សមត្ថកិច្ចខេត្តកណ្តាលកំពុងចុះពិនិត្យសិប្បកម្មមួយកន្លែងដែលកើតមានហេតុការណ៍គ្រោះថ្នាក់រហូតបណ្តាលឲ្យកុមារីម្នាក់ដាច់ដៃម្ខាង ដោយថា នឹងពិរណាចាត់វិធានការក្រោយទទួលបានរបាយការណ៍ច្បាស់លាស់។
វេបសាយនគរបាលជាតិបានឲ្យដឹងថា កាលពីព្រឹកថ្ងៃទី៩ ខែមីនា ឆ្នាំ២០១៩ នៅចំណុចសិប្បកម្មឡឥដ្ឋ ភូមិព្រះប្រសប់ ឃុំព្រះប្រសប់ ស្រុកខ្សាច់កណ្ដាល ខេត្តកណ្ដាល ក្មេងស្រីអាយុ ៩ឆ្នាំម្នាក់ បានចូលដៃក្នុងម៉ាស៊ីនកិនឥដ្ឋបណ្តាលឱ្យដាច់ត្រឹមស្មា ហើយត្រូវបានក្រុមការងារបញ្ជូនទៅព្យាបាលនៅមន្ទីរពេទ្យ។
ប្រធានមន្ទីរការងារ និងបណ្តុះបណ្តាលវិជ្ជាជីវៈខេត្តកណ្តាល លោក ធុល នង ឲ្យ VOD ដឹងនៅរសៀលថ្ងៃនេះថា ក្រុមការងារលោកទើបតែបានចុះទៅព្រឹកមិញនេះ ដើម្បីប្រមូលព័ត៌មានបន្ថែមនៅកន្លែងកើតហេតុ មុននឹងចាត់វិធានការបន្ត។
លោក ធុល នង មានប្រសាសន៍ថា៖ «ព្រឹកមិញក្រុមការងារខ្ញុំបានចុះទៅហើយ ដើម្បីសួរនាំរឿងហ្នឹង។ អញ្ចឹង ដើម្បីខ្ញុំក្តាប់របាយការណ៍សិន។ យើងអត់ទាន់នេះដែរ! ចាំមើលលទ្ធផលគេចុះទៅមើលសិនណា ហើយការងារហ្នឹង យើងពីចារណក្រោយ!»។
អ្នកសម្របសម្រួលគម្រោងថ្នាក់ជាតិរបស់អង្គការពលកម្មអន្តរជាតិ (ILO) លោក វន វិត សម្តែងក្តីរន្ធត់ចំពោះករណីគ្រោះថ្នាក់ទៅលើក្មេងស្រីម្នាក់ដែលបណ្តាលឲ្យដាច់ដៃម្ខាងនៅសិប្បកម្មឡឥដ្ឋ។ លោកសូមឲ្យមានការជំរុញបន្ថែមទៀតចំពោះការការពារកុមារពីការងារប្រភេទនេះ។
លោក វន វិត មានប្រសាសន៍ថា៖ «ពាក់ព័ន្ធនឹងការបង្ការទប់ស្កាត់គ្រោះថ្នាក់ពីការងារនេះ ខ្ញុំគិតថា វានៅតែជាចំណុចមួយដែលយើងត្រូវធ្វើការបន្តថែមទៀត ដើម្បីជំរុញធ្វើម៉េចឲ្យកុមារ ឬក៏ជាថៅកែ ក៏ដូចជាអ្នកពាក់ព័ន្ធហ្នឹង រួមចំណែកដើម្បីកាត់បន្ថយបញ្ហាគ្រោះថ្នាក់នេះ ជាពិសេសទម្រង់ទៅលើពលកម្មកុមារ បាទ។ ខ្ញុំគិតថា វាជាផ្នែកមួយដ៏សំខាន់ដែលយើងត្រូវតែរួមគ្នាលើកកម្ពស់ការយល់ដឹងពាក់ព័ន្ធនឹងការប្រើប្រាស់កំលាំងពលកម្មលើកុមារ ជាពិសេសកុមារក្រោមអាយុ ១៨ឆ្នាំនេះ»។
របាយការណ៍របស់អង្គការ ILO អំឡុងឆ្នាំ២០១២ រកឃើញថា មានកុមារ ១៩ភាគរយក្នុងចំណោមកុមារ ៤លាននាក់មានសកម្មភាពក្នុងការចេញទៅធ្វើពលកម្ម។ ក្នុងចំណោមកុមារទាំងនេះមានកុមារជាង ៧ម៉ឺននាក់ធ្វើការនៅក្នុងការិយាល័យ តូប ហាង និងមួយចំនួនទៀតធ្វើការក្នុងរោងចក្រ និងសិប្បកម្មឡឥដ្ឋ។ របាយការណ៍ ILO ដដែល កាលពីឆ្នាំ២០១២ កុមារប្រហែល ១១ភាគរយនៅទូទាំងប្រទេសមិនបានចូលរៀនទេ៕