លោកនាយរដ្ឋមន្ត្រី ហ៊ុន សែន បានស្តីបន្ទោសទៅអភិបាលខណ្ឌទាំងអស់ ព្រមទាំងអាជ្ញាធរក្រុងភ្នំពេញ ដោយថា ត្រូវទៅបំពេញការងារជូនពលរដ្ឋ និងមិនត្រូវមកចំណាយពេលអង្គុយស្តាប់លោកក្នុងពិធីចែកសញ្ញាបត្រនោះទេ។
ថ្លែងក្នុងពិធីចែកសញ្ញាជូននិស្សិតនៅព្រឹកនេះ លោក ហ៊ុន សែន ប្រាប់ទៅក្រុមមន្ត្រី ឱ្យកាត់បន្ថយចំនួនមន្ត្រីដែលមកហែហម និងចូលរួមពិធីផ្សេងៗជាមួយលោក ដោយមិនត្រូវចំណាយពេលច្រើនមកអង្គុយស្តាប់លោក ដែលធ្វើឱ្យខាតមន្ត្រីបម្រើការងារជូនពលរដ្ឋ។
លោក ហ៊ុន សែន បានស្តីបន្ទោសទៅអ្នករៀបចំពិធីការ ដោយថា មិនត្រូវចេះតែហៅមន្ត្រីឱ្យចូលរួមកម្មវិធីជាមួយលោកឡើយ ហើយវត្តមានអភិបាលខណ្ឌនីមួយៗអាចមានបាន វាលើកលែងតែលោក ចុះទៅខណ្ឌនោះប៉ុណ្ណោះ។
លោកបន្ថែមថា៖ «ឥលូវនេះពីថ្ងៃនេះទៅ យកល្អ លោកអភិបាលខណ្ឌទាំងឡាយហ្នឹង មិនបាច់មកចូលរួមអង្គុយស្តាប់នៅហ្នឹងទេ។ អស់លោកមានការងារធ្វើ ហើយត្រូវធ្វើនៅខាងក្រៅណោះ មកអង្គុយស្តាប់ធ្វើអីទៀតនៅហ្នឹងនោះ។ ឬក៏គេហៅតម្រូវត្រូវតែឱ្យមកអីចឹង។ ក្រុងអីនេះ មិនបានមកទេ អាចអភិបាលរងអីមួយមកបានហើយ ឯក្រៅពីនោះ លោកខណ្ឌទាំងឡាយនេះ មានការងារច្រើនណាស់ មកអង្គុយស្តាប់អីនោះហ្នឹង»។
លោក ហ៊ុន សែន ជាមេដឹកនាំមួយកាន់អំណាចយូរជាងគេនៅក្នុងតំបន់អាស៊ីអាគ្នេយ៍ ដោយបានកាន់អំណាចជាង ៣០ឆ្នាំមកហើយ។
មេដឹកនាំរូបនេះ នៅពេលចេញទៅណាមកណា ពិសេសការចូលរួមរបស់លោកក្នុងវេទិកាម្តងៗ ទាំងនៅក្នុងក្រុងភ្នំពេញ និងតាមបណ្តាខេត្តនានា គេតែងសង្កេតឃើញថា មានមន្ត្រីហែហមអមក្បួនដំណើររាប់រាយនាក់ បន្ថែមលើកងកម្លាំង និងកងអង្គរក្សរាប់រយនាក់ផ្សេងទៀត៕
