មន្ត្រីរដ្ឋាភិបាលបានឲ្យដឹងថា កម្ពុជាគ្រោងបញ្ចប់សេចក្ដីព្រាងច្បាប់សម្រាប់គ្រប់គ្រងថាមពលនុយក្លេអ៊ែរនៅឆ្នាំក្រោយនេះ បន្ទាប់ពីសេចក្ដីព្រាងច្បាប់នេះ ត្រូវបានស្នើឡើង និងឆ្លងកាត់ការជជែកពិភាក្សាអស់រយៈពេលជិត ៥ឆ្នាំមកហើយនោះ។
អគ្គនាយកនៃអគ្គនាយកដ្ឋានថាមពលរបស់ក្រសួងរ៉ែ និងថាមពល លោក វិចទ័រ ហ្សូនា បានឲ្យVOD ដឹងថា សេចក្ដីព្រាងច្បាប់នេះនឹងត្រូវបញ្ចប់ ហើយបញ្ជូនទៅទីស្ដីការគណៈរដ្ឋមន្ត្រី និងសភាជាតិនៅឆ្នាំនេះ បន្ទាប់ពីសេចក្ដីព្រាងច្បាប់នេះ បានសម្រេចឡើងបានជាង ៦០ភាគរយហើយនោះ។
បើតាមអ្នកនាំពាក្យរូបនេះ សេចក្ដីព្រាងច្បាប់នេះ នឹងត្រូវយកទៅប្រើប្រាស់សម្រាប់គ្រប់គ្រងថាមពលនុយក្លេអ៊ែរ ឬបរមាណូស៊ីវិលតែប៉ុណ្ណោះ បន្ទាប់ពីកម្ពុជាមានគម្រោងកសាងរោងចក្រផលិតថាមពលអគ្គិសនីដើរដោយថាមពលនុយក្លេអ៊ែរនៅក្រោយឆ្នាំ២០៣០។
លោកថា៖ «ជាទូទៅកម្មវិធីបរមាណូនេះ កម្ពុជាយើងបានប្រើប្រាស់ក្នុងវិស័យដឹកជញ្ជូន ការគ្រប់គ្រងកុងតឺន័រ ស្កេន ម៉ាស៊ីនស្កេននឺ នៅព្រលានយន្តហោះ នៅតាមកំពង់ផែ ដែលស្កេននឺនោះ មានសារធាតុវិទ្យុសកម្ម ដែលជាផ្នែកនៃកិច្ចការបរមាណូ។ នៅក្នុងមន្ទីរពេទ្យមានម៉ាស៊ីនស្កេន ដែលការព្យាបាលរោគមហារីកជាដើម។ គេត្រូវការសារធាតុនុយក្លេអ៊ែរ ដើម្បីបាញ់កាំរស្មីដើម្បីសម្លាប់មេរោគជាដើម»។
ក្នុងដំណើរទស្សនកិច្ចរបស់នាយករដ្ឋមន្ត្រីកម្ពុជា លោក ហ៊ុន សែន ទៅកាន់ប្រទេសរុស្ស៊ីកាលពីខែឧសភា ឆ្នាំ២០១៦ ប្រទេសរុស្ស៊ីបានសន្យាជួយកម្ពុជាបង្កើតមជ្ឈមណ្ឌលព័ត៌មានថាមពលនុយក្លេអ៊ែរ និងបង្កើតក្រុមការងារចំពោះកិច្ចកម្ពុជា-រុស្ស៊ី សហការលើការប្រើប្រាស់ថាមពលនុយក្លេអ៊ែរស៊ីវិលផងដែរ ដែលកិច្ចព្រមព្រៀងទាំងនេះ នឹងចាប់អនុវត្តនៅឆ្នាំ២០២០ខាងមុខ៕
