លោកនាយករដ្ឋមន្ត្រី ហ៊ុន សែន បានថ្លែងនៅថ្ងៃនេះថា លោកចង់កែប្រែរដ្ឋធម្មនុញ្ញដើម្បីកំណត់ទោសប្រហារជីវិតឡើងវិញ ប៉ុន្តែ លោកថា ជាការដាក់ទោសទៅលើជនរំលោភបំពានផ្លូវភេទទៅលើអនីតិជននៅក្នុងប្រទេសកម្ពុជា។
លោក ហ៊ុន សែន បានបង្ហាញឲ្យដឹងអំពីបំណងរបស់លោកនៅព្រឹកថ្ងៃនេះ អំឡុងពេលលោកថ្លែងក្នុងពិធីជួបសំណេះសំណាលជាមួយកុមារីរងគ្រោះនៅមជ្ឈមណ្ឌលសង្គ្រោះកុមារីមួយ ហៅកាត់ថា AFESIP Cambodia ដែលបើកដំណើរការ និងគ្រប់គ្រងដោយអ្នកស្រី ម៉ម សុម៉ាលី នៅជាយរាជធានីភ្នំពេញ។
លោកនាយករដ្ឋមន្ត្រី ហ៊ុន សែន ថ្លែងថា៖ «កាលពីពីរថ្ងៃមុន តា[ហ៊ុន សែន]បាននិយាយជាមួយនឹងយាយ[ប៊ុន រ៉ានី]ថា ចង់មានគំនិតផ្តួចផ្ដើម ដើម្បីធ្វើវិសោធនកម្មរដ្ឋធម្មនុញ្ញ បើកឲ្យមានទោសប្រហារជីវិតឡើងវិញចំពោះជនណាដែលរំលោភទៅលើកូនខ្លួនឯង ឪពុករំលោភកូនខ្លួនឯង ជីតារំលោភចៅខ្លួនឯង គួរកម្រិតទោសប្រហារជីវិត»។
លោកនាយករដ្ឋមន្ត្រី ហ៊ុន សែន បានថ្លែងទៀតថា ប៉ុន្តែ លោកនឹងមិនស្នើទៅសមាជិករដ្ឋសភា និងព្រះមហាក្សត្រ ឲ្យកែប្រែរដ្ឋធម្មនុញ្ញនោះឡើយ ហើយមានសំណើបែបនេះមែន ក៏ត្រូវឆ្លងកាត់ការធ្វើប្រជាមតិនៅទូទាំងប្រទេសផងដែរ។
លោក ហ៊ុន សែន ថ្លែងបន្តថា៖ «តែរឿងត្រូវធ្វើវិសោធនកម្មរដ្ឋធម្មនុញ្ញ ប្រហែលជាមិនអាចធ្វើតាមសំណើរបស់នាយករដ្ឋមន្ត្រី ឬក៏សមាជិករដ្ឋសភា ដែលធ្វើជាសេចក្ដីស្នើច្បាប់ ឬសេចក្ដីព្រាងច្បាប់ទេ ប្រហែលដើរដល់ការធ្វើប្រជាមតិថា គួរមានទោសប្រហារជីវិតឡើងវិញ ឬអត់?»។
ទោសប្រហារជីវិតសម្រាប់បទល្មើសឧក្រិដ្ឋទាំងអស់ ត្រូវបានលុបបំបាត់ចោលកាលពីឆ្នាំ១៩៨៩ នៅពេលដែលកម្ពុជាស្ថិតក្នុងដំណាក់កាលផ្លាស់ប្ដូរពីរបបសាធារណរដ្ឋប្រជាមានិតកម្ពុជា ទៅជារដ្ឋកម្ពុជា។
រដ្ឋធម្មនុញ្ញកម្ពុជាដែលកើតឡើងក្រោយកិច្ចព្រមព្រៀងសន្តិភាពទីក្រុងប៉ារីស និងក្រោយការបោះឆ្នោតរៀបចំដោយអង្គការសហប្រជាជាតិនៅឆ្នាំ១៩៩៣ ក៏បានចែងអំពីការលុបបំបាត់ចោលទោសប្រហារជីវិតសម្រាប់បទល្មើសទាំងអស់ផងដែរ៕