ក្រុមមន្ត្រីសង្គមស៊ីវិល លើកឡើងថា ការប្រើប្រាស់ប្រព័ន្ធអ៊ីនធឺណេតកាន់តែទូលំទូលាយ នឹងជួយជំរុញអភិបាលកិច្ចល្អ និងការបង្ហាញនូវទុក្ខកង្វល់របស់ប្រជាពលរដ្ឋពីតាមសហគមន៍មូលដ្ឋាន ប៉ុន្តែ ក៏បានជំរុញឲ្យប្រើប្រាស់ប្រកបដោយសុវត្ថិភាព។
ថ្លែងក្នុងវេទិកា «អ៊ីនធឺណេតបើកទូលាយ» ឆ្នាំនេះ ប្រធានអង្គការបណ្តាញយុវជនកម្ពុជា លោក ទឹម ម៉ាឡៃ ដែលជាអង្គការមួយក្នុងចំណោមអង្គការ៦ផ្សេងទៀតបានផ្តួចផ្តើមរៀបចំការវេទិការនេះ មានប្រសាសន៍ថា
គោលបំណងនៃការរៀបចំពិធីនេះឡើងដើម្បីផ្តល់ការយល់ដឹងកាន់តែស៊ីជម្រៅដល់អ្នកប្រើប្រាស់អ៊ីនធឺណេត ទាំងផលប្រយោជន៍ និងហានិភ័យផងដែរ។
លោក ទឹម ម៉ាឡៃ បន្ថែមថា៖ «យើងនិយាយអំពីការឆ្លុះបញ្ចាំង ឱកាស និងហានិភ័យដល់អ្នកប្រើប្រស់អ៊ីនធឺណេតបច្ចុប្បន្ន ដើម្បីឱ្យគាត់ដឹងថាប្រសិនបើជាគាត់មានឱកាស តើគាត់ត្រូវម៉េចដើម្បីឱ្យការប្រើប្រាស់អ៊ីនធឺណេតឱ្យមានប្រយោជន៍។ ទីពីរ បង្ហាញពីការចូលរួមយល់ដឹងឱ្យកាន់តែស៊ីជម្រៅអំពីគោលការណ៍ ឬតួនាទីការប្រើប្រាស់បណ្តាញសង្គមហ្នឹងក្នុងអភិបាលកិច្ចល្អក្នុងសង្គមកម្ពុជា។ ទីបីចុងក្រោយហ្នឹង គឺផ្តល់នូវបច្ចេកទេសមួយចំនួនដល់អ្នកប្រើប្រាស់ឱ្យកាន់តែមានសុវត្ថិភាពប្រសើរឡើង»។
វេទិកាអ៊ីនធឺណេតបើកទូលាយឆ្នាំនេះ ក្រោមប្រធានបទធំគឺ «ឱកាស និងហានិភ័យចំពោះអ្នកប្រើប្រាស់អ៊ីនធឺណេតសម័យថ្មី» រួមនឹងប្រធានបទតូចៗចំនួន ៥ផ្សេងទៀត ដែលមានចូលរួមជាង៣រយនាក់។ វេទិកានេះ ត្រូវបានបណ្តុំអង្គការមិនមែនរដ្ឋាភិបាលមួយចំនួន រៀបចំឡើងជាលើកទីប្រាំហើយ ។
នាយកផ្នែកប្រព័ន្ធផ្សព្វផ្សាយនៃមជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យ លោក ណុប វី ថ្លែងថា ការទទួលបានព័ត៌មានពិតក្នុងការបណ្តាញសង្គម គឺជាប្រយោជន៍សម្រាប់ពលរដ្ឋទូទៅក្នុងការគិតពិចារណាឱ្យបានស៊ីជម្រៅ ប៉ុន្តែលោកថា បញ្ហាប្រឈមនាពេលបច្ចុប្បន្ន គឺ ព័ត៌មានក្លែងក្លាយ ដែលលោកមើលឃើញថា កំពុងធ្វើឱ្យប៉ះពាល់ធ្ងន់ដល់មនុស្សរស់នៅក្នុងសង្គម។
លោកបន្ថែមថា៖ «ដូច្នេះ បើសិនជាយើងមកពិនិត្យមើលអំពី ព័ត៌មានក្លែងក្លាយ ដូចជាឧទាហរណ៍ដែលខ្ញុំបានលើកមិញហ្នឹង។ ខ្ញុំគិតថា អាហ្នឹងវាប៉ះពាល់ធ្ងន់សម្រាប់ជីវិត ក្នុងការរស់នៅ ប្រចាំថ្ងៃរបស់បងប្អូន។ សំខាន់ជាងអាហារទៅទៀតព័ត៌មាន ព្រោះ កាលណាព័ត៌មានក្លែងក្លាយ វាស្មើនឹងយើងទទួលទានអាហារហួសឌឺឡែ ទទួលទានអាហារដែលធ្វើឱ្យប៉ះពាល់ដល់សុខភាពរបស់យើង»។
នាយិកាប្រតិបត្តិមជ្ឈមណ្ឌលសិទ្ធិមនុស្សកម្ពុជា អ្នកស្រី ចក់ សុភាព មានប្រសាសន៍ថា ប្រព័ន្ធអ៊ីនធឺណេត គឺជាផ្នែកមួយក្នុងការអនុវត្តសិទ្ធិសេរីភាពរបស់ពលរដ្ឋ តាមរយៈបញ្ចេញមតិប្រកបដោយក្រមសីលធម៌ និងការទទួលបានព័ត៌មានត្រឹមត្រូវ ព្រមទាំងការអនុវត្តសកម្មភាពការងារយ៉ាងសកម្មក្នុងជីវភាពនយោបាយ សេដ្ឋកិច្ច សង្គម និងវប្បធម៌ផងដែរ។
អ្នកស្រីថា ដើម្បីជៀសវាងនូវហានិភ័យផ្សេងៗសម្រាប់ខ្លួនឯង និងដល់អ្នកដទៃផងនោះ អ្នកប្រើប្រាស់បណ្តាញសង្គមក៏ត្រូវស្វែងយល់ច្បាស់ពីសិទ្ធិសេរីភាពជាមូលដ្ឋានរបស់ខ្លួន និងត្រូវមានសេចក្តីក្លាហាន។
អ្នកស្រីបន្ថែមទៀតថា៖ «ប៉ុន្តែខ្ញុំគិតថា ទាមទារឱ្យយើងត្រូវមានភាពក្លាហាន ហើយយើងយល់អំពីសិទ្ធិសេរីភាពរបស់យើង ដែលខ្ញុំបានគូសបញ្ជាក់ពីខាងដើម។ ពលរដ្ឋគ្រប់រូបមានសិទ្ធិក្នុងការបញ្ចេញមតិ មានសិទ្ធិក្នុងការទទួលបានព័ត៌មាន ហើយបើយើងមិនប្រើប្រាស់សិទ្ធិរបស់យើងទេ ហើយយើងចាំឱ្យគេផ្តល់ឱ្យយើង អត់បានទេ។ ទាល់តែយើងប្រើប្រាស់»។
អ្នកស្រាវជ្រាវផ្នែកអភិវឌ្ឍន៍សង្គម លោក បណ្ឌិត មាស នី មានមើលឃើញថា ទៅថ្ងៃអនាគត ប្រព័ន្ធបច្ចេកវិទ្យាកាន់តែវិវត្តន៍ទៅមុខឥតឈប់ឈរ ដែលទាមទារឱ្យពលរដ្ឋកម្ពុជា ពិសេសយុវជនដើរឱ្យទាន់។
ជាមួយគ្នានេះ លោកថា ការប្រើប្រាស់ប្រព័ន្ធបច្ចេកវិទ្យាឱ្យមានប្រយោជន៍ និងប្រកបដោយក្រមសីលធម៌នោះ គឺត្រូវចាប់ផ្តើមពីប្រមុខដឹកនាំ និងអ្នកនយោបាយមុនគេ។
លោកមានប្រសាសន៍ថា៖ «គឺមិនមែនជំរុញឱ្យតែប្អូនៗជាយុវជន ត្រូវតែគោរពឱ្យយើងមានក្រមសីលធម៌ទេ វាត្រូវមានទាំងប្រមុខរដ្ឋាភិបាល ក៏ត្រូវមានសីលធម៌ក្នុងការប្រើប្រាស់ហ្នឹងដែរ។ បើយើងយកអ៊ីនធឺណេតមកសម្រាប់តែជេប្រទិចប្រមាថអ្នកនៅក្រោមបង្គាប់ អាហ្នឹងវាក៏អត់មានសីហធម៌អីជាគម្រូរសម្រាប់យើងដែរ ហើយអ្នកនយោបាយក៏ត្រូវមានសីលធម៌ដូចគ្នាដែរ»។
បណ្ដាញទំនាក់ទំនងសង្គម Facebook ស្ថិតនៅលើគេក្នុងចំណោមបណ្ដាញទំនាក់ទំនងសង្គមធំៗរបស់ពិភពលោក ដែលត្រូវបានប្រើប្រាស់យ៉ាងច្រើននៅក្នុងប្រទេសកម្ពុជា។
របាយការណ៍ស្រាវជ្រាវរបស់ internetworldstats.com បានឲ្យដឹងថា គិតមកដល់ឆ្នាំ២០១៧ អ្នកប្រើប្រាស់បណ្តាញសង្គមហ្វេសប៊ុកនៅកម្ពុជា មានប្រមាណ ៦លាន ៣សែននាក់ ឬប្រហែលនឹង ៣៩ភាគរយ នៃប្រជាជនជាង ១៦លាននាក់នៅទូទាំងប្រទេស៕
