ការិយាល័យអ្នកនាំពាក្យរដ្ឋាភិបាលត្រៀមកម្លាំង និងចាត់វិធានការច្បាប់ចំពោះការប្រមាថជីវិតលោក ហ៊ុន សែន ដោយថាជាករណីញុះញង់ និងបង្កការប្រមាថជីវិតនាយករដ្ឋមន្ត្រី ដែលកើតចេញពីឆន្ទៈនិងជម្រើសរបស់មហាជន ជាអំពើប្រឆាំងនិងច្បាប់។
ក្នុងសេចក្តីថ្លែងការណ៍របស់ខ្លួននៅថ្ងៃនេះ ការិយាល័យអ្នកនាំពាក្យរដ្ឋាភិបាល បានបញ្ជាក់ថារដ្ឋាភិបាលមិនអនុញ្ញាតជាដាច់ខាតនូវអំពើឬ សកម្មភាពញុះញង់ និងប្រមាថអាយុជីវិត លោក ហ៊ុន សែន ជាសកម្មភាពបង្កផលប៉ះពាល់ដល់សន្តិសុខជាតិនិងជម្រើសរបស់ពលរដ្ឋខ្មែរ ដោយថា អំពើទាំងនោះមិនត្រូវបានទទួលស្គាល់ជាសិទ្ធិនយោបាយឬ សេរីភាពក្នុងការបញ្ចេញមតិនោះឡើយ។
សេចក្តីថ្លែងការណ៍៖ «រាជរដ្ឋាភិបាល ក៏ដូចជាកម្លាំងប្រដាប់អាវុធគ្រប់ប្រភេទ និងគ្រប់ជាន់ថ្នាក់ មានកាតព្វ កិច្ច ការពារដាច់ខាតតាមផ្លូវកម្លាំង ក៏ដូចជាផ្លូវច្បាប់ជាធរមាន»។
សេចក្តីថ្លែងការណ៍នេះ ចេញតែប៉ុន្មានម៉ោងប៉ុណ្ណោះ ក្រោយពីលោក នាយករដ្ឋន្ត្រីហ៊ុន សែន បង្ហើបដោយមិនបញ្ជាក់ចំឈ្មោះថា មានអ្នកប្រមាថអាយុជីវិតលោក។
ក្នុងពិធីសំណេះសំណាលជាមួយកម្មករនៅខេត្តកោះកុង នាថ្ងៃពុធនេះ មេដឹកនាំបក្សកាន់អំណាចលោក ហ៊ុន សែន ព្រមានរឹបអូសទ្រព្យសម្បត្តិពីដៃគូប្រកួត បើឈ្នះក្តី ក្នុងសំណុំរឿងថ្មីមួយទៀត ដែលលោកអះអាងថា ទារសំណង២លានដុល្លារ ជុំវិញការជេរប្រមាថរូបលោកពីសំណាក់អ្នកនយោបាយដែលលោកមិនបញ្ចេញឈ្មោះ។
លោកបានប្រាប់មេធាវីរបស់លោករួចហើយ ឲ្យរៀបចំភស្តុតាងដែលប្រមូលបានលើបណ្តាញសង្គមប្តឹងទៅតុលាការ ទាក់ទិននឹងការជេរប្រមាថរូបលោកពីសំណាក់អ្នកនយោបាយ ប៉ុន្តែលោកមិនបញ្ចេញឈ្មោះជននោះឡើយ៕