លោកនាយករដ្ឋមន្ត្រី ហ៊ុន សែន បានបញ្ជានៅព្រឹកថ្ងៃនេះឲ្យស្វែងរកមេខ្លោងនៃបទល្មើសគ្រឿងញៀនដែលត្រូវបានបង្ក្រាប និងរឹបអូសបាននៅក្លឹបកម្សាន្តដ៏ធំមួយនៅក្បែរមណ្ឌលសិក្សានៅកណ្ដាលរាជធានីភ្នំពេញកាលពីខែកុម្ភៈកន្លងមកនេះ។
ថ្លែងក្នុងពិធីចែកសញ្ញាបត្រដល់និស្សិតទើបបញ្ចប់ការសិក្សានៅរាជធានីភ្នំពេញនៅព្រឹកនេះ លោកនាយករដ្ឋមន្ត្រី ហ៊ុន សែន បានបង្ហាញការភ្ញាក់ផ្អើល បន្ទាប់ពីអាជ្ញាធរបានបង្ក្រាបទៅលើមជ្ឈមណ្ឌលកម្សាន្តរ៉ក់កាលពីថ្ងៃទី២៣ ខែកុម្ភៈ ហើយបានឃាត់ខ្លួនមនុស្សដល់ទៅជាង ៣០០នាក់ និងរឹបអូសគ្រឿងញៀនបានដល់ទៅ ៥០គីឡូក្រាម។
លោក ហ៊ុន សែន ថ្លែងថា៖ «ដូច្នេះ សង្ឃឹមថា ក្រសួងមហាផ្ទៃនឹងបន្តចាត់វិធានការលើបញ្ហានេះ បូកជាមួយនឹងការដំណើរការក្ដីរបស់តុលាការ ត្រូវតែម៉ឺងម៉ាត់ជាមួយនឹងការមិនវិលត្រឡប់នៃអំពើពារលាអាវ៉ាសែសម្រាប់កន្លែងមួយនេះ ដែលត្រូវដាក់ទោសទណ្ឌឲ្យបានធ្ងន់ធ្ងរ ហើយស្វែងរកឲ្យដល់ទីជម្រៅនៃមេខ្លោងរបស់វា។ នៅកន្លែងណា?»។
មជ្ឈមណ្ឌលកម្សាន្តរ៉ក់ ដែលមានទីតាំងជាប់នឹងសាកលវិទ្យាល័យភូមិន្ទនីតិសាស្ត្រ និងសេដ្ឋកិច្ច ត្រូវបានបើកឲ្យដំណើរការដោយលោកឧកញ៉ា គិត ធាង ដែលជាបងប្រុសរបស់លោកឧកញ៉ា គិត ម៉េង ប្រធានសម្ព័ន្ធក្រុមហ៊ុន Royal Group ដែលកាន់កាប់លើជំនួញធំៗជាច្រើននៅក្នុងប្រទេសកម្ពុជា។
ទោះជាយ៉ាងណា នគរបាលរាជធានីភ្នំពេញ អះអាងថា ក្រៅពីមជ្ឈមណ្ឌលកម្សាន្តដ៏ធំមួយនេះ សមត្ថកិច្ចរាជធានីភ្នំពេញ ក៏បានបានរកឃើញក្លឹបកម្សាន្ត និងបារបារាំងជិត ១៣០០កន្លែងផ្សេងទៀត មានជាប់ពាក់ព័ន្ធនឹងបទល្មើសគ្រឿងញៀនផងដែរ ហើយក្លឹបកម្សាន្តជាង ១ពាន់កន្លែង បានត្រឹមតម្រូវឲ្យធ្វើកិច្ចសន្យាបញ្ឈប់ការប្រើប្រាស់ និងចែកចាយគ្រឿងញៀនប៉ុណ្ណោះ៕