
អង្គការ UNDP ប្រចាំប្រទេសកម្ពុជា និងក្រសួងមុខងារសាធារណៈ កាលពីព្រឹកមិញនេះ បានសហការគ្នារៀបចំសិក្ខាសាលាថ្នាក់ជាតិស្តីពីវិស័យសាធារណៈក្នុងយុគសម័យឌីជីថល។
មន្ត្រីតំណាង UNDP ប្រចាំប្រទេសកម្ពុជា លោក Nick Beresford បានថ្លែងនៅក្នុងសេចក្តីប្រកាសព័ត៌មានមួយថា នៅពេលដែលគំនិតថ្មីៗមានប្រភពចេញពីមន្ត្រីរាជការខ្លួនឯង ភាគច្រើនគំនិតទាំងនេះនឹងនាំមកនូវការផ្លាស់ប្តូរពិតប្រាកដ។
លោក Nick Beresford មានប្រសាសន៍ថា៖ «ការងាររបស់យើងមិនមែននិយាយអំពីការអនុវត្តដែលល្អបំផុតនោះឡើយ ប៉ុន្តែ គឺត្រូវជួយឱ្យក្រសួងនានាបើកចំហរឱ្យមានឱកាសបញ្ចេញគំនិតច្នៃប្រឌិត ដើម្បីឱ្យមន្ត្រីរាជការអាចទៅកាន់តែកៀកនឹងប្រជាពលរដ្ឋ ដែលពួកគេផ្តល់សេវាឱ្យ និងយកដំណោះស្រាយដែលពួកគេគិតឃើញដោយខ្លួនឯងទៅធ្វើការពិសោធសាកល្បង»។
រដ្ឋមន្ត្រីក្រសួងមុខងារសាធារណៈ លោក ពេជ្រ ប៊ុនធិន បានថ្លែងក្នុងសិក្ខាសាលាថា គុណភាពធនធានមនុស្ស និងនវានុវត្តន៍បច្ចេកវិទ្យា គឺជាចំណុចគន្លឹះ ដើម្បីជួយកម្ពុជាក្នុងការអនុវត្តរដ្ឋបាលអេឡិចត្រូនិច។
លោក ពេជ្រ ប៊ុនធិន មានប្រសាសន៍បន្តថា៖ «កម្ពុជាបានកំណត់យ៉ាងច្បាស់នូវចក្ខុវិស័យសម្រាប់កំណែទម្រង់រដ្ឋបាល គឺកែសម្រួលរដ្ឋបាលសាធារណៈទៅជាអ្នកផ្តល់សេវាសាធារណៈប្រកបដោយប្រសិទ្ធិភាព និងជាដៃគូគួរឲ្យទុកចិត្តនៅក្នុងការបម្រើប្រជាជនឲ្យបានប្រសើរឡើង»។
រដ្ឋលេខាធិការក្រសួងមុខងារសាធារណៈ លោក យក់ ប៊ុនណា ប្រាប់ VOD បន្ថែមថា បច្ចុបន្ន យើងត្រូវការជម្រុញការយល់ដឹងបន្ថែមទាំងមន្ត្រីរដ្ឋាភិបាល និងប្រជាពលរដ្ឋអំពីបច្ចេកវិទ្យាដើម្បីជំរុញវិស័យសេវាសាធារណៈ។
លោក យក់ ប៊ុនណា មានប្រសាសន៍ថា៖ «ជំរុញទីមួយ ការយល់ដឹង! ការយល់ដឹងនៅក្នុងចំណោមមន្ត្រីដែលមានតួនាទីសំខាន់ក្នុងក្របខណ្ឌរៀបចំគោលនយោបាយ ក្នុងក្របខណ្ឌនៃការដឹកនាំផ្នែកបច្ចេកទេស និងក្នុងក្របខណ្ឌប្រតិបត្តិការ។ ទន្ទឹមហ្នឹង ក៏ត្រូវមានការពង្ររឹងការដឹងរបស់ប្រជាពលរដ្ឋដែរ ឲ្យយល់ឃើញអំពីអត្ថប្រយោជន៍នៃបច្ចេកវិទ្យា ហើយទម្លាប់ខ្លួនជាមួយនឹងបច្ចេកវិទ្យា ព្រោះអីបច្ចេកវិទ្យា ជាគឺជារឿងដែលយើងមិនអាចចៀសផុតទេ វាជាចំណែកមួយនៃជីវិតរបស់យើងទាំងអស់គ្នា»។
បច្ចុប្បន្ន កម្ពុជាបានអនុវត្តសេវាសាធារណៈតាមបែបអេឡិចត្រូនិចមានដូចជា ការផ្តល់លិខិតអនុញ្ញាតបណ្ណបើកបរ ការចុះបញ្ជីក្រុមហ៊ុនតាមអនឡាញ និងការបំពេញឯកសារប្រឡងនៅសាលារដ្ឋខ្លះ ជាដើម៕