សង្គមស៊ីវិលទទូចឱ្យមានការកំណត់ពេលវេលាជាក់លាក់ណាមួយ ដើម្បីឈានទៅសន្និដ្ឋានឬ ចាត់វិធានការផ្លូវច្បាប់ និងបង្ហាញដល់សាធារណជនឱ្យបានដឹងលម្អិត ជុំវិញការស៊ើបអង្កេតទៅលើសំណុំរឿងអតីតមេបញ្ជាការកងរាជអាវុធហត្ថខេត្តរតនគិរី និងស្នងការរងនគរបាលខេត្តកណ្តាល។
នាយកប្រតិបត្តិអង្គការសម្ព័ន្ធគណនេយ្យភាពសង្គមកម្ពុជា លោក សន ជ័យ មើលឃើញថាពលរដ្ឋយ៉ាងច្រើនកំពុងរង់ចាំមើលលទ្ធផលនៃការស៊ើបអង្កេតរបស់អង្គភាពប្រឆាំងអំពើពុករលួយទៅលើសំណុំរឿងទាំងពីរនេះ។ លោកបន្តថា វាគួរមានការឆ្លើយតបអំពីលទ្ធផលនៃការស៊ើបអង្កេតនោះ ដោយថាដើម្បីបង្ហាញតម្លាភាពការងាររបស់ខ្លួនផងដែរ។
លោកបន្តថា៖ «យើងចង់ឱ្យមានដំណើរការមួយដែលអនុវត្តទៅ ហើយនៅពេលចេញជាលទ្ធផល ACU គប្បីបង្ហាញអំពី ព័ត៌មានលម្អិតទាក់ទង ករណីដែលលើកឡើង ដែលចាប់អារម្មណ៍ដោយក្រុមមហាជន »។
នាយកប្រតិបត្តិអង្គការតម្លាភាពកម្ពុជា លោក ព្រាប កុល មានប្រសាសន៍ថាសំណុំរឿងពុករលួយខ្លះអាចនឹងមានភាពស្មុគស្មាញ ប៉ុន្តែសំណុំរឿងអតីតមេប៉េអឹម ខេត្តរតនគិរី និងស្នងការរងខេត្តកណ្តាលនេះ លោកថាមិនមានអីស្មុគស្មាញ ហើយត្រូវចំណាយពេលដល់រាប់ឆ្នាំនោះទេ។
លោកថា ករណីទាំងពីរនេះ ប្រសិនបើស៊ើបអង្កេតរួចរាល់ ប៉ុន្តែគ្មានការសន្និដ្ឋាន ឬការផ្សព្វផ្សាយនៃសេចក្តីសន្និដ្ឋានណាមួយនោះទេ សាធារណជននឹងមានមន្ទិលសង្ស័យ ហើយនឹងវាយតម្លៃអង្គភាពប្រឆាំងអំពើពុករលួយក្នុងន័យអវិជ្ជមានទៀតផង។
លោកបន្ថែមថា៖ «ហើយក្នុងនាមជាសាធារណជន ក៏ដូចជាក្នុងនាមសង្គមស៊ីវិល យើងចង់ឃើញដំណើរការនៃការស៊ើបអង្កេតឈានទៅដល់ការសន្និដ្ឋានមួយច្បាស់លាស់ ។ប្របកដោយ តម្លាភាព និងអាចជឿទុកចិត្តបាន។ វាមិនគួរស៊ីពេលយូរពេកដែរ ព្រោះថាករណីអស់ហ្នឹង វាកើតឡើងដោយសារមានការផ្សព្វផ្សាយជាសាធារណៈ។ ដូច្នេះយើងសង្ឃឹមថាអង្គភាព អាចបញ្ចប់ការស៊ើបអង្កេតក្នុងពេល ឆាប់ៗ ហើយធ្វើសេចក្តីសន្និដ្ឋាន និងផ្សព្វផ្សាយឱ្យសាធារណជនបានដឹងអំពីការរកឃើញឬក៏បើសិនជាមានការប្រព្រឹត្តខុសឬក៏មានបទល្មើសអីមួយ សុំឱ្យមានការអនុវត្តច្បាប់ »។
អនុប្រធានអង្គភាពប្រឆាំងអំពើពុករលួយ លោក ឃាង សេង និយាយដោយខ្លីថាការស៊ើបអង្កេតសំណុំរឿងទាំងពីរនេះ មិនមែនជារឿងត្រូវផ្សព្វផ្សាយតាមសារព័ត៌មាននោះទេ ។
លោកបន្ថែមថា៖ «ករណីនេះ វាមិនទាក់ទងអីត្រូវផ្សព្វផ្សាយតាមសារព័ត៌មានទេ»។
កាលពីចុងខែមុន អង្គភាពប្រឆាំងអំពើពុករលួយបានចេញសេចក្តីប្រកាសព័ត៌មានមួយដោយអះអាងថា អង្គភាពមួយនេះបានបញ្ចប់ការស៊ើបអង្កេតបំណុល និងទ្រព្យសម្បត្តិរបស់ អតីតមេញ្ជាការកងរាជអាវុធហត្ថខេត្តរតនគិរី លោក គឹម រស្មី និងភរិយា រួមទាំងកូនចំនួន ៣ នាក់ របស់លោករួចរាល់ហើយដែរ។
កាលពីថ្ងៃទី៩ ខែកុម្ភៈ ព្រះមហាក្សត្រចេញពីរាជក្រឹត្យលុបឈ្មោះអតីតមេញ្ជាការកងរាជអាវុធហត្ថខេត្តរតនគិរី ឧត្តមសេនីយត្រី(ផ្កាយ១) លោក គឹម រស្មី ចេញពីក្របខណ្ឌកងយោធពលខេមរភូមិន្ទ បន្ទាប់ពីមានការស្នើសុំរបស់លោកនាយករដ្ឋមន្ត្រី ហ៊ុន សែន។
ការស្នើសុំលុបលោក គឹម រស្មី ចេញពីក្របខណ្ឌរដ្ឋនេះ ធ្វើឡើងក្រោយពីមានវីដេអូបង្ហោះលើបណ្តាញសង្គម ថា លោក គឹម រស្មី បានចែកលុយ ១០ម៉ឺនដុល្លារ ឲ្យកូន ៥នាក់និងទ្រព្យសម្បត្តិជាច្រើនទៀត ក្នុងពិធីខួបកំណើតរបស់ខ្លួន។
លិខិតអង្គភាពប្រឆាំងអំពើពុករលួយដដែល បញ្ជាក់ទៀតថា ពួកគេកំពុងដំណើរការស្រាវជ្រាវទ្រព្យសម្បត្តិ និងបំណុលស្នងការរងខេត្តកណ្តាល គឺ លោក ស្រេង សុខា ផងដែរ។
ការប្រកាសស៊ើបអង្កេតACUលើលោកស្រេងសុខា នេះ ធ្វើឡើងក្រោយពីមានការចែករំលែកតាមបណ្ដាញសង្គមហ្វេសប៊ុក បន្ទាប់ពីស្នងការរងរូបនេះ បានភ្ជាប់ពាក្យជាមួយស្ត្រីម្នាក់ និងបានជូនថ្លៃបណ្ណាការចំនួន ១០ម៉ឺនដុល្លារ ចិញ្ចៀនពេជ្រ និងរថយន្ដលុច្សស៊ីស ៥៧០ មួយគ្រឿងដែលមានតម្លៃ ២២ម៉ឺនដុល្លារ។
រហូតដល់ថ្ងៃនេះ អង្គភាពប្រឆាំងអំពើពុករលួយមិនទាន់ឈានដល់ការសន្និដ្ឋានលើមន្ត្រីទាំងពីររូបនេះថា មានកំហុស ឬអត់នោះទេ។