លោកនាយករដ្ឋមន្ត្រី ហ៊ុន សែន បានសម្រេចឡើងវិញអនុញ្ញាតឲ្យសាងសង់ផ្លូវ និងស្ពានតភ្ជាប់ខេត្តកំពង់ឆ្នាំង ទៅកាន់ខេត្តកំពង់ធំ ហើយលោកថា គម្រោងសាងសង់នេះនឹងមិនប៉ះពាល់ដល់ចរន្តត្រីនោះឡើយ។
លោក ហ៊ុន សែន បានប្រកាសឲ្យដឹងអំពីសេចក្ដីសម្រេចចិត្តឡើងវិញរបស់លោកបែបនេះកាលពីថ្ងៃម្សិលមិញនេះ អំឡុងពេលលោកថ្លែងក្នុងពិធីបុណ្យទន្លេ ដែលរៀបចំនៅក្នុងខេត្តកំពង់ឆ្នាំង។
លោក ហ៊ុន សែន ថ្លែងថា៖ «ថ្ងៃនេះ ខ្ញុំសម្រេចចិត្តផ្ដល់ការអនុញ្ញាតការសាងសង់ផ្លូវ និងស្ពានតភ្ជាប់រវាងកំពង់ឆ្នាំង ទៅខេត្តកំពង់ធំ»។
លោក ហ៊ុន សែន បានអះអាងទៀតថា គម្រោងសាងសង់ផ្លូវ និងស្ពានប្រវែងជាង ៥៧គីឡូម៉ែត្រនេះ នឹងជួយផលចំណេញសម្រាប់ការធ្វើដំណើររបស់ប្រជាជនពីខេត្តកំពង់ឆ្នាំងទៅកាន់ខេត្តកំពង់ធំ។
មេដឹកនាំបក្សកាន់អំណាចរូបនេះ បានអះអាងបន្ថែមទៀតថា គម្រោងសាងសង់ផ្លូវ និងស្ពានមួយខ្សែនេះ នឹងមិនប៉ះពាល់ដល់ចរាចរណ៍ផ្លូវទឹក និងការបន្លាស់ទីរបស់ត្រីនោះឡើយ បន្ទាប់ពីត្រូវបានសិក្សាយ៉ាងល្អិនល្អន់ហើយនោះ។
លោក ហ៊ុន សែន ថ្លែងបន្តថា៖ «ហើយសង្ឃឹមថា ពលរដ្ឋយើងនឹងទទួលបានផលប្រយោជន៍ពីគម្រោងមួយនេះ ដែលយើងបានសិក្សាជាក់លាក់រួចមកហើយថា មិនមានផលប៉ះពាល់ណាមួយបំផ្លាញទៅដល់ធនធានធម្មជាតិ ឬក៏បង្វែរចរន្តទឹក ដែលធ្វើឲ្យស្ទះនូវចរាចរណ៍ផ្លូវទឹក និងការបំលាស់ទីរបស់ត្រីនោះទេ»។
គម្រោងសាងសង់ផ្លូវមួយខ្សែនេះ ត្រូវបានលោក ហ៊ុន សែន ប្រកាសឲ្យផ្អាកម្ដងរួចមកហើយកាលពីខែមិថុនាឆ្នាំមុន អំឡុងពេលលោកសម្ពោធកំណាត់ផ្លូវជាតិលេខ ៦ ស្ថិតក្នុងខេត្តកំពង់ធំ៕
