មន្ត្រីជាន់ខ្ពស់រដ្ឋាភិបាលកម្ពុជា លើកឡើងថា ការធ្វើជំរឿននៅឆ្នាំនេះ នឹងត្រូវពន្យារពេលយ៉ាងហោច ៣ថ្ងៃបន្ថែមទៀត ដោយសារចំនួនពលរដ្ឋមានច្រើនលើសការរំពឹងទុក។
ប្រធានវិទ្យាស្ថានជាតិស្ថិតិ លោកស្រី ហង់ លីណា បានប្រាប់ VOD នៅរសៀលនេះថា ការធ្វើជំរឿនឆ្នាំនេះមិនអាចបញ្ចប់បានដូចការព្រាងទុកនោះទេ ហើយត្រូវការពេលវេលាបន្ថែមទៀតសម្រាប់មន្ត្រីជំរឿនចុះសម្ភាសន៍ពលរដ្ឋ។
លោកស្រី ហង់ លីណា ប្រាប់ថា៖ «កន្លែងខ្លះ យើងគ្រោងត្រឹមតែ ១២០គ្រួសារ វាកើនឡើងដល់ ២០០គ្រួសារអីអញ្ចឹងណា។ មួយកន្លែងខ្លះឡើងដល់ពាន់ក៏មាន។ តាមពិតយើងត្រូវដាក់មន្ត្រីបន្ថែម តែបើដាក់ថែម មានតែមន្ត្រីដែលអត់បានទទួលការបណ្ដុះបណ្ដាល អញ្ចឹងមានតែយើងប្រើមន្ត្រីដែលមានការបណ្ដុះបណ្ដាលហើយហ្នឹង ឲ្យគាត់ធ្វើចប់មួយកន្លែងហ្នឹងឲ្យគាត់តមួយកន្លែងទៀតទៅ។ អញ្ចឹងយើងប្រហែលជាត្រូវពន្យារពេល ២ ទៅ ៣ថ្ងៃ អត់អាចចប់ត្រឹមថ្ងៃទី១៣ទេ»។
បើតាមលោកស្រី ហង់ លីណា ការពន្យារពេលធ្វើជំរឿននេះនឹងត្រូវការថវិកាបន្ថែមទៀតផងដែរ ខណៈមន្ត្រីជំរឿនត្រូវប្រឈមបញ្ហាមួយចំនួនដូចជា បញ្ហាអាកាសធាតុ និងសន្តិសុខជាដើម។
លោកស្រីថា៖ «បើប៉ះប៉ូវមិនគ្រប់ទេ យើងមានតែស្នើសុំថវិកាបន្ថែមពីក្រសួងសេដ្ឋកិច្ច និងហិរញ្ញវត្ថុ។ ក៏ប៉ុន្តែ តាមដំណឹងខ្ញុំឮ គឺខាងរាជធានីភ្នំពេញ និងខេត្តព្រះសីហនុ ឯកឧត្ដមអភិបាលលោក បានឲ្យប្រើកញ្ចប់ថវិការបស់រដ្ឋបាលរបស់រាជធានីភ្នំពេញ និងក្រុងព្រះសីហនុហ្នឹងហើយសម្រាប់បន្ថែម ដោយឡែកខេត្តផ្សេងៗទៀតយើងត្រូវប្រើប្រាស់ថវិកាជាតិបន្ថែមជូនគាត់»។
ការធ្វើជំរឿនទូទាំងប្រទេសលើកនេះ ត្រូវបានគ្រោងទុករយៈពេល ១១ថ្ងៃ ចាប់ពីថ្ងៃទី៣ រហូតដល់ថ្ងៃទី១៣ ខែមីនា ឆ្នាំ២០១៩នេះ ដោយមានមន្ត្រីជំរឿនប្រមាណ ៥ម៉ឺននាក់ទូទាំងប្រទេស។
ប្រទេសកម្ពុជាបានធ្វើជំរឿនប្រជាសាស្ត្រចំនួន ២លើករួចមកហើយនៅក្នុងរយៈពេល ២០ឆ្នាំចុងក្រោយមកនេះ។
ជំរឿនលើកដំបូងនៅឆ្នាំ១៩៩៨ បានរកឃើញថា ប្រជាជនកម្ពុជាមានចំនួនជាង ១១លាននាក់ ដោយក្នុងនោះ ពលរដ្ឋជាង ៩.៦លាននាក់ រស់នៅតាមតំបន់ជនបទនៃប្រទេសកម្ពុជា។
ចំណែកឯជំរឿនលើកទី២ នៅឆ្នាំ២០០៨ បានរកឃើញថា ប្រជាជនកម្ពុជាបានកើនឡើងដល់ចំនួនជាង ១៣លាននាក់ ក្នុងនោះប្រជាជនជាង ៥០ភាគរយ គឺជាស្ត្រី ហើយប្រជាជនជិត ១១លាននាក់ រស់នៅតាមតំបន់ជនបទ។
តួលេខរបស់ធនាគារពិភពលោក បង្ហាញថា ចំនួនប្រជាជនកម្ពុជាត្រូវបានប៉ាន់ប្រមាណថា មានចំនួនជាង ១៦លាននាក់ នៅឆ្នាំ២០១៧កន្លងមកនេះ៕
