តុលាការក្រុងភ្នំពេញ គ្រោងនឹងប្រកាសសាលក្រមសំណុំរឿងមេដឹកនាំសហជីពលោក ប៉ាវ ស៊ីណា និងមន្ត្រីសហជីពមូលដ្ឋាននៅរោងចក្រ អូសេអង់ ហ្គាមិន នៅថ្ងៃទី២១ ខែមីនា បន្ទាប់ពីសវនាការជម្រះក្ដីនៅថ្ងៃនេះ។
ប្រធានសហភាពចលនាកម្មករកម្ពុជា លោក ប៉ាវ ស៊ីណា និងមន្ត្រីសហជីពមូលដ្ឋាន ៦រូបផ្សេងទៀត ត្រូវបានសាលាដំបូងរាជធានីភ្នំពេញបង្គាប់ឲ្យចូលរួមក្នុងសវនាការនៅព្រឹកថ្ងៃនេះ។
មេដឹកនាំសហជីពរូបនេះ និងមន្ត្រីសហជីពមូលដ្ឋាន ៦រូបទៀត ត្រូវបានតុលាការចោទប្រកាន់ថា បានធ្វើឲ្យខូចខាតដោយចេតនា និងជេរប្រមាថជាសាធារណៈ ពាក់ព័ន្ធនឹងវិវាទការងារនៅរោងចក្រ អូសេអង់ ហ្គាមិន កាលពីខែសីហា ឆ្នាំ២០១២កន្លងមក។
លោក ប៉ាវ ស៊ីណា បានប្រាប់ វីអូឌី ថា ក្នុងសវនាការរយៈពេលជាងមួយម៉ោងនៅព្រឹកនេះ លោកបានបដិសេធថា លោក និងមន្ត្រីសហជីពដទៃទៀត មិនបានប្រព្រឹត្តដូចការចោទប្រកាន់នោះឡើយ ហើយលោកបានស្នើឱ្យតុលាការពិចារណាទម្លាក់បទចោទប្រកាន់មកលើពួកលោកទាំង ៧នាក់ផងដែរ។
មេដឹកនាំសហជីពរូបនេះ អះអាងទៀថា ចាប់តាំងពីរងបណ្ដឹងពីភាគីរោងចក្រអូសេអង់ ហ្គាមិន ចាប់តាំងពី២០១២មក រូបលោកមិនធ្លាប់ទទួលបានដីកាកោះហៅឲ្យចូលបំភ្លឺណាមួយឡើយជុំវិញសំណុំរឿងមួយនេះ។
លោកបន្ថែមថា ប៉ុន្តែ រូបលោកត្រូវបានតុលាការភ្នំពេញ កាត់ក្ដីកំបាំងមុខឲ្យលោកជាប់ពន្ធនាគារ ៨ឆ្នាំកាលពីចុងឆ្នាំមុន ដែលលោកហៅសេចក្ដីសម្រេចរបស់តុលាការថា «អយុត្តិធម៌»។
លោកបន្ថែមថា៖ «អីចឹងហើយបានខ្ញុំប្រាប់ទៅអង្គសវនាការទាំងមូលថា រឿងនេះមិនមានពាក់ព័ន្ធរឿងទាមទារលក្ខខណ្ឌការងារទេ គឺកើតចេញពីការតវ៉ាដោយឯកឯងរបស់បងប្អូនកម្មករដោយផ្ទាល់។ ហើយក៏គ្មានការប្រើប្រាស់ហិង្សា បំផ្លិចបំផ្លាញទ្រព្យសម្បត្តិ ជេរប្រមាថអីដែរ គឺអត់មានទាំងអស់។ ជាធម្មតាក្រុមហ៊ុនគេប្តឹងគេចោទ។ ដូច្នេះ នៅក្នុងអង្គសវនាការមិនមានដើមបណ្តឹងចូលរួមសូម្បីតែម្នាក់។ ដូច្នេះ យើងមិនអាចយកជាការបានទេ។ អីចឹងសុំឱ្យចៅក្រមគាត់ពិចារណា ក្នុងការទម្លាក់បទចោទ មកលើពួកខ្ញុំទាំងអស់គ្នានេះ»។
កាលពីឆ្នាំ២០១២ ភាគីក្រុមហ៊ុន អូសេអង់ ហ្គាមិន ដែលមានទីតាំងនៅភូមិថ្មី សង្កាត់ចោមចៅ ខណ្ឌពោធិ៍សែនជ័យ បានប្តឹងប្រធានសហភាពចលនាកម្មករកម្ពុជា លោក ប៉ាវ ស៊ីណា និងមន្ត្រីសហជីពមូលដ្ឋាន ៦រូបទៀត ពីបទធ្វើឱ្យខូចខាតដោយចេតនា និងជេរប្រមាថជាសាធារណៈ។
លោក ប៉ាវ ស៊ីណា អះអាងថា ប្រសិនបើការប្រកាសសាលក្រមសម្រេចនៅថ្ងៃទី២១ មីនាខាងមុខ សាលាដំបូងរាជធានីភ្នំពេញនៅតែមិនអាចផ្តល់យុត្តិធម៌ដល់មន្ត្រីរបស់ខ្លួនបាន ខាងលោកនឹងប្តឹងទៅសាលាឧទ្ធរណ៍បន្តទៀត៕