ក្រុមសង្គមស៊ីវិល លើកឡើងថា ការរារាំងរបស់ក្រុមសមត្ថកិច្ចមិនឲ្យពួកគេដើរហែញត្តិនាថ្ងៃទិវានារីអន្តរជាតិនេះ បង្ហាញពីការរឹតត្បិតសិទ្ធិមនុស្ស និងសិទ្ធិក្នុងការបញ្ចេញមតិនៅកម្ពុជា។
ក្រុមអង្គការសង្គមស៊ីវិលចំនួន១២ ដែលមានមនុស្សចូលរួមជាង៣០០នាក់ នៅព្រឹកនេះបានធ្វើការជួបជុំគ្នានៅពហុកីឡដ្ឋានជាតិអូឡាំពិក ដើម្បីដើរហែក្បួនយកញត្តិទៅដាក់នៅទីស្ដីការគណៈរដ្ឋមន្ត្រី ត្រូវបានអាជ្ញាធរខណ្ឌ៧មករារារាំងមិនឲ្យដើរចេញពីស្តាតអូឡាំពិកនោះទេ ដោយថា ការដើរហែក្បួននោះប៉ះពាល់ដល់សណ្ដាប់ធ្នាប់សាធារណៈ។
ប្រធានមជ្ឈមណ្ឌលសិទ្ធិមនុស្សកម្ពុជា លោកស្រី ចក់ សុភាព យល់ថា ការរារាំងនៅព្រឹកនេះវាបានបង្ហាញថា រដ្ឋាភិបាលមិនមានឆន្ទៈពិតប្រាកដក្នុងការធានាការលើកកម្ពស់ និងការពារសិទ្ធិនារីនោះទេ។
លោកស្រី ចក់ សុភាព៖ «ថ្ងៃនេះគឺជាទិវានារីអន្តរជាតិ ក៏ប៉ុន្តែស្ត្រីគ្រាន់តែគាត់ចង់ប្រើប្រាស់សិទ្ធិរបស់យើងទាំងអស់គ្នាក្នុងការប្រមូលផ្ដុំគ្នាក្នុងការហែក្បួន ក្នុងការធានាក្នុងច្បាប់ជាតិ និងអន្តរជាតិដែលយើងអាចមានសិទ្ធិក្នុងការបញ្ចេញមតិ មានសិទ្ធិក្នុងការប្រមូលផ្ដុំគឺមិនត្រូវបានអនុញ្ញាតផង» ។
នាយកប្រតិបត្តិសហជីពចំណីអាហារ និងសេវាកម្មកម្ពុជា លោកស្រី អ៊ូ ទេពផល្លីន មានប្រសាសន៍ថា ក្រុមអ្នកដើរក្បួនថ្ងៃនេះ គឺបានបំពេញគ្រប់តាមច្បាប់ដែលតម្រូវទាំងអស់ តែបានជាត្រូវអាជ្ញាធរមិនអនុញ្ញាត និងធ្វើសកម្មភាពរារាំងបែបនេះទៅវិញ ដែលលោកស្រីចាត់ទុកថាជាការបំបិទសិទ្ធិធ្ងន់ធ្ងរដល់ពលរដ្ឋ។
លោកស្រីថា៖ «ក្នុងនាមយើងជាប្រជាពលរដ្ឋ យើងមានក្ដីបារម្ភថា តើរាជរដ្ឋាភិបាលហ្នឹងអភិវឌ្ឍ ឬក៏ធ្វើផែនការសកម្មភាពខ្លួនហ្នឹងបានយ៉ាងម៉េចទៅ នៅពេលដែលមិនព្យាយាមស្ដាប់ពីកង្វល់ប្រជាពលរដ្ឋ មិនផ្ដល់សិទ្ធិដល់ពលរដ្ឋក្នុងការអនុវត្តក្នុងប្រទេសលទ្ធិប្រជាធិបតេយ្យ សិទ្ធិរបស់ប្រជាពលរដ្ឋក្នុងការជួបប្រជុំ សិទ្ធិក្នុងការបញ្ចេញមតិ ក្នុងការជួបជុំដោយសន្តិវិធី និងការដើរក្បួនអីជាដើមហ្នឹង ត្រូវបានរឹតត្បិតក្នុងរូបភាពបែបនេះ» ។
នាយិកាអង្គការក្លាហាន កញ្ញា បុណ្យ រចនា មានប្រសាសន៍ថា ការរារាំងនេះកើតឡើងពីការមិនយោគយល់គ្នារវាងអាជ្ញាធរ និងអ្នកដើរក្បួន ដោយសង្ឃឹមថា នាពេលក្រោយអាចនឹងមានការយោគយល់គ្នាច្រើនជាងលើកនេះ។
លោកស្រី បុណ្យ រចនា៖ « ខាងអាជ្ញាធរ គាត់អាចមានការបារម្ភថា យើងអាចធ្វើក្នុងគោលដៅអីផ្សេង។ ក៏ប៉ុន្តែ សម្រាប់យើងដែលជាជំហរ គឺដើម្បីអបអរសាទរទិវាសិទ្ធិនារីអន្តជាតិ ដើម្បីរំលឹកដល់គុណបំណាច់បងៗស្ត្រីជំនាន់មុន ដែលគាត់ខិតខំខ្នះខ្នែងធ្វើការដើម្បីលើកកម្ពស់សិទ្ធិស្ត្រី និងសមភាពយែនឌ័រក្នុងសង្គមរបស់យើង។ ហើយមួយទៀត គឺយើងចង់ដាក់ញត្តិដល់ក្រសួងពាក់ព័ន្ធអំពីបញ្ហាដែលជាអាទិភាពរបស់ស្ត្រី » ។
អភិបាលរងរាជធានីភ្នំពេញដែលមានវត្តមានក្នុងព្រឹត្តិការណ៍នេះ លោក មាន ចាន់យ៉ាដា បដិសេធមិនធ្វើបទសម្ភាសន៍ជាមួយក្រុមអ្នកសារព័ត៌មាននោះទេ ដោយឲ្យអ្នកសារព័ត៌មានទាក់ទងអ្នកនាំពាក្យសាលារាជធានីវិញ។
អ្នកនាំពាក្យសាលារាជធានីភ្នំពេញលោក ម៉េត មាសភក្ដី មានប្រសាសន៍ថា អាជ្ញាធរគោរពរាល់សិទ្ធិ និងការបញ្ចេញមតិរបស់ពលរដ្ឋ ហើយក៏ចូលរួមប្រារព្ធទិវានារីអន្តរជាតិនេះ ដូចអង្គការសង្គមស៊ីវិលទាំងនោះផងដែរ។ ប៉ុន្តែ លោកថា មូលហេតុដែលធ្វើឲ្យមានការប៉ះទង្គិចគ្នានៅព្រឹកនេះ ដោយសារខាងអ្នកតវ៉ាមិនគោរពតាមសេចក្ដីសម្រេចរបស់សាលារាជធានីដែលហាមប្រាម។
លោកថា៖ « ចង់ជម្រាបជូនថា សិទ្ធិអត់មានអីត្រូវទាមទារទៀតទេ ព្រោះទាំងអស់គ្នាមានសិទ្ធិ មានការសាទរទាំងអស់។ ហើយការសាទរក៏អត់ចាំបាច់ទាល់តែដើរតាមផ្លូវ ទាល់តែធ្វើឲ្យប៉ះពាល់ដល់គេ ប៉ះពាល់សណ្ដាប់ធ្នាប់ ប៉ះពាល់ចរាចរណ៍ទេ។ ព្រោះយើងដឹងហើយថាភ្នំពេញរបស់យើងហ្នឹង ធម្មតាក៏ស្ទះ ពួកយើងកំពុងតែរួមគ្នារកវិធីសាស្ត្រដើម្បីកាត់បន្ថយការកកស្ទះចរាចរណ៍ទៅលើបញ្ហាអីផ្សេងៗ អញ្ចឹងទេ រឿងនេះគាត់បានធ្វើដែលខុសពីការប្រជុំពិភាក្សាគ្នាកាលពីប៉ុន្មានថ្ងៃមុន » ។
ទោះយ៉ាងណាក៏ដោយ ក្នុងការប្រារព្ធរបស់សង្គមស៊ីវិលនៅព្រឹកនេះ អាជ្ញាធររាជធានីក៏បានទទួលញត្តិរបស់អ្នកចូលរួម ដោយសន្យាថា នឹងប្រគល់ជូនក្រសួងស្ថាប័នពាក់ព័ន្ធដើម្បីពិនិត្យផងដែរ។
ក្នុងញត្តិនោះ ក្រុមអង្គការទាំងនេះបានលើពីបញ្ហាចំនួន៧ ទៅរដ្ឋាភិបាល ដោយមានការស្នើសុំឲ្យបញ្ឈប់ការប្រើប្រាស់អំពើហិង្សាលើស្ត្រីអ្នកការពារសិទ្ធិមនុស្ស ការបៀតបៀន និងហិង្សាផ្លូវភេទលើស្ត្រីនៅកន្លែងការងារ និងអំពាវនាវឲ្យរដ្ឋាភិបាល ពង្រឹងយន្តការការពារសិទ្ឋិពលករចំណាកស្រុកពីការកេងប្រវ័ញ្ចការងារ ការជួញដូរមនុស្ស និងទាសភាពសម័យទំនើប ផ្ដល់ជម្រកសុវត្ថិភាពសម្រាប់ស្ត្រីដែលជួបបញ្ហាអំពើហិង្សាក្នុងគ្រួសារ និងសម្រាប់កម្មករស្ត្រីដែលធ្វើការងារតាមផ្ទះ និងកំណែទម្រង់មធ្យោបាយដឹកជញ្ជូនកម្មករកាត់ដេរជាដើម។
រដ្ឋធម្មនុញ្ញ មាត្រា៤១ ចែងថា ប្រជាពលរដ្ឋខ្មែរមានសេរីភាពខាងបញ្ចេញមតិរបស់ខ្លួន សេរីភាពខាងសារព័ត៌មាន សេរីភាពខាងការបោះពុម្ពផ្សាយ សេរីភាពខាងការប្រជុំ។ ជនណាក៏ដោយ មិនអាចឆ្លៀតប្រើសិទ្ធិនេះ ដោយរំលោភនាំអោយប៉ះពាល់ដល់កិត្តិយសរបស់អ្នកដទៃ ដល់ទំនៀមទំលាប់ល្អរបស់សង្គម ដល់សណ្ដាប់ធ្នាប់សាធារណៈ និងដល់សន្តិសុខជាតិបានឡើយ៕